Skip to content

АНОНС

Открылся   YouTube канал Тубсааны 

Уу баабырын сылыттан тугу күүтэбит?

Өбүгэлэрбитигэр “инникини тымтыктанан көрбүт суох” диэн уос номоҕо баар эрээри, биккэ-билгэҕэ, сэрэбиэйгэ итэҕэйэллэрэ. Сэрэбиэйдэнэн бүтэн баран сэрэнэ соҕус “Дьэ, доҕоттоор, сыл оннук буолар эбит” дэһэн бэйэлэригэр түмүк оҥостоллоро, инникилэрин сылыктыыллара. Аны олохпут сайдан, интэриниэт ситимигэр киирэн, күн көрөр-көрбөт билгэтин, сэрэбиэйин барытын ааҕа-билэ олоробут. Туһанааччы – туһанар, сэҥээрбэт – сэҥээрбэт.
Уу Баабыра хаһаайыннаах саҥа 2022 сылга үктэнээри туран инникибитин сылыктаан көрүөх. Сулустар сипсиэрдэрэ тугу кэпсиирий?

 

Козерог

(ахсынньы 22 к. – тохсунньу 20 к.)

Үүнэр сылга (бүтэһик икки сылга курдук) эһиэхэ Плутон күүскэ са­быдыаллыаҕа. Плутон эниэргийэ бөҕө­түн биэриэҕэ, эһиил хаһааҥҥытааҕар да күүһүрүөххүт-уоҕуруоххут. Кэлэр сылга олоххутун саҥа таһымҥа таһаарарга дьулуһуҥ. Идиэйэлээх дьон тоҕоостоох кэм кэллэ дии санаатаргыт эрэ ону мүччү тутумаҥ. Оттон тугу да ситиспэккэ, тыал хайа диэки үрбүтүнэн сылдьабыт диэн сананар дьон, санааҕытын төрүт түһэримэҥ. Плутон хайа да бэйэлээх Козерогу үөһэ ороон таһаарыаҕа.

Тохсунньу-муус устар уонна сэтинньи-ахсынньы ыйдарга тулалыыр эйгэҕитин, дьону кытта сыһыаҥҥытын бөҕөргөтөргө кыһаллыҥ. Ыам, алтынньы ыйдарга олох-дьаһах, дьиэ-уот боппуруоһун быһаарарга табыгастаах кэм. Манна соһуччу үөрүүлээх түгэннэр баар буолуохтара.

Ол эрээри, хомойуох иһин, Уу Баабыра үчүгэйинэн эрэ даҕалыыр, аһара аһыныгас диэн өйдөөмөҥ, өрө барымаҥ. Кэлэр сылга үтүө уларыйыылар бары кириисис нөҥүө ситиһиллиэхтэрэ. Сыл бүтүүтүгэр уларыйыаххыт, атын өйдөөх-санаалаах, толкуйдаах дьон буолуоххут.

Күрүлгэн

(тохсунньу 21 к. – олунньу 18 к.)

2022 cыл күрүлгэннэргэ олох-дьаһах боппуруостарын быһаарарга ананыаҕа. Сатурн күүһэ баһылыыр буолан, барытыгар эппиэтинэстээхтик сыһыаннаһыҥ. Кэлэр сылга “баҕарабын” диэн тылы умнаргыт ордук. “Баҕарабын” диэн тылы “наада” диэн тылынан солбуйуҥ. Холобур, ”быйыл саҥа дьиэ атыылаһыахпын баҕарабын” диэн оннугар “быйыл саҥа дьиэ атыылаһарым наада” диэн.

Үүнэр сыл Күрүлгэннэри олоххо төһө сиппиттэрин-хоппуттарын, тирэхтээхтэрин тургутан көрүө: дуоһунаскытын үрдэтиэ, үлэҕитин элбэтиэ эбэтэр кими эрэ иитимньи гына ыытыа. Сорох тү­гэҥҥэ бириэмэ тохтоон хаалбыкка дылы буолуоҕа. Эһиги онтон төрүт куттанымаҥ: тохтоон-иһийэн, туланы иһиллэнэр эмиэ наада.

Былааннаргыт харчы боппуруоһугар кэлэн иҥниэхтэрэ. Ол иһин былааны олоххо киллэрэри буолбакка, маҥнай харчыны хайдах булары толкуйдааҥ. Долгуйумаҥ, тохсунньу, муус устар, сэтинньи – харчыга табыгастаах ыйдар. Ыам ыйыгар олоххутугар улахан суолталаах киһини кытта көрсүөххүтүн сөп. Дьахтар, эр киһи диэн буолбакка, баҕар – доҕор, баҕар – саҥа кэллиэгэ. Кинилэр эһиги олоххутугар саҥа хамсааһыны киллэриэхтэрэ.

Балыктар

(олунньу 19 к. – кулун тутар 20 к.)

2022 cыл – эһиги сылгыт! Муус устарга, сэтинньигэ, ахсынньыга ситиһии планетата – Юпитер – айанныа. Үлэҕэ, үөрэх­хэ таһымҥытын үрдэтиэ, бэйэни сайын­нарарга саҥа уларыйыылары киллэриэ.

Бэйэни көрдөрөргө олус табыгастаах сыл: карьера оҥостуҥ, бэлитиикэҕэ ылсыҥ, ыллааҥ-туойуҥ даҕаны. Барыта табыллыаҕа. Кэлиҥҥи сылларга мэлдьи дьоҥҥут туһугар олорбут эбит буоллаххытына, эһиил бэйэҕитин өрө тутуоххут, санааҕытын сааһыланыаххыт. Олус баҕарбыт, бэрт өр кэмҥэ ыра оҥостубут улахан атыы-тутуу баар буолуоҕа. Олунньуга үлэлээбит үлэҕит хайаан да хардалаах буолуоҕа. Муус устарга ускуустуба дьоно, фотографтар, айар куттаахтар күннүөхтэрэ-күөнэхтиэхтэрэ.

Ыам ыйыттан алтынньыга диэри сөпкө дьаһаннаххытына, хамнаскыт, дохуоккут биллэ үрдүөн сөп. Сылы эргиччи “иннэ үрдүгэр” сылдьыбыт эбит буоллаххытына, сыл бүтүүтүгэр иһийии күүтэр.

Хой

(кулун тутар 21 к. – муус устар 19 к.)

Таһаарыылаах сыл күүтэр. Сыл маҥ­найгы икки ыйа – чуумпу. Сулустар этэллэринэн, бу кэмҥэ былааны оҥостор табыгастаах. Ааспыт сылга күннээҕинэн, холобур, “бүгүн тугу аһыыбын?”, “сарсын тугу атыылаһабыный?” диэнинэн былааннанан олорбут эбит буоллаххытына, кэлэр сылга киэҥник толкуйдааҥ.

Кулун тутар 20 к. муус устар 20 к. диэри чуумпуран-иһийэн олорбуккут ханна да суох буолуоҕа: сылгыт саамай киириилэх-тахсыылаах кэмэ буолуоҕа. Тоҕо диэтэххэ, Күн эһиги диэки хайыһар. Бу кэмҥэ хаһааҥҥытааҕар да күүс-уох эбиллиэҕэ. Ити ыйдарга үчүгэйдик хамсаннаххытына, ыам ыйын бүтүүтүгэр ситиһии кэлиэҕэ. Атырдьах ыйыттан алтынньыга диэри тугу үлэлии сылдьаҕыт да ону салҕааҥ. Саҥаҕа ойумаҥ, ол көдьүүһэ суох буолуоҕа. Сэтинньи, ахсынньы ыйдарга чуумпуруоххут. Үүнэр сылга бэлэмнэниэххит, күүскүтүн-уоххутун мунньуоххут. 2023 сыл эмиэ бэрт сэргэх буолара күүтүллэр.

Оҕус

(муус устар 20 к. – ыам ыйа 20 к.)

2021 сылга курдук эһиил эһиги сүрүн планетаҕыт – Уран. Сулустар этэллэринэн, 2022 сыл улахан уларыйыыны, соһуччу түгэни бэлэмнээн олорор. Бэйэҕитигэр эрэллээх, кимтэн да тутулуга суох буоларгыт ордук. Атын дьонтон тирэх көрдүү сатаамаҥ: ким да эһиэхэ “наадыйарыҥ бу баар” диэн бэлэмнээн биэриэ суоҕа. Онон мэлдьи тугу эмэ үлэлии, сүүрэ-көтө сырыттаххытына табыллар.

Дьолго, 2022 сылга Уран-Сатурн “түөрт муннуга” суох. Онон куһаҕан түгэннэр, уустуктар суох буолуохтара. Үлэҕит-хамнаскыт, түбүккүт барыта инникигит туһугар оҥоһуллуо, кэскиллээх буолуо.

Саамай табыгастаах ыйгыт – олунньу. Наадалаах кэмҥэ, сиргэ бэйэҕит да билбэккитинэн баар буолан хаалыаххыт. Онтон үөрүөххүт-астыныаххыт. Арай атырдьах ыйыгар кыра оһол, айан-сырыы өттүгэр мэһэй көстөр. Сүрүнэ сэрэхтээхтик сылдьыҥ, онтон атыҥҥа долгуйумаҥ.

Игирэлэр

(ыам ыйа 21 к. – бэс ыйа 21 к.)

2022 сылга үлэҕэ-хамнаска, урбааҥҥа уонна уопсастыбаннай олоххо табыллыы күүтэр. Итилэр улахан үбү аҕалыа суохтара эрээри дьоҥҥо аптарытыаккытын үрдэтиэхтэрэ. Хайҕал-махтал тылларын этэр киһи элбиэҕэ, дуоһунаскыт үрдүөн, наҕараада бэриллиэн сөп.

Ыам ыйыттан алтынньыга диэри дьон ортотугар буола сатааҥ. Кинилэртэн күүһү-уоҕу, элбэх идиэйэни ылыаххыт. Бу кэмҥэ тас дойдуга тахса сатаамаҥ. Куттал көстүбэт эрээри, үп-харчы өттүгэр ыктарыаххытын сөп. Кыра наадаҕа “ээ, төлөнүллүө буоллаҕа” диэн кирэдьииккэ кииримэҥ: өр соһуллар чинчилээх.

Интэриниэккэ элбэх бириэмэҕитин барыаххыт. Сыстаҕас дьон бу эйгэҕэ эбии харчы киллэрэргэ үлэлэһиҥ. Табыллыа.

Тохсунньу, ыам ыйа, балаҕан ыйа “ретрограднай” буолуохтара. “Ретрограднай” диэн тылтан куттанымаҥ. Күүс-сэниэ өттүнэн биллэр-биллибэттик мөлтөөн ылыаххыт эрээри, өйгүт күүһэ, толкуйдуур дьо­ҕур­гут, төттөрүтүн, улаатан, сытыырхайан биэриэҕэ. Быһатын эттэххэ, наадалаах кэм уонна сыл.

Араак

(бэс ыйа 22 к. – от ыйа 22 к.)

Кэлэр сылга олоххутугар дуохубунай уонна материальнай суолтаны тэҥинэн ууруоххут. Тохсунньу-муус устар, сэтинньи-ахсынньы кэмнэргэ барыны-бары билиэх-көрүөх баҕаҕыт күүһүрүө. Ол сылдьан аһара хамсанан кэбиһэн күүскүтүн-уоххутун барыаххыт. Онон үчүгэйдик толкуйдаан баран дьыалаҕа ылсыҥ. Сорох түгэҥҥэ “умайары”, идиэйэнэн оргуйары, дьэ, сөбүлүүр дьоҥ­ҥут.

Ыам ыйыттан алтынньыга диэри дьыалабыай кэпсэтиилэр табыллыахтара. Дьыалабыай диэн буолла эрэ паапка кыбына-кыбына хаамары өйдөөмөҥ. Дьиэ-уот, үлэ-үөрэх боппуруоһун быһаарсыы, атыы-тутуу, ол барыта “дьылабыай” кэпсэтиигэ киирсэр.

Ыам ыйыгар, атырдьах ыйыгар тапталлааххытын кытта сыһыаҥҥыт тупсуо. Кинилэр эһиги олоххутугар баалларыгар олус махтаныаххыт. Ону биллэриҥ: тылынан этиҥ, сыллааҥ-уурааҥ, кыһамньылаах, харыстабыллаах буолуҥ. Сыл бүтүүтэ өйгүт-санааҕыт сааһыланан чэпчээбиккэ дылы буолуоххут.

Хахай

(от ыйа 23 к. – атырдьах ыйа 22 к.)

Кистэлэҥнээх, дохсун сүүрүктээх сыл күүтэр. Кимиэхэ эрэ тугу этэ дуу, дакаастыы дуу сатыаххыт. Ону аахайбаттарыттан кыыһырыах-кыйаханыах санааҕыт кэлиэҕэ. Онно төрүт кыһаллыбат баҕайыта: олорбуккут курдук олоруҥ, үлэлээбиккит курдук үлэлээҥ.

Сыал-сорук туруорунаргытын сөбү­лүүгүт эрээри сатархай соҕус буолар. Эһиил бииртэн-бииргэ көтүөккэлээмэҥ, дуоспуруннаах буолуҥ. Харчы кыһалҕата кыһарыйыа суоҕа. Хата, төттөрүтүн, кимтэн эрэ харчы “босхо” харчы кэлэр түгэнэ тосхойуо. Үп-харчы өттүгэр табыллар ыйгыт – олунньу.

От, атырдьах ыйдарыгар айан көстөр. Айанныыр түгэн көһүннэр эрэ аккаастанымаҥ. Доруобуйаҕыт этэҥҥэ эрээри, көрдөрүнэ сылдьыҥ. Чугас дьоҥҥутун кытта кыра өйдөспөт түгэннэр тахсыахтара эрээри, сыһыаҥҥыт үчүгэй. Уу Баабыра эһиэхэ туох да куһаҕана суох үчүгэй сылы бэлэмнээн олорор.

Кыыс

(атырдьах ыйа 23 к. –

балаҕан ыйа 22 к.)

Ситиһии, табыллыы атын дьон нөҥүө кэлиэҕэ. Онон тулалыыр дьоҥҥутугар харыстабыллаах сыһыаннаах буолуҥ. Кыра аайы аахсымаҥ, кыыһырсымаҥ.

Олунньу ыйга билсиһии көстөр. Билсиһэр дьоҥҥутун үчүгэйдик үөрэтиҥ, тута аһылла охсумаҥ. Албын-көлдьүҥ майгылаах дьон түбэһиэн сөп. Уопсайынан, эһиги атын дьонтон олус тутулуктанар эбиккит. Оннук сыһыантан босхолоно үөрэниҥ.

Тохсунньуга, ыам ыйыгар, балаҕан ыйыгар иһийии буолуоҕа. Туох да хамсаан, иннин диэки баран испэт диэн санааҕыт түһүөн сөп. Бу кэм эһиэхэ, төттөрүтүн, үчүгэйдик сабыдыаллыыр. Үлэ-хамнас, олох-дьаһах этэҥҥэ. Доруобуйа эмиэ кэминэн.

Ыйааһын

(балаҕан ыйа 23 к. – алтынньы 23 к.)

Тохсунньу, муус устар уонна сэтинньи, ахсынньы ыйдарга урбааннаах дьоҥҥо табыгастаах. Эбии филиал аһыаххытын, өҥөҕүт көрүҥүн элбэтиэххитин сөп. Үлэтэ суох дьон үлэ булар үөрүүгэ тиксиэххит. Табыллар ыйгыт – олунньу.

Соҕотох ыйааһыннар аналгытын көр­сүөх­хүт. Онно-манна баран-кэлэн, кэпсэтэн-ипсэтэн көрдүү сатаамаҥ, таптал бэйэтэ булуоҕа. Дьиэ кэргэҥҥэ сыһыан – уу нуһараҥ. Айдаарсыы, өйдөспөт буолуу көстүбэт. Ол оннугар бииргэ үлэлиир дьоҥҥутун кытта күрэстэһэ, бэрт былдьаһа сатыаххыт. Ким даҕаны кыайыылаах тахсыа суоҕа, ол иһин айдааны күөртээбэккит ордук.

Эдэр ыаллары эбиллии күүтэр. Дьиэ-уот боппуруоһун этэр буоллахха, барыта олус чэпчэки буолбат чинчилээх. Үрдүк %-наах ипэтиэкэҕэ киирэн хаалыаххытын эбэтэр өрөмүөҥҥүт уһуон-тэнийиэн сөп. Онон бу дьыалаҕа хара маҥнайгыттан сыаллаахтык-соруктаахтык ылсыҥ.

Эбии дьарыктаах буолуҥ. Үүнэр сылга онтугут таһаарыылаах буолуоҕа, үп киллэриэҕэ.

Скорпион

(алтынньы 24 к. – сэтинньи 22 к.)

Уу Баабыра хайааһыннаах 2022 сыл түһүүлээх-тахсыылаах буолуоҕа. Эһиил түөрт “күн өлүүтэ” күүтэр. Ханнык эрэ ыйдарга ат өрөҕөтүгэр буолуоххут, ханныктарга эрэ – ат уорҕатыгар. Онно бэлэм буолуҥ.

Улахан уларыйыылар күүтэллэр. Олорго табыллыаххытын баҕарар буоллаххытына, бэйэҕит ис күүскүтүгэр (интуицияҕытыгар) эрэниҥ. Эһиги интуицияҕыт күүскэ сайдыбыт. Үгүс түгэҥҥэ сөптөөх суолга сирдиир.

Аһара былаанынан олорор эбиккит. Дьолу “ыраах дьааһыкка уган” кэбиһимэҥ. Дьол аттыгытыгар баарын умнумаҥ. Сыл иккис аҥаарыгар уохтаах таптал, билсиһии, айар үлэҕэ оройунан умса түһүү күүтэр. Бэл, оннооҕор тэхиниичэскэй идэлээх скорпионнар айар куттара уһуктан, айыах-тутуох баҕалара тулуппат буолуоҕа.

Быһатын эттэххэ, кэккэ уустуктардаах сыл. Ол уустуктар хайдах быһаарыллаллара – бэйэҕититтэн эрэ тутулуктаах. Ханнык да түгэҥҥэ санааҕытын түһэримэҥ!

Охчут

(сэтинньи 23 к. – ахсынньы 21 к.)

Күннээҕи биир күдьүс олохтон, тугу эрэ ситиһэ сатыыргытыттан сылайбыккыт. Бэйэҕит да ону билэҕит. Кэлэр 2022 сыл олоҕу уларытарга бэрт сыл.

Үчүгэй идиэйэ киирдэҕинэ, ону ту­ту­­һуҥ. Олоххо киириэр диэри төрүт ыһыктымаҥ. Наадалаах сыалы-соругу ситиһэргэ кыра өһөс буолар туох да куһаҕана суох. Айан-сырыы баар. Атын куоракка, тас дойдуга көһүү да көстөр. Ол барыта бэйэҕититтэн тутулуктаах.

Үлэҕитин уларытаргытыттан куттанымаҥ. Бэйэ дьыалатынан дьарыгырдаххытына, табыллыыһыккыт. Биир өттүнэн ыллахха, халбархай соҕус эрээри, иккис өттүнэн – харчыны киллэрииһи. Сынньанары сатааҥ. Кэмиттэн-кэмигэр бэйэҕитин иһиллэниҥ.

Чугас дьоҥҥутун кытта сыһыан үчүгэй. Кыра тулуур эрэйиллэр. Юпитер Күнү уонна Венераны кытта холбоһор кэмигэр – кулун тутар уонна муус устар ыйдарга – табыллыы кэлииһи. Олунньу 14-22 күннэригэр соһуччу үөрүүлээх түгэн тосхойуо. Оттон муус устар 8-17 күннэригэр сэрэхтээх буолуҥ: өйгүт-санааҕыт бутуллан ылыан сөп. Ол тус олоххутун оҥосторгутугар, сыалгытын ситиһэргитигэр мэһэйдиэ.

 

 

Кутуйах

Баабыр сыла олус судургута да суох буоллар, сэрэх муҥутаан, кутуйах обургу бэркэ диэн бэйэтин миэстэтин булунан сылдьыаҕа. Тиигири кытта доҕордуулар дииллэр эбит. Буолар быһыыны-майгыны бэйэтин туһатыгар эргитэн тэйиэҕэ. Быһата, Кутуйах бэлиэлээхтэргэ олох бары эйгэтигэр эһиэхэ астык сыл буолсу. Арай ыал буола илик, сулумах кутуйахтар хардата суох уоттаах тапталга ылларар кыахтара балай эмэ. Ол оннугар үүнэргэ-сайдарга туох да ааттаах кэм. Хас да бырайыакка тэҥинэн ылсар кыахтааххыт. Соҕотох – буойун буолбатаҕын өйдөөҥ. Дириҥ толкуйдаах партнердары булунуҥ, оччотугар бигэ өйөбүллээх буолуоххут. Карьера да тупсар чинчилээх, дохуоккут да улаатыыһы. Идэҕэ таһымҥытын үрдэтиэххит. Үгүскүт тус олоҕор эмиэ табыллыыһы. Быһата, үчүгэй уларыйыылаах сыл күүтэр.

Оҕус

Эһиги да үрдүгүтүнэн күн үөһэнэн күөрэйэр үтүөкэн сыла үүммүт! Былааҥҥыт туолар кыаҕа бэрт улахан. Хайаҕыт эрэ дьиэ, олорор сир боппуруоһун бэркэ быһаарыыһы. Ыал буолааччыларга бэртээхэй сыл. Баабыр сылыгар холбоспуттары уһун, дьоллоох олох күүтэр. Сонун иэйии, мүччүргэннээх, үтүө түмүктээх түгэн эрэ элбэх. Үп-харчы балаһыанньатын тупсарар туруктаныаххыт. Туохха да ылсыбыккыт иһин, барыта да кэскиллээх, ситиһиилээх буолуоҕа. Үлэһит, дьаныардаах дьону Баабыр биһириир уонна үтүө хараҕын хатыыр. Сорох астрологтар Оҕуһу Баабырга күрэстэһээччи диэн ааттаан, туох да үчүгэйэ суох сыл дииллэр. Чуолаан, үп өттүгэр. Дьэ, хайалара сөпкө сылыктаабытын сыл бэйэтэ көрдөрүө.

Баабыр

Сыл хаһаайыннара диэх курдук, эһиги, Тиигирдэр, ыра санааҕыт туолар чинчилээх. Онуоха баар кыаххытын, бары сатабылгытын көрдөрүөххүтүн, туохтан да толлубакка харса суох иннин диэки баран иһиэххитин эрэ наада. Болҕомто киинигэр сылдьар кыах толору бэриллиэ. Ону туһанан карьераҕытын оҥосторго, күрэстэһээччилэргитин кэннигитигэр хаалларарга дьулуһуҥ. Хайаан да бэйэҕитин көрдөрүҥ. Бэйэҕит биллэ-көстө, аатыра да сатаабатаххыт үрдүнэн сиэрдээх билиниини, убаастабылы ылар кэмҥит кэллэ. Оттон эдэр баабырдар үөрэнэргэ табыгастаах сири таба тайаныаххыт. Кимиэхэ эрэ нэһилиэстибэ боппуруоһа бэркэ быһаарыллыа.

Куобах

Ураты, умнуллубат сыл эһиэхэ буолуоҕа. Эһигини өй-санаа уларыйыыта күүтэр. Олоххутун 180 кыраадыс уларытар сонуну иһиттэххитинэ да, соһуйаайаҕыт. Сүрүнэ, балаһыанньаны ылынан, холкутуйаргыт уонна боппуруостар үөскээтэхтэрин аайы аймаммакка, быһааран иһэргэ кыһаныҥ. Сонун (креативнай) сыһыан, толкуй туһалыа. Кыралаан тургутан көрөр курдук түгэн да баар буоллаҕына, дьикти талааҥҥыт, ураты күүскүт эмискэ арыллан, бэл, бэйэҕит да үөрүөххүт, соһуйуоххут. Баабыр сыла эһиэхэ тыын суолталаах быһаарыыны ылынарга сөптөөх тоҕооһу уунуо. Ол эрээри соҕотоҕун эрэ туруулаһардааҕар күүстээх, кыахтаах санаалаах дьону бэйэҕитигэр тардан, тирэх оҥосторгут ордук. Сүҥкэн уларыйыылары таһынан бэйэҕитигэр, дьиэ кэргэҥҥитигэр дьоллоох уонна тутаах суолталаах түгэннэр баар буолуохтара.

Луо

Баабыр сыла олоххутун тосту уларытар чинчилээх. Онно сөптөөх күүс-күдэх ирдэниэ. Онон сөбүгэр сынньана, доруобуйаны көрүнэ, туругу тупсарына түһүөххүтүн наада. Дьиэ-уот, массыына ылынарга анаан, инбэстииссийэ угуоххутун сөп. Киириилээх-тахсыылаах дьоҥҥут. Баабыр сылыгар, бэл, миграциялыыр туһунан толкуйданыах курдук. Ол эрээри хайаан да ыллыктаахтык толкуйданыҥ, барытын ыараҥнатан-ырытан көрүҥ. Уларыйыыга сананнаххытына, букатын саҥаттан саҕалыыр, төрдүттэн уларыйар гына дьаһанаргыт ирдэниэ. Үчүгэйдик толкуйданыҥ, доруобуйаҕытыгар болҕомтолоох буолары умнумаҥ. Үп чааһыгар сыл иккис аҥаарыгар ордук табыллыаххыт. Латырыайаҕа сүүйэр кыах балай эмэ диэбиттэр.

Моҕой

Бүөмнээн, холкутуйан олорон, өй үлэтинэн дьарыктанарга сананыаххыт. Ол – мээнэҕэ буолбатах. Кэлэр сыл дьиссэртээссийэ, кинигэ, билимҥэ манагыраапыйа суруйарга бэрт табыгастаах, тоҕоостоох. Ыраас лиистэн саҕалыыртан, улахан, сыралаах үлэттэн чаҕыйымаҥ. Урукку өттүгэр кыайан булбатах иһитиннэриигитин таба тайанар кыахтааххыт. Оттон ким билиилээх – аан дойдуну баһылыыр кыахтаах. Ис таайан көрөр кыаххытын туһаныҥ. Биллэр-көстөр кыах хаһааҥҥытааҕар да улахан. Куһаҕан дьаллыктан тэйэн, успуордунан дьарыктаныҥ, дийиэтэни тутуһуҥ.

Баабыр Моҕойу кытта өстөөх тэҥэ. Онон иирсээҥҥэ кыбыллыбаккыт ордук. Доруобуйа­ҕытыгар, дьарҕа буолбут ыарыыгытыгар бол­ҕомтолоох буолуҥ.

Сылгы

Быһыы-майгы кыл түгэнэ түргэнник уларыйар сыла. Иһитиннэрии эгэлгэтэ субуллан олоруо. Сонун идиэйэ дэлэй, саҥа бырайыагы саҕалыырга күүс-күдэх да баар буолуо. Олох сүр тэтимнээхтик уларыйарын өйдүөххүт. Үрдүк дуоһунаска көһөр кыах көстөр. Ол быһаарыныыны кэтэмэҕэйдэммэккэ ылыныҥ. Саҥа бырайыаккыт үрдүк ситиһиилээх буолуо. Ааспытынан олорумаҥ, харса суох хардыылаан иһиҥ. Тус олоххо соһуччу үөрүү (сюрприз) баар буолуон сөп. Сулумахтарга үтүө хараҕын хатааччы, сэргээччи элбиэ. Оҕолоргут эбэтэр саҥа дьыалаҕыт үтүмэн үөрүү иэйиитин бэлэхтиэ. Быһата, табыллар сылгыт иһэр. Сүрүнэ, хорсун, көхтөөх буолуҥ, чаҕыйбакка ылсан иһиҥ.

Баабырдыын доҕордуу бэлиэлээххит. Онон ситиһиилээх сыл күүтэр. Араас күрэххэ, күөн көрсүһүүлэргэ кыайыы эһиги диэки буолар чинчилээх.

Коза

Олоххут биир түһүмэҕэ бүтэн, саҥаттан төрөөбүт курдук буолаҕыт. Итиннэ үөрэҕи бүтэрии, саҥа үлэҕэ көһүү, социальнай статуһу уларытыы, ийэ-аҕа буолуу ыал буолуу, арахсыы, бэйэ дьыалатын арыныы, биэнсийэҕэ тахсыы, эбэтэр урут сылдьыбатах сиргитигэр айан киирсиэн сөп. Сөптөөх түмүгү оҥостон, кэлэр өттүгэр алҕаһы оҥорбот гына, сөпкө дьаһана үөрэниҥ. Блог, ханаал астарга, ролик устарга олус табыгастаах кэм. Интэриниэккэ чугаһаан, үүнүҥ-сайдыҥ. Уларыйыы эһиги чугас дьоҥҥутун эмиэ таарыйыа. Олоххут суолугар дьайыылаах, уопуттаах уонна кэпсэтинньэҥ эр киһи көстөр. Элбэх дьоннуун алтыһыы бэйэ ыйытыгар хоруйу буларга, чопчу сыалы быһаарынарга, саҥа дабааннары туоруурга көмөлөһүө.

Баабыр Козаҕа өһө суох. Уу нуурал сыл буолуо. Ол эрээри, тоҕо эрэ кыбартыыра, массыына атыылаһартан туттунуҥ диэбиттэр.

Эбисийээнэ

Мүччүргэннээх сырыынан баай сыл буолсу. Ол гынан баран, сыл саҕаланыыта чуумпуран, маассабай миитин, пикет курдук тэрээһиннэртэн олох тэйэ туттаргыт ордук. Гражданскай иэһи толорор уххан улахан да түгэнигэр, бэйэ бодоҕун тардынан, көрөөччү быһыытынан кирийэн сыппытыҥ көнө. Айылҕаттан бэриллибит киитэрэйгин туһанан, тулалыыр эйгэ настарыанньатын быһа сэрэйэн, бэйэҕэ табыгастааҕы сүмэн ыларыҥ туһалыа. Туохха эмэ ылсыаҥ иннинэ ымпыгар-чымпыгар диэри толкуйдаа. Саҥа үлэҕэ, барыстаах дьыалаҕа ылсар санааҥ күүстээх. Күннээҕи кыһалҕаны быһаарарга сөптөөх күүс-күдэх баар. Сөпкө дьаһаннаххына, дохуотуҥ үрдүүр кыахтаах. Икки дьыаланан тэҥинэн дьарыктанар наадата тириэн сөп. Толлума, кыаныаҥ.

Баабыр Эбисийээнэни биһирээбэт. Онон үлэни, олорор сири уонна партнеру уларыппат буола сатааҥ. Күрэхтэргэ кыайтарар кыах улахан.

Бөтүүк

Сэрэнэн-сэрбэнэн дьаһан, сыыһа, уолҕамчы быһаарыыны ылынан, кэмсинэ-ытана сылдьыбат гына. Тугу истэргин барытын ыраас мууска ылынан иһимэ, толкуйдуур-торумнуур куолу. Тыын суолталаах боппуруостарга эрэнэр дьоҥҥуттан сүбэлэтэ-амалата сырыт. Буолбуту, ааспыты барытын умнар, буортулаах толкуйтан ыраастанар сыл. Саҥа таһымҥа тахсар инниттэн ментальнай да физическэй да өттүнэн туһата суоҕу барытын суох гыныахтааххын. Эйигин үөрдүбэт буолбут эргэ таҥаһы, тэрили бырах. Ол тэҥэ тулалыыр дьоҥҥун эмиэ болҕойон көр. Мөкү тиэмэлэртэн, хоптон-сиптэн тэйиччи тутун. Болҕомтону үтүө өрүккэ, сырдыкка уур. Эти-сиини чинчийтэрэргэ үчүгэй кэм. Интэриниэтинэн тас дойду дьонун кытта үлэлэһэр баҕалааххын. Айан туһунан эмиэ толкуйдуугун. Ол эрээри, сэрэхтээх буол. Ис кыаххар харыстаан сыһыаннастаххына, сылы холкутук уонна этэҥҥэ аһарыаҥ.

Баабыр Бөтүүккэ өһө суох. Ол да буоллар, олус болҕомтону тарда сатаама, айдаантан-куйдаантан тэйиччи тутун. Үлэни хааччыйар киһигин кытта кыыһырсар түгэн күөрэйиэн сөп. Оһолтон сэрэн.

Ыт

Элбэх интэриэһинэй түгэннэр эйигин күүтэллэр. Уу нуурал олох быыһыгар көхтөнөн-дьэргэйэн туруоҥ, онтуҥ үп-харчы сүүрүгүн арыйыа, барыһы аҕалыа. Кимҥит эрэ саҥаттан суол тэлиэ. Уруккуттан аккаастаныы ыарыыта суох ааһыа. Сынньана таарыйа ыраах айаҥҥа баран аралдьыйан кэлиэххин сөп. Бэйэ ис кыаҕын толору туһанарга олоҕурбут үгэскиттэн тохтоон, күннээҕи дьыалаҕа эппиэтинэстээх буол. Хонтуруолу сымната түс, олоххо эрэллээх буол. Кэлэр сылга улахан үп хамсыыһы, харчыгыт да барбахтыыһы. Ол аата, массыына, дьиэ-уот атыылаһыыта, туһалаах инбэстииссийэ буолуон сөп. Дохуот тиэмэтэ үгүстүк толкуйдатыа, хайдах улаатыннарар туһунан толкуйдан. Оҕолоохтор оҕолоргутуттан сүбэлэтэргит туһалаах буолуо. Кинилэр аныгы уларыйа-тэлэрийэ турар олоххо быдан бэлэмнээхтэр, балык ууга сылдьарыныы үөрүйэхтээхтэр. Таптал, оҕо төрөөһүнэ, үтүө ойоххо түбэһии, ыал байылыат олохтонуута көстөр.

Сибиинньэ

Бу ааспыт сыллар тухары мунньуммут билиигин, уопуккун туһанан, ис-хаан күүскүн олоххо киллэрэр кэмиҥ кэллэ. Саҥаны саҕалыыргар табыгастаах кэм. Тыын суолталаах быһаарыныыны ылыныаҥ иннинэ, ийэҕиттэн-эбэҕиттэн, эбэтэр саастаах, муударай дьахтартан сүбэлэтэриҥ туһалаах буолуоҕа. Ону таһынан сыыйа бэйэҥ эмиэ сүбэһит, дьоҥҥо көмөлөһөөччү өттүнэн биллэн-көстөн барар кыахтааххын. Дьону көҕүлүүр, сөпкө хайысхалыыр, матыыптыыр талааныҥ арыллыа. Баабыр сыла мистиканы, астрологияны, уйулҕаны кытта ыкса сибээстээх. Кистэлэҥ кыаххын саҥа билэн, онно сыһыаннаах билими дириҥэтэн үөрэтэр баҕаҥ уһуктар кыахтаах. Эн кыаххар-көмөҕөр наадыйыахтара. Дуоктар, психолог, астролог идэлээхтэри ситиһии күүтэр. Үп киириитин улаатыннарар, ситиһии сэтиилэнэр туһугар анал идэлээхтэри аттыгар тут, илдьэ сырыт. Баабыр сыла – кэнэҕэһин бигэ туруктаах, табыгастаах дьыаланы астаргар тоҕоостоох кэм. Сибиинньэ сылыгар төрөөбүттэр балыстанар, бырааттанар кыахтара улахан.

 

Сулустар сылыктарын

сурукка тистэ

Диана КЛЕПАНДИНА.

Оставить комментарий

Войти с помощью: