Skip to content

АНОНС !!!

Маҥнайгы ыһыах

Саха ытык күнүн – Улуу Тунах Ыһыаҕы көрсө араас кэмнэргэ тахсыбыт ыһыах туһунан ыстатыйалары бэчээттээн саҕалыыбыт.  

Оройуоҥҥа маҥнайгы ыһыах 1932 с. Саха АССР тэриллибитэ уон сыла туолар юбилейыгар анаан  тэриллибитэ. Ол  иннинэ нэһилиэктэринэн ыһыахтар буолуталаабыттара.

Оччолорго Ньурбаҕа уонча эрэ көстүүлээх дьиэ баара. Ыһыах аар баҕаҕа билиҥҥи  кино театр олоҕор туруоруллубута. Райком дьиэтин оннугар кыра мас трибуна туруорбуттара. Ыһыахха элбэх киһи мустубута. Онно араатарынан аатырар ЫБСЛКС обкомун үлэһитэ Маркел Бубякин дакылааттаабыта. Кини кэлэн дакылааттыыра эрдэттэн сураҕырбыта. Нюрбинка үрэҕин кытыытыгар диэри толору мустубут дьон бары чуолкайдык истэллэрин курдук киэҥ, чуор куоластаах киһи эбит этэ. Дьон-сэргэ олус астыммыта.

Ыһыах үс күн устата барбыта. Бастакы күн арыылаах кымыһы түһүлгэлээн олордон иһэрдибиттэрэ. Аҥардас биэ үүтүнэн оҥоһуллубут кымыһы үс күн устата кыайан бүтэрбэтэхтэрэ. Мэҥэдьэктэр Накаас нэһилиэгэр, чуукаардар Сүлэҕэ, мархалар – Аммосовкаҕа – Куочайга биэлэрин киллэрэн кымыстаабыттара. Токостор, араҥастаахтар кымыстарын оҥочонон киллэрбиттэрэ. Барыта сылгы этин буһаран атыылаабыттара, хорчуоппа өрүс кытыытыгар, Нюрбинка үрэҕин үрдүгэр тэриллибитэ. Саамай үчүгэй кымыстааҕынан сүлэлэр, токостор аатырбыттара. Мэҥэдьэктэр эмис эттэринэн үөрдүбүттэрэ. Үҥкүүһүттэринэн эмиэ кинилэр бастаабыттара. Бастыҥ түһүлгэлээҕинэн сүлэлэр буолбуттара.

Тустуу, кылыы ыһыахха улахан болҕомтону тардыбыттара. Урукку бөҕөстөр кырдьан уурайбыт буолан, эдэр бөҕөстөр тустубуттара. Оччотооҕуга ыһыахха биирдэ охтубут киһи тустарын быраҕар этэ. Бөҕөстөр үс бөлөххө хайдан тустубуттара. Онно ким суруттарарынан этэ. Маҥнайгы бөлөххө үс киһиттэн Васильев (Чуппууска) кыайбытын өйдүүбүн. Кылыыга Миронов Баанньа, Табахтаах уола бэккэ оонньообуттара дьон болҕомтотун тардыбыта. Дьоруо аттаахтарга бөтөрөҥ дьоруо аттаах Давыдов (Арҕаа дэриэбинэ) тулуталаабатаҕа. Сылгы быыстапкатыгар малдьаҕардар атыырдара, биэлэрэ бастаабыттара, атыыр оҕуска, ынахха сүлэлэр ордубуттара. Үчүгэй чэйдээхтэринэн аммосовкалар, антоновкалар аатырбыттара.

Киһи дууһатыгар уһуннук иҥэн хаалар чахчы үчүгэй юбилейнай ыһыах буолбутун өйдөөн сылдьарбын суруйдум. Оччотооҕуну билбэт эдэр дьоннор аахтыннар диэн.

П. Яковлев.

Ньурбачаан.

“Коммунизм суола”, 04.03.1982 с.    

Оставить комментарий

Войти с помощью: