Skip to content

АНОНС !!!

Ил Түмэн Бэрэссэдээтэлэ Тааттаҕа үлэлиир

Бүгүҥҥү бэлиэ күн – 1922 сыл олунньу 16 күнүгэр Киин ситэриилээх кэмитиэт (ВЦИК) Президиума Саха Автономнай Сэбиэскэй Социалистическай Өрөспүүбүлүкэни тэрийэр туһунан уурааҕы ыллыммыт күнүгэр – Ил Түмэн спикерэ Алексей Еремеев уонна парламент сис кэмитиэтин бэрэссэдээтэлэ Яков Ефимов Тааттаҕа улуу убайбыт, автономияны төрүттэспит Ойуунускай пааматанньыгар сүгүрүйэн, сибэкки дьөрбөтүн ууран, ахтан-санаан аастылар.

Тэрээһин Ытык Күөл килбэйэр киинигэр турар П.А. Ойуунускай аатынан норуодунай тыйаатыр скверигэр буолла.

Таатта улууһун баһылыга Михаил Соров:

— Быйылгы сылбыт Саха Сиригэр улахан уратылаах. Чаҕылхай ньургун уолаттарбыт Былатыан Ойуунускай, Махсыым Омуоһап, Исиидэр Бараахап, Ыстапаан Ардьакыап уо.д.а. туруорсаннар, туруулаһаннар, автономнай өрөспүүбүлүкэбит олохтоммута.

Бүгүҥҥү историческай суолталаах күҥҥэ Ил Түмэн бэрэстэбиитэллэрэ Ойуунускай пааматынньыгар сылдьан, кэриэстээн ааһаллара эмиэ уопсастыбаннай-бэлитиичэскэй суолталаах. Чахчыта да, биһиги биир дойдулаахпыт Ойуунускай талааннаах суруйааччы, бастакы учуонай,  бастакы бырабыыталыстыба бэрэссэдээтэлэ, Төрүт Сокуону суруйсубут судаарыстыбаннай-бэлитиичэскэй, наука, култуура диэйэтэлэ буоларын таһынан, кини өссө киһи быһыытынан олус хорсун эбит.  Ону 1918 с. Дьокуускайы үрүҥнэртэн босхолооһуҥҥа кыттыбыта да туоһуулар. Маннык чулуу киһи биир дойдулааҕа буоларбытынан киэн туттабыт.

a08996e9 0135 4069 be8f 852cf6dca28e

Ил Түмэн Бэрэссэдээтэлэ Алексей Еремеев:

–Олохтоох салайыныыга дойду үрдүнэн уларыйыылар буолаары турдахтарына, Таатта салалтатын, дьокутааттарын, дьонун-сэргэтин кытта көрсөн кэпсэтэр, олохторун-дьаһахтарын билсэр, кыһалҕаларын истэр соруктаах манна үлэлии кэллибит. Нэһилиэктэринэн сылдьыахпыт, нэһилиэнньэлиин көрсүөхпүт.

Бу сырыыбыт саха дьоно бары тумус туттар Ойуунускайбыт пааматынньыгыттан саҕаламмыта символичнай дии саныыбын. Оруобуна бүгүн 1922 сыллаахха Киин ситэриилээх кэмитиэт (ВЦИК) Президиума Саха АССР тэрийэр туһунан уурааҕы ылыммыта. Бу Ойуунускайдаах, Аммосовтаах, Бараховтаах, Аржаковтаах, Васильевтаах уо.д.а. туруулаһыыларынан ситиһиллибитэ. Онтон ыла бэйэбит сирдээх-уоттаах, тыллаах-култууралаах өрөспүүбүлүкэ буолан олорбуппут 100 сылын туолла.

dc7fe7ac 62c9 4e00 81af 6b0d29050af4

Мин бэйэм М.К. Аммосов дойдутуттан Намтан төрүттээхпин. Ойуунускайдаах Аммосов доҕордоһууларын өрө тутан, 60-с сыллартан Таатта уонна Нам доҕордоһуутун хамсааһына түстэммитэ. Хардарыта элбэх тэрээһин, күрэхтэһии, бэстибээл буолара. Ол үтүө үгэс салҕанан бара туруохтаах. Бу биһиги, орто көлүөнэ дьон, улуу убайдарбытын, устуоруйабытын син билэбит. Саҥа кэнчээри ыччакка үөрэтиэхпитин, тиэрдиэхпитин наада. Ол буолуохтаах биһиги ытык иэспит, сүрүн сорукпут.

Источник

Оставить комментарий

Войти с помощью: