Нуораҕана быһыта сөргүтүллүөҕэ
Мэҥэ Хаҥалас улууһун Дьабыыл нэһилиэгэр Ил Түмэн Бэрэссэдээтэлэ Алексей Еремеев сырытта.
Улуус баһылыгын бастакы солбуйааччы Семен Потапов уонна оройуон сэбиэтин дьокутаата Дмитрий Петров спикергэ Нуораҕана сэлиэнньэтин олохтоохторун иитэн-аһатан олорор күөл буор быһыта сөргүтүллэрэ олус наадатын туһунан эттилэр.
2015 сылтан саҕалаан, сааскы халаан уута быһыты улаханнык айгыратан ааһар буолла. Олохтоохтор туруорсууларынан, быһыты өрөмүөннүүр туһунан боппуруос Ил Дархан 2019-2020 сс. Сорудаҕын кэрискэтигэр киллэриллибитэ.
Онно олоҕуран, быһыты саҥардан оҥоруу Тыа хаһаайыстыбатын министиэристибэтин инвестиционнай былааныгар киирбитэ. Ол эрээри, үбүлээһин суоҕунан сыллата көһөрүллэн иһэр. Эбийиэги көрөн-истэн баран, Алексей Еремеев сүбэ мунньахха быһыты сөргүтүү бырайыагын оҥорууга уонна тутууга үлэлэһэр наадатын тоһоҕолоон бэлиэтээтэ.
