Skip to content

АНОНС

Открылся   YouTube канал Тубсааны 

Тоҕо маннык буолла?

Ангелина Спиридонова – Сир Симэгэ, элбэх оҕолоох ыал ийэтэ, эбээтэ (Республика Саха, г. Якутск).
5.04.2020 г.

Тоҕо маннык буолла?
Тоҕо бу кэм кэллэ?
Тыыммытын ким бүөлээтэ?
Тыын ыйытык тоҕо үөскээтэ?
Тыын хаайтардаҕына,
Тыҥа киртийдэҕинэ,
Туох барыта охтор,
Туһата суох тохтор.
Куттал киирдэҕинэ,
Кут ыһылыннаҕына,
Киһи ыксыыр, ыһыктынар,
Кураанахсыйар, хотторор.
Хом санаа холбонор,
Хорҕойбут холбоһор,
Хой баһын туойар,
Хоргуйуу буолар.
Аччык киһи аһааҕырар,
Аас- туор олохтонор,
Айгырыыр, ыарытыйар,
Араас куһаҕаны ырыҥаланар.
Кутталы улаатыннардахха,
Куотар сири булбатахха,
Кыраттан бүдүрүйэр,
Киһитийэн да бүтэр.
Тыҥа оччоҕо кыпчыттарар,
Тумуу – сөтөл киирэр,
Түбүркүлүөскэ кубулуйар,
Түөрэҕэ таҥнары түһэр.
Тубсанаторий быыһыыра,
Тупсартаан таһаартыыра.
Онтубут ханна тиийдэ?
Оройдотон көрүҥ, ким иирдэ?
Балыыһалары сабыы,
Быраастары аччатыы,
Барыыстааҕын умуннубут?
Барҕалыыры тумуннубут?
Үрүҥ халааттаах аанньаллары,
Үрдүк Айыыларга тэҥнии көрөн,
Үтүөлэрин өйөөтөххө?
Үрдүк хамнас төлөөтөххө?
Сыаннастарын үрдэттэххэ?
Санааларын көтөхтөххө?
Саҥа үйэ сайдыы суолугар
Саҕахтарын арыйдахха?
Эрчимнээх эрэттэр
Эти- сиини көҥдөйдүү,
Эрчийэллэрин тохтоттоххо?
Этэн- тыынан
Экономиятын аччаттахха?
Эрэстэрээннэри кыччаттахха?
Ол оннугар,
Иэгэйэр икки атахтаах
Ийэ кутун харыстаатахха?
Ийэ Сирбит иччилэрин
Илдьит тылын иһиттэххэ?
Айыыһыт ыйа үүннэ.
Айыыларбыт араҥаччылааҥ!
Алы гыныҥ, алҕааҥ!
Алдьархайтан быыһааҥ!
Оҕо- уруу төрүүр- ууһуур –
Олох салҕанар үгэнэ,
Оруннаах үтүө кэмэ-
Отой биир сүдү түгэнэ!
Олорбута эбээт, өбүгэ
Очурдары туораан,
Дириҥник хорутан толкуйдаан,
Дьонун, норуотун санаан!
Түүлүнэн биттэнэн,
Түҥ тыаҕа бүгэн,
Аал уоту оттунан,
Айа кылыыны иитэн.
Төрүт идэбитин уһугуннаран,
Төрүт сирбитин сөргүтэн,
Төлкөнү түстэһэр
Толкуйданар кэм кэллэ!
Орто дойдуну сириэдитэн,
Орун – оннугар түһэрэн,
Оломун булларыахха!
Олоҕун оҥорсуохха!
Харах далыгар- бу турар:
Хараҥа халбарыйар,
Хаһаайыстыба сайдар,
Хас биирдиибит сирдэнэр!
Өбүгэбит өтөҕөр
Өтөн үөтэр, кэҕэ этэр,
Өлбөт үөстээх саха – аймах
Өрөгөйө улаатар!
Сыһыы- сыһыы муҥунан
Сыспай сиэллээх тыбыырар,
Хонуу- хонуу муҥунан
Хороҕор муостаах айаатыыр!
Оччоҕунаа,
Ийэ сирбит тиллэн кэлиэ!
Иһийиэҕэ,алҕыаҕа!
Ириэнэх хааннааҕы истиэҕэ,
Ил -эйэ илгийиэҕэ!
“Саха олоҕо уһуоҕа!
Саха удьуордаан ууһуоҕа!”
Туску!

03.04.2020 с. 16ч.22 м.

Оставить комментарий

Войти с помощью: