Skip to content

АНОНС !!!

Саха боксера Назар Андреев бүтүн Арассыыйатааҕы турнир кыайыылааҕынан буолла

Саха сирин боксера Назар Андреев Читаҕа буолбут, профессионаллар икки ардыларыгар аан дойду чөмпүйүөнэ, норуоттар икки ардыларынааҕы кылааска успуорт маастара Александр Бахтин аатынан бүтүн Арассыыйатааҕы турнирга кыһыл көмүс мэтээли ылары ситистэ.

 Күрэхтэһии ааспыт нэдиэлэ устатын тухары буолбут уонна өрөбүллэргэ кэлэн, түмүктэммит. 80 киилэҕэ диэри ыйааһыннаах киирсээччилэргэ Саха сирин аатыттан Назар Андреев кыттыбыт. Кини кыһыл көмүс мэтээл иһин киирсиигэ Москуба боксерын Михаил Лебедевы кыайбыт.

«Мин эдэр ыччат Спартакиадатыгар иккис миэстэни ылбытым уонна бу Читаҕа боевай быраактыканы ситиһээри кэллим. Кыайбыппар уонна кыттыбыппар олус үөрдүм. Финалга киирсибит утарсааччым куһаҕана суохтук кииристэ, кинини хаста даҕаны табан, болдьоҕум иннинэ кыайыылаах буолан таҕыстым. Эрдэ Арассыыйаҕа успуорт маастарын нормативын толорбутум, ол эрээри кэккэ биричиинэлэринэн, ити ааты миэхэ иҥэрбэтэхтэрэ, оттон билигин табыллар ини. Мин сүрүн соругум – буоксалаһыы, күһүн Читаҕа Арассыыйа чөмпүйэнээтэ буолуоҕа, онно бэлэмнэниэм», – диэн Назар Андреев санаатын ЯСИА саайка үллэстэр.

Маны таһынан, саха боксердара Ярослав Алексеев 51 киилэҕэ диэри уонна Арчын Пустоляков 67 киилэҕэ диэри ыйааһыннаахтарга киирсэн, боруонса мэтээлин ыларга ситистилэр.

Оставить комментарий

Войти с помощью: