Skip to content

АНОНС !!!

Кириэстээххэ 120 миэстэлээх таас оскуола олунньуга үлэҕэ киириэхтээх

Кириэстээх оскуолата биллэ эргэрбитин туһунан нууччалыы да сахалыы балачча суруйан турабын.

Бу оскуола 1978 сыллаахха элбэх итэҕэстээх-быһаҕастаах тутуллубута. Сарайынан садырыын, самыыр уулара бөлүөхсэллэриттэн тэстэн, элбэхтик эрэйдээн турар. Аны, кыһын дьиэ истиэнэтинэн хахсаат салгын үрэн, оҕолор тымныйаллар.

Оскуола дириэксийэтэ, Кириэстээх нэһилиэгин былааһа дьаныардаахтык туруорсан, бу тутуу саҕаланарын ситиспиттэрэ. Бу оскуола тутуута Сунтаар улууһун бүддьүөтүттэн, «АЛРОСА» дивиденын суотугар дьэндэтилиннэ.

Оскуоланы тутууга «Форс» ХЭТ (А.Яковлев) ылсыста. Сыбаайатыттан тутуу ис бараанын үлэлэригэр тиийэ олохтоох саха уолаттара дьарыктаннылар. Сахалар таас дьиэни тутууга тыыппалаахтарын көрдөрдүлэр.

Кириэстээх нэһилиэгин дьаһалтатын баһылыгын солбуйааччыта Алексей Корякин «Кыым.ру» Мииринэйдээҕи кэрэспэдьиэнигэр иһитиннэрбитинэн, саҥа оскуола олунньуга үлэҕэ киирэрэ былааннанар.

Станислав Алексеев. Мииринэй куората. «Крестях News» инстагыраамын хаартыскатыгар оскуола тутуута

Оставить комментарий

Войти с помощью: