Skip to content

АНОНС !!!

Эмиэрикэ сахата, Эн саха буолбатах эбиккин!

Астаапкаҕа олорор полковник Анатолий Чомчоев Эмиэрикэ сахата арассыыйатааҕы пааспарын умаппытыгар уонна бииргэ сулууспалаабыт украинатааҕы доҕотторун туһунан  санаатын суруйда.

«Мин 70 саастаахпын. Сахабын. Үрдүк байыаннай академическай үөрэхтээх инженербин. Биир кэмҥэ «Укрытие» диэн  Чернобыль атомнай электростанциятыгар тахсыбыт саахал содулун туоратыыга ураты суолталаах зонатын оперативнай бөлөҕүн штабын салайбытым (АЭС иһинэн).  Төһө кыалларынан Украинаҕа буола турар быһыыны-майгыны кэтээн көрөбүн.

Дьэ, ол көрө сылдьаммын, олунньу 28 күнүгэр Якт.ру сайт форумугар «Саха киһитэ АХШ Арассыыйа Украинаҕа ыытар байыаннай операциятын утары миитинигэр  Арассыыйа гражданинын пааспарын уматта» диэн сонуҥҥа уонна ону оҥоро турар эдэр азиат хаартыскатыгар түбэстим.

Ити сонун сымыйа, фейк эбэтэр фотомонтаж, буолбатах буоллаҕына, пааспар уматааччы, Эн сыыһаҕын (саха тылыгар англия тылыгар курдук биир киһиэхэ Эһиги диэбэттэр)! Пааспарыҥ эргэрбит, болдьоҕо ааспыт да буоллаҕына, ити История буолар! Кырдьар сааскар тиийдэххинэ, мин тылбын өссө өйдүөҕүҥ! Арассыыйа былыргыттан баай устуоруйалаах сувереннай судаарыстыба, онон мантан барбыт эмиграннар хайа да омук буолбуттарын иһин, Арассыыйаҕа төннөр эбэтэр муҥ саатар ыалдьыттыы кэлэр туһунан мэлдьи санааччылар. Онон Арассыыйаҥ пааспара хаһан эмэ эйиэхэ туһалыах кэриҥнээх, өскөтүн эн дьиҥнээх саха буоллаххына. Дьиҥнээх саха, ханнык да уустук кэмҥэ Ийэ дойдутун, Арассыыйаны киргэ-хоххо булкуйбат!

Украина туһунан кылгастык. Сахалиҥҥа мотострелковай пуолкаҕа бииргэ сулууспалаабыт уолум Алексей Коржов, омугунан белорус, 90-с сылларга сэбиэскэй былаас суулла илигинэ полковник буолан, Украинаҕа биригээдэ хамандыырынан ананан барбыта. Кэнники судаарыстыба таһымынан нуучча тыллаах офицердарга сыһыан мөлтөөбүтүттэн сылтаан, уурайан Беларусь өрөспүүбүлүкэтигэр көспүтэ. 2012 сыллаахха Москубаҕа командировкаҕа тиийэ сырыттахпына миигин көрсөөрү Беларусьтан тиийэн кэлбитэ.

Ол көрсүһэрбитигэр кини Украинаҕа Степан Бандера аатынан национализм күүһүрэн эрэрин кэпсээбитэ. Оччолорго Фрунзе аатынан байыаннай академияҕа украинец офицердары кытта бииргэ үөрэммит буоламмын, Алексей Коржов кинилэри ааттаан туран кэпсээбитигэр хайдах эрэ өйбөр кыайан батарбатаҕым. Ол чахчылары Арассыыйа президенэ В.В. Путин олунньу 24 күнүгэр олохтоохторго туһаайыытыгар хатылаабыта. Онно кини Донбасска байыаннай операция туох төрүөттэн саҕаланарын уонна бу өссө 90-с сылларга Украина үрдүкү эшелонын байыаннайдарыттан саҕаламмытын сиһилии кэпсээбитэ.

Маны этэн тураммын, Эн саха буолбатах эбиккин диибин, онон тас дойдуга тиийэн сахалар ааттарыттан Арассыыйа аатын киртитимэ!

Анатолий Игнатьевич Чомчоевастаапкаҕа олорор полковник. 
Кулун тутар 2 күнэ. Дьокуускай к.

Оставить комментарий

Войти с помощью: