Skip to content

Внимание ! Мы в Одноклассниках

Кулун тутар 21 күнэ – Саха Өрөспүүбүлүкэтигэр Сылгыһыт күнэ

21.03.2022 08:01   Огни Нюрбы

Ат сылгы алыстааҕа быһыылаах, Кэтит түөстээх киппэ агдалаах, Киэҥ таныылаах, уһунньукка уорбаланыах, Сүүрүккэ сөптөөх сүөһү оҕото буоллаҕа. Сергей Васильев олоҥхотуттан.

Саха сиригэр 2016 сылтан Сылгыһыт күнэ бэлиэтэнэр. Быйыл Саха Өрөспүүбүлүкэтин Сылгыһыттарын күнэ Ньурбаҕа кулун тутар 21-22 күннэригэр ыытыллар.

 

Киһи аймах олоҕун сайдыытыгар сылгы сүөһү үйэлэртэн үйэлэргэ киһи ааҕан да сиппэт  элбэх үтүөтүн оҥорон кэллэҕэ. Саха киһитэ былыр-былыргыттан күн бүгүнүгэр дылы Дьөһөгөй оҕотугар-сылгыга сүгүрүйэр. Киниэхэ ат миинэр миҥэ, көлүллэр көлө, уһун айаҥҥа ырааҕы чугаһатар аргыс доҕоро, ону сэргэ иҥэмтэлээх аһа, таҥнар таҥаһа, киэргэлэ. Саха сылгыта бытарҕан тымныылаах уһун кыһыҥҥа хаары хаһан аһаан туоруур уратытынан эмиэ биһирэнэн кэллэҕэ. Ол да иһин саха норуота дьөһөгөй оҕотугар сүгүрүйүүтүн туоһу оҥостон, былааҕы өрө туппут саха аллаах атынан айаннатан иһэрэ Сахабыт сирин дьаралыгар киирдэҕэ.

 

 

Хаҥалас нэһилиэгэр урукку колхозтар саҕана бас-көс сылгыһыттарынан С.И. Иванов-Чороон,  Н.Тимофеев-Муруку, кэлин В.Н.  Романов, Н.И. Ксенофонтов-Сулуһаах, В.Н.Алексеев-Тууйааһап, Р.Ст. Иванов, П.Е. Саввинов-Бараан Бүөтүр үлэлээбиттэр. Салгыы атын көлүөнэнэ сылгыһыттар Г.А.Герасимов-Куолдьа, А.И. Габышев, А.С. Винокуров үлэлээбиттэрэ. Кэлин “Хаҥалас” СПК-тыгар А.С.  Григорьев, А.Н. Кононов сылгыһыттаабыттар. Сылгы улахан аҥара Үөдэйгэ турбута. Убаһа күһүн забойга барара, сороҕо иитийэххэ хаалара.

 

 

Саха киһитэ барахсан сылгы айыылааҕа, киниэхэ сүгүрүйэрэ мээнэҕэ буолбатах буолан, кыһыҥҥы бытарҕан тымныыга, сайыҥҥы өҥүрүк куйааска аһаҕас халлаан анныгар сылдьар сыспай сиэллээҕи көрөн-истэн, чахчыта да, тулуурдаах, хорсун кыанар дьон буолан бу чэпчэкитэ суох үлэҕэ сыстан үлэлээн кэллэхтэрэ. Сылгыһыт уустук үлэтэ дьиҥ айылҕаны кытта алтыһарынан тустаах киһиттэн бу идэҕэ үөрүйэҕи билиини таһынан,элбэх мындырдаах үлэҕэ тапталы бэриниини эрэйэр.

 

 

Хаҥалас нэһилиэгин олохтоохторо бу күҥҥэ дылы сылгыһыт быһыытынан  өйдөөн хаалбыт киһибит – Аҕа дойду сэриитин бэтэрээнэ Василий Никитич Алексеев-Тууйааһап. Кини сылгыһытынан үлэлээбитэ олох дьылҕата, сөбүлүүр идэтэ буолан, сынньалаҥҥа да тахсан баран сылгытыттан арахпатаҕа. Антоновкаттан Победа диэн боруода аты атыылаһан, сылгыһыттарга көмөлөһөрө, ферма көһөрсөрө, ыаллар сылгыларын харайсара. Аһара доҕордууларын иһин сылгытын аата бэйэтигэр кытта көһөн, иккиэн  “Победа” ааттаммыттара.

“…Аар айылҕа тыыннаах диибит, ол аата кини өйдөөн, суохтаан эрдэҕэ тоҥ көмүрүө хаары тоҕо кэстэрэн, сылгы күөйэн һуй-һай бөҕөнү түһэрэн, сылгыһыт уолаттара алаас ортотунан көтүтэн иһэллэрин… Онтон сылгыһыт сыыйыллар суола орто дойду олоҕун быһа көтүтэн үөһээ дойдуга сыыйылла турдаҕа”,  -диэн Ньурбатааҕы дьиэ кэргэҥҥэ уонна оҕолорго көмөнү оҥорор киин салайааччыта сылгыһыт Баһылай кыра кыыһа Марианна Васильевна Алексеева аҕатын туһунан ахтыытын түмүгэр олус истиҥник суруйбута.

 

Билигин Хаҥалас нэһилиэгэр, бэйэтэ этэринии, “Күн Дьөһөгөй оҕотун кытта алтыһарбынан астынабын” диир сылгы куттаах, 40-тан тахса сыл эҥин бэйэлээх аты мииннэн, дьүккүөрдээх үлэһит дьону кытта алтыһан үлэлээн кэлбит сылгыһыт үтүөтэ нэһилиэк бочуоттаах олохтооҕо Александр Семенович Винокуровы ааттыахха сөп.

Александр Семенович сылгыга сыстыыта  оччотооҕу оҕо сиэринэн  бэрт кыра сааһыттан саҕаламмыта. Сылгыга үөрэппит-такайбыт киһитинэн Василий Алексеевы тумус туттар. Александр Хаҥалас СПК-ҕа үлэлиир сылларыгар сылгыһыттар звенолара нэһилиэккэ саамай элбэх оту оттоон туттарара, хаһаайыстыба сылгыта 298 төбөҕө тийэ сылдьыбыта. Бу сылларга ат сүүрдүүтүнэн дьарыгыран, саамай улахан ситиһиилэрэ Үөһээ Бүлүү Мэйик нэһилиэгэр тэриллибит үбүлүөйнэй ыһыахха ат сүүрдүүтүгэр кыттан, 13 бириис турбутуттан 12-тин ылан үөрүү өрөгөйүн билэн кэлтэрэ буолар.

 

Билигин да бэйэтин сааһыгар сөбө суох түргэн-тарҕан туттуулаах, ат үрдүгэр бэрт сэргэхтик туттан иһэр Александр Семеновиһы дэриэбинэ иһигэр элбэхтик көрөҕүн, киниэхэ уһуннук сылгыһыттаабыт бэлиэтигэр 46 сааһыгар  “По выслуге лет коневоду “диэн Ыйаахха сөп түбэһэн, пенсия анаммытыгар махталлаах.

Аһаҕас халлаан анныгар сылдьан, сыспай сиэллээҕи тэнитэр туһугар сыралаһан үлэлиир биир дойдулаахтарбытыгар бу Дьөһөгөй ыйыгар бэлиэтэнэр Сылгыһыт күнүнэн истиҥ эҕэрдэбитин тиэрдэбит, чэгиэн туругу, ыраас халлааны баҕара хаалабыт.

Оставить комментарий

Войти с помощью: