Skip to content

Внимание ! Мы в Одноклассниках

Сэтинньибит саҕаланна

Галина Бочкарева  

Баай Байанай ыйа — сэтинньибит — саҕаланна. Бу кэми ордук саха киһитэ кэтэһэр.

Тоҕус ыйдаах томороон тымныыны этэҥҥэ туорууругар бэлэмнэнэр олус эппиэтинэстээх, олус суолталаах бириэмэ. Тыа сирин олохтоохторо кыстыыр муустарын ылыыттан саҕалаан, күрүөнү-хаһааны оҥостор, дьиэни-уоту, хотону сылытар, астарын-үөллэрин бэлэмнэнэр кэмнэрэ.

Саха ыалын сандалыта Баай Байанай бэрсэриттэн, утары уунарыттан улахан тутулуктаах. Ол да иһин, өбүгэлэрбит үгэстэрин кэспэккэ, хара тыаҕа бултуу барарга,  килэркэй муус күөллэргэ балыктыы киирэргэ сиэри-туому тутуһабыт: үрдүк Айыылартан «дук» гыналларыгар көрдөһөбүт, аал уоппутун алгыыбыт, аһатабыт. Оччоҕо кинилэр хоту кыраайга олохтоох оҕолорун  барахсаттары туохтан да матарбаттар.  Баай Байанайбыт бэйэтин көрүүтүнэн бэлэх уунар, хадаҕалыыр.

253

Саха аһа тотоойу, иҥэмтиэлээх, минньигэс, ураты амтаннаах. Ону ааһан эккэ-сииҥҥэ бэрт туһалаах. Тыа дьоно оҕо эрдэхтэн билэн испитигэр иҥэрэн улааттахпыт. Ол ситим билигин да биһиги олохпутугар баар. Көлүөнэттэн көлүөнэҕэ бэриллэн, туһанылла сылдьар. Сэтинньи ый үүннэр эрэ, муус уйумтуота билиннэр эрэ, саха дьоно муҥхаларын тэрийбитинэн бараллар.

2333

Муҥха собото бүтүн дэриэбинэни аһатарын ааһан, куоратынан, туора сирдэринэн тарҕанар. Хаһаас собо ампаарга ууруллар. Муҥха киэһэтэ эмис собо сибиэһэй минин сыта дьиэ ахсын дыргыйара туһунан үөрүү!

22

Онтон эт тоҥор тымныыта сатыылаата диэн кырдьаҕастар быһаардылар да, тиэргэн ахсын идэһэ сүүскэ бэриллэр. Ыал остуолугар эмис эт минэ, соркуойа тардыллар. Ол эмиэ хас биирдии сүөһүлээх үлэһит ыалга туһунан дьол, үөрүү!

Үүммүт сэтинньи ый байанай­даах, бааттаах буоллун! Сахабыт дьоно быйылгы кыстыгы этэҥҥэ туоруулларыгар үтүө өттүнэн эрэ хайыстын!

Оставить комментарий

Войти с помощью: