Skip to content

АНОНС

“Путь Кулаковского” саҥа туристическай маршрут бүтүн өрөспүүбүлүкэни хабыа

14.05.2022 04:33   Ханалас

Муус устар 26 күнүгэр СӨ Баһылыга Айсен Николаев кыттыылаах “Прямая линия” быһа биэриигэ Хачыкаат нэһилиэгин олохтооҕо Анастасия Федорова Хаҥалас улууһугар История өйдөбүнньүгүн сылынан, саха омук бастакы үөрэхтээхтэриттэн биирдэстэрэ, саха литературатын төрүттээччи, бөлүһүөк, көрбүөччү А.Е.Кулаковскай-Өксөкүлээх Өлөксөй төрөөбүтэ 145 сылынан уонна “Письмо якутской интеллигенции” айымньытын 110 сылынан бэрт сонун “Путь Кулаковского” диэн туристическай маршрут бырайыага оҥоһулларын уонна ыам ыйыгар нэһилиэккэ улуу суруйааччыга анаммыт “А.Е.Кулаковский – духовный лидер Якутии” научнай-практическай симпозиум тэриллэрин туһунан иһитиннэрбитэ.

Ил Дархан Өксөкүлээх Өлөксөй айымньылара, мэҥэ үлэлэрэ, чахчы, билигин да дириҥник үөрэтиллиэхтээҕин бэлиэтээн туран, бу турмаршрут сайдыахтааҕын, өйөбүл баар буолуохтааҕын эппитэ.

 

Сонун уонна дириҥ суолталаах турмаршрут хайдах-туох сыаллаах тэриллэрин Хачыкаат нэһилиэгин баһылыга Ирина Оболкина билиһиннэрдэ.

 

– Бу идея биһиэхэ соһуччу киирбэтэ. Биллэрин курдук, биһиги нэһилиэкпитигэр Өксөкүлээх Өлөксөй иккитэ кэлэн, истиҥник доҕордоһор киһитигэр, биһиги биир дойдулаахпытыгар, эмиэ историяҕа ураты суолу хаалларбыт меценат Семен Петрович Барашковка олорон учууталлаабыта биллэр. Бу манна олорор сылларыгар кини научнай үлэнэн дьарыктаммыта уонна “Ойуун түүлэ”, “Өрүс бэлэхтэрэ”, “Саха интеллигенциятыгар сурук” диэн чулуу айымньыларын суруйбута. Онтон сиэттэрэммит биһиги “Путь Кулаковского” диэн туристическай маршрут толкуйдаан оҥорорго быһаарынныбыт. Бу турмаршрут Хачыкаат нэһилиэгинэн эрэ муҥурдаммат. Өксөкүлээх Өлөксөй олоҕун устата Тааттанан, Бүлүүнэн, Бодойбонон, Хаҥалаһынан уонна Дьокуускай куоракка олорон үлэлээбитэ. Билигин биһиги оскуолабыт учууталлара Өксөкүлээх Өлөксөй Хачыкаакка кэлиэн иннинэ ханна, хаһан үлэлээбит сылларынан хронология оҥоро сылдьаллар. Онон, биһиги көрүүбүтүнэн, кини айан-тутан, олорон ааспыт сирдэринэн бу маршрут салҕаныахтаах. Ол эбэтэр, бүтүн өрөспүүбүлүкэни хабар дириҥ суолталаах маршрут буолар. Онон, бу идеяны Алексей Кулаковскай төрөөбүт улууһуттан саҕалаан олоро сылдьыбыт улуустара өйүөхтэрин наада. Бу өрөспүүбүлүкэ иһинээҕи туризм сайдыытыгар өссө биир хардыы буолуо этэ.

 

Чуолаан, Хачыкааты ылар буоллахха, биһиги бу турмаршрут чэрчитинэн Семен Барашков уһаайбатын чөлүгэр түһэрэн, гостиничнай комплекс оҥорор былааннаахпыт. Сирэ-уота барыта баар, урбаанньыттары кытта үлэлэһэ сылдьабыт. Салгыы, кырдьаҕастарбыт этэллэринэн, Булуустан иһирдьэ соҕус киирдэххэ Өксөкүлээх Өлөксөй уонна Семен Барашков – икки просветительскай өйдөөх-санаалаах дьон көрсөн хаамсар, кэпсэтэр, санаа атастаһар сирдэрэ баар эбит, бэл, ыллык омооно хаалбыт. Онон бу сиргэ мэҥэ таас туруорар баҕалаахпыт. Уопсайынан, биһиги кэрэ көстүүлээх айылҕабыт улуу суруйааччыга үтүө эрэ дьайыылаах эбит диэн саныыбыт. Онон, туристарга ону көрдөрөр-билиһиннэрэр баҕалаахпыт. Бу сотору буолуохтаах научнай-практическай симпозиумҥа маны барытын билиһиннэрэн, министиэристибэлэри кытта үлэлэһэн саҕалыахпыт.

 

Лилия Кычкина, Николаев-киин кылаабынай испэсэлииһэ:

 

– Биһиги өрөспүүбүлүкэбит Бастакы Президенэ Михаил Николаев көҕүлээһининэн ыам ыйын 26 күнүгэр Хачыкаат нэһилиэгэр “А.Е. Кулаковский – духовный лидер Якутии” научнай-практическай сипозиум тэриллиэ. Бу симпозиумҥа общественность, ситэриилээх былаас салайааччылара уонна үлэһиттэрэ, муниципальнай тэриллиилэр баһылыктара, государственнай тэрилтэлэр салайааччылара, үлэһиттэрэ, култуура, искусство деятеллэрэ, научнай уонна айар интеллигенция кыттыыны ылыахтара. Симпозиум үлэтин сүрүн хайысхаларынан А.Е. Кулаковскай “Сеимчанский дневник” кинигэтин сүрэхтэниитэ; А.Е.Кулаковскай идеяларын олоххо киллэрии уонна сайыннарыы: демография, социальнай бэлиитикэ, доруобуйа харыстабыла; төрөөбүт тылы уонна култуураны чөлүгэр хаалларыы; Россия норуоттарын доҕордуу сыһыаннара; Саха сирин улуустарыгар тыа хаһаайыстыбатын сайыннарыы; А.Е.Кулаковскай төрөөбүтэ 150 сылыгар бэлэмнэнии буолуоҕа.

Оставить комментарий

Войти с помощью: