Skip to content

Внимание ! Мы в Одноклассниках

ЛАРИСА ЛУКИНА «БӨРТӨ» ХЭТ БАСТЫҤ ЫАННЬЫКСЫТА

2022 сыл Саха Өрөспүүбүлүкэтин Ил Дархана Николаев А.С. СӨ Судаарыстыбаннай Мунньаҕын депутаттарыгар туһаайан этиитинэн Ийэ сылынан биллэриллэн турар. Саха сиригэр бэйэтин үлэҕэ ситиһиилэринэн, олоҕунан дьонтон уһулуччу турар кэрэ аҥаардар аҕыйаҕа суохтар. Олортон ойуччу тутан тыа хаһаайыстыбатыгар үлэлээбит, үлэлии сылдьар эбээлэрбитин, ийэлэрбитин, эдьиийдэрбитин, балыстарбытын бэлиэтиэххэ наада. Манна бааллар саастарын тухары үлэлээн үрдүк чыпчааллары ситиспит геройдар, оҕо-уруу төрөтөн күүрээннээх үлэҕэ угуйан бэйэлэрин суолларын батыһыннарбыт герой ийэлэр, билиҥҥи кэмҥэ үрдүк кирбиилэри ситиһэр ыанньыксыттар, оҕуруотчуттар, табаһыттар, специалистар, тыа хаһаайыстыбатын салаатын бары үлэһит дьахталлара.

Олортон биирдэстэрэ Бөртө сылгы собуота ХЭТ бастыҥ ыанньыксыта, СӨ тыатын хаһаайыстыбатын туйгуна, үлэҕэ ситиһиилэрэ бэлиэтэнэн элбэх грамоталар, эҕэрдэ суруктар хаһаайкалара Лариса Дмитриевна Лукина буолар.

Лариса Дмитриевна эдэр сааһа “Оскуола, производство, үрдүк үөрэх” диэн ыҥырыы тахсыбыт кэмигэр түбэһэн, оччотооҕу ыччат дьон сиэринэн оскуола кэнниттэн “Булгунньахтаах” сопхуоска кылааһынан ыанньыксыттыы тахсаллар. Ол сылдьан Улахан Аантан сылдьар сылгыһыт Андрей Афанасьевич Лукины көрөн, эдэр дьон бэйэ бэйэлэрин сөбүлүү көрөн олохторун холбуурга сананаллар. Ол кэмтэн ыла 40 кэриҥэ сыл ааһа оҕуста. Ол тухары Лариса Дмитриевна Бөртөҕө үлэлээн кэллэ. Билигин Лариса Дмитриевна эдэр ыанньыксыттарга холобурга сылдьар, сүбэһит, ыарахан үлэ кистэлэҥнэрин дириҥник билэр уопуттаах ыанньыксыт. Бу хаһаайыстыбаҕа үлэлиирин тухары сылтан сыл үрдүк көрдөрүүлэри ситиһэн инникилэр ахсааннарыгар сылдьар бастыҥ үлэһит. Аҥардас кэнники икки сылга үүт ыаһыҥҥа көрдөрүүлэрэ билиҥҥи кэминэн сыаналаатахха кырата суох. Ол курдук 2020 сыллаахха хас биирдии ынаҕыттан 3400 киилэ үүтү ыан сыл бастыҥ ыанньыксытын аатын ылбыта. Ааспыт сылга көрөн олорор ынахтарыттан хас биирдиилэриттэн ортотунан 3050 киилэ үүтү ыабыт.

Лариса Дмитриевна Андрей Афанасьевичтыын алта уол уонна биир кыыс оҕону төрөтөн үлэһит дьон оҥортоотулар. Улахан уоллара Антон суоппар идэтин баһылаан улуус киинигэр Покровскайга олорор.

Онтон Анатолий аҕатын суолун батыһан дойдутугар сылгыһыттыыр. Элбэх оҕолоох дьиэ кэргэн аҕа баһылыга. Ортоку уол Владик сылгы собуотугар харабылынан үлэлии сылдьар. Афанасий убайын курдук Бөртөҕө үлэлиир. Сварщик идэлээх.