Якутия. Образ будущего

Муҥха көрө-нара оройуттан тутулунна, күргүөм күлсүү, үөрүү-көтүү аргыстаах, бэрт бэрээдэктээхтик, иллээхтик, кэлбит балыгы үөрэ көтө үллэһиннибит. Туох кистэлэ кэлиэй, уопсайынан кэнники кэмнэргэ балыктыы кэлбит дьон “кыраадыстара” аһара үрдээн чардаакка да анньыһаллара баар суол, биһиэхэ биир да балыксыт “кыраадыһа” тахсыбата. Нэһилиэкпит олохтоохторугар үтүө да күн ааста, оҕолор да элбэхтэрэ киһини үөрдэр. Күөх Боллох ол онтон да үөрэн көмүс хатырыктааҕыттан сөп соҕустук балыксыттарын өлүүлээтэ. Бастаан биллэриллибитин курдук Тойбохой “баартаах” муҥхалара “булларбакка” ыаллыы сытар Уһун күөл “аатырбыт” муҥхатын – улууска биллэр буор балыксыт Револий Павлов, бэйэтин уҥа-хаҥас илии-атах уолаттарын илдьэ Баһылыкпыт Петр Вячеславович анал ыҥырыытынан тиийэн кэлэн муҥха түһэрэн таһаардыбыт..

Бастакы таһаарыы кэннэ 50 тахса  балыксыты эмис эттээх идэһэ миининэн, итии чэйинэн нэһилиэкпит баһылыгын солбуйааччыта Гульнара Бекназаровна Трифонова уонна  элбэх оҕолоох ийэ Екатерина Павлова күндүлээтилэр.

Балык үллэстэр кэмҥэ баһылыкпыт Петр Тимофеев нэһилиэк дьаһалтата олохтообут бириистэрин туттартаата. “Саамай аҕам саастаах муҥхаһыт” – Револий Павлов (Уһун Күөл) “Саамай эдэр саастаах муҥхаһыт” – Туйгун Павлов, “Бастыҥ анньыыһыт” – Айсен Федоров (Сунтаар), үчүгэй, астык дорҕоонноох үөгүүлээх “Ньырыыһыттар хапытааннара” –  Алексей Попов (Уһун күөл) ыланнар үөрүүлэрэ үксээтэ.

Сунтаартан “Бартыһаан” кулуубун үлэһиттэрэ кэллэктиибинэн тутуспутунан тахсыбыттара хайҕаллаах. Улууска биллэр ырыаһыт, тойуксут, олоҥхоһут Айсен Федоров дэгэрэҥ ырыатын бэлэх уунна.

Нэһилиэкпит баһылыгар Петр Тимофеевка бу кыһыҥҥы муҥханы тэрийэн, иилээн – саҕалаан ыыппытыгар махтал тылларын аныыбыт.

Муҥхаҕа сылдьыбыт да сылдьыбатах да дьон аны хаһан маннык муҥха буоларын туоһулаһаллара үксээтэ…

Муҥха кыттыылааҕа Павел Кырелов.