Сахалар Николай II ыраахтааҕы коронациятыгар
Бу сэдэх хаартыска 1896 сыл ыам ыйын 14 күнүгэр түһэриллибит. Москваҕа Успенскай собуорга нуучча ыраахтааҕыта Николая II корона кэтэр сиэрэ-туома.
Хаартыскаҕа Сибиир депутациятыгар киирбит Илин Хаҥалас улууһун кулубата, меценат Прокопий Филиппович Лепчиков, саха бастакы интеллигенциятын бэрэстэбиитэлэ, учуонай, суруйааччы Василий Васильевич Никифоров — Күлүмнүүр, сир оҥоруутун уонна угуттатыытын, музей үлэтин саҕалааччы Петр Алексеевич Афанасьев — Бөтүрүүсэ тураллар. Сахалартан депутацияҕа өссө 2-с гильдиялаах атыыһыт Петр Илларионович Захаров уонна этнограф-учуутал, Покровскай волость баһылыга Николай Прокопьевич Припузов бааллар эбит да, бу хаартыскаҕа кинилэр түспэтэхэр.
Сэдэх хаартысканы Станислав Афанасьев, Хомус музейын үлэһитэ, “Мелихово” заповедник-музей фондатыттан булбутун туһунан суруналыыс Михаил Романов суруйан турар.
Станислав Афанасьев:
“Лепчиков уонна Никифоров сахалыы таҥастаахтар, Лепчиков бэл сахалыы этэрбэстээх турар. Прокопий Филиппович кортиктаах, түөскэ иилиллэр чаһылаах, өйдөбүнньүк бэлиэлээх. Арааһа коронация кэнниттэн хаартыскаҕа түспүттэр быһыылаах. Докумуоҥҥа этиллэринэн, коронацияҕа кинилэргэ көмүс чаһы уонна кортик бэлэхтээбиттэр.
Петр Алексеевич мааны сонноох, саппыкылаах. Оччолорго итинник муода эбит. Бэргэһэлэрэ үһүөннэрин киэнэ улахан дьороҕо кэтиллэр бэргэһэ. Көрөргүт курдук биһиги дьоммут быһыылыын-таһаалыын, көстөр дьүһүннүүн бас-көс дьон буолаллара тута харахха быраҕыллар. Ол да иһин хас да сүүс киһиттэн фотограф ала-чуо кинилэри талан түһэрдэҕэ”, – диэн суруналыыска кэпсээбит.
***
Aartyk.Ru
