Skip to content

АНОНС !!!

Эдьиий Дора улахан харсыһыы кэнниттэн олохпут оннун-тойун булуоҕа диэн уоскутта

14.03.2022 16:50  Улус Медиа

Норуот эмчитэ Дора Иннокентьевна Кобякова-Эдьиий Дора «Саха» көрдөрөр-иһитиннэрэр хампаанньа биэриитигэр тахсан, дьонун-сэргэтин алҕаата, бу быыһык кэмҥэ түмсүүлээх буолуоҕуҥ диэн ыҥырда.

«Сахалыы чуумпуран, бэйэ-бэйэбитин кытта биир сүбэнэн олоруохтаахпыт. Бу буола турар түгэҥҥэ бэйэ-бэйэни истиһэн, мэһэйдэспэт гына тэринэн олоруохтаахпыт. Куттанымаҥ, дьиксинимэҥ. Сахалар олорбуппут курдук олоруохтаахпыт, олоҕу уустугурдубакка», – диэн кини саҕалаата.

Эдьиий Дора этэринэн, бу маннык балаһыанньаҕа төһөнөн улахан кыһалҕа тириир, соччонон чуумпуруохтаахпыт, тардыныахтаахпыт.

«Сиэри-туому тутуһан түмсүүлээх буолуохтаахпыт. Үлэбитин хамнаспытын үллэстэн бэйэ-бэйэҕэ өйөбүл буолуохтаахпыт. Ыһыллыбакка олоруохтаахпыт. Төһөнөн саҥа-иҥэ тастан кэлэр, ону биһиги үөһэнэн истиэхтээхпит. Онтон айгыраан эстии суолугар үктэниэ суохтаахпыт. Бигэ сахалыы холумтаннаах буолуохтаахпыт. Киһи күүһэ айылҕатыгар уонна өбүгэлэригэр», – бэлиэтиир кини.

Ол курдук, Эдьиий Дора түмсүүлээх кэмнэр буоллуннар диэн алҕаата. Кини элбэх киһи тоҕо ааҥнаан кэлиэҕэ диэн сэрэттэ.

«Сотору кэминэн элбэх киһи кэлиэ, кэлбиттэрэ да ыраатта, мин ол туһунан элбэхтэ эппитим. Онтон саллан онно-манна саһыа суохтаахпыт. Олох миэлиҥсэтигэр сылдьыахтаахпыт. Араас омуктары кытта тэҥҥэ үлэлиир, биир холумтаҥҥа олорор кэммит кэллэ, ыһыллан тарҕанар наадата суох. Холкутук сылдьыахтаахпыт, олохпут тэтимин ыһыктыбакка. Куттанымаҥ, киһи куттаннаҕына кэбириир. Кыыһырсан бүтүөҕүҥ, эйэлээх буолуоҕуҥ диэн алҕыыбын», – диэн кини сүбэлээтэ.

Эдьиий Дора солуута суох барыны барытын ылан хаһаанар куһаҕан бит буолар диир. Барытыгар харыстабыллаахтык сыһыаннаһыахтаахпыт.

«Ким оҕото буоларгытын, хантан төрүттээх буоларгытын, дойдубут аатын түһэн биэрбэт гына олоруохха наада», – диэн эттэ кини.

Норуот ытыктыыр киһитэ ил олох буоларыгар, эйэ холууба дойду үрдүнэн көтөрүгэр алҕаата.

«Улахан харсыһыы буола турар, бу кэнниттэн түмүктэниэхтээх, ол кэннэ олохпут оннун-тойун булуоҕа, ол кэннэ үчүгэй буолуоҕа. Ол харсыы кэнниттэн төлөрүйүү буолуоҕа. Биһигини саҥата суох сэриилээн ылбыттара ыраатта, арыгынан, наркотигынан, табаҕынан. Киһи саллара наркотиктан. Сэрии да наркотик да биир. Мантан бэйэбит босхолонуохтаахпыт», – диир Эдьиий Дора.

«Тоҥор-хатар диэни, аччыктыыр диэни, уот оттор диэни билбэппит. Бу күнтэн ыла дьиҥ сахалыы олоруохтаахпыт, бэйэҕитин хаһан да сэнэнимэҥ. Күнүс тугу саҥарарбыт, түүн төннөн түһэр», – диэн баран куһаҕаны саҥарымаҥ, тылгытын-өскүтүн туттуна сылдьыҥ диэн сүбэлээтэ.

Федора Иннокентьевна Саха сирэ уонна Арассыыйа биир холумтаннаах диэн санаатын үллэстэр.

«Олус элбэх киһи кэллэҕинэ сахалар куттанан хаалбатаргыт ханнык. Дьиҥэ күүстээх омукпут. Олоххо тулуурдаах, бэриниилээх, сымнаҕас омукпут. Онтон-мантан куттаммаппыт. Оҕолору кыра эрдэхтэриттэн бэлэмниэххэ наада. Киһи быһыытынан, саха быһыытынан», – диэтэ кини.

Норуот эмчитэ тоһоҕолоон бэлиэтииринэн, уруккулуу олорон бүттүбүт, саҥалыы тэринэн олоруохтаахпыт.

«Олоҕу харыстыахха наада. Айылҕаны харыстыахтаахпыт. Айылҕа киһи аймаҕы тутан олорор диэн улахан үлэ барыаҕа. Айылҕаларын толук уурбут омукка эстии-быстыы кэлиэҕэ. Айылҕа иэстэһиэҕэ. Кэмиттэн-кэмигэр ураганнар, цунамилар түһүөхтэрэ», – диэтэ Эдьиий Дора уонна тас дойду тыала, араас тыллаах салгына бу эҥээргэ кэлбэтин диэн алҕаата.

Подробнее: https://ulus.media/article/46026

Оставить комментарий

Войти с помощью: