Skip to content

АНОНС !!!

Сэлиэһинэй — олох төрдө

Ньурба оройуонугар бурдугу үүннэриинэн дьарыктаныы Куочай уонна Антоновка дэриэбинэлэрин кэлии бааһынайдарыттан саҕаламмыта. Октябрьскай революция буолуор диэри бурдугу үүннэрии сир-сир аайы тарҕаммыта. Кэлин сиир бурдугу үүннэрии, кэлии бурдук элбээн, симэлийэн хаалбыта. Хаҥалас нэһилиэгэр бурдугу ыһан боруобалаан көрүөххэ диэн бырайыакпытын Саха Автономията тэриллибитэ 100 сылыгар уонна  нэһилиэкпит кырдьаҕас олохтооҕо Марфа Калиновна Иванова 95 сааһыгар анаан суруйбуппут. Кини 16 саастааҕар сэрии кэмигэр оҕуһунан алта төгүл Ньурбаттан Сатаҕа сиир бурдук таспыт, онон аччыктааһынтан Сата дэриэбинэтин олохтоохторун быыһаабыт тугунан да кэмнэммэт үтүөлээх.

Бу бырайыакпытын быйыл саас ыам ыйыгар улуус баһылыгын Граныгар «Сэлиэһинэй – олох төрдө» диэн аатынан кэммиэрчискэйэ суох «Хомус» уопсастыбыннай тэрилтэ иһинэн кыттыһан кыайбыппыт. Бырайыак сыала-соруга аныгы ыччакка, оскуола оҕолоругар хос эһээлэрэ-эбээлэрэ хайдах бурдук ыһан, аһаан олорбуттарын сырдатыы, өбүгэлэрбит умнуллубут дьарыктарын сөргүтэн боруобалаан үүннэрии этэ. Манна кыттыылаахтарынан Н.И. Кочнев аатынан орто оскуола оҕолоро, үлэһиттэрэ, «Сата Уус» түмсүү кыттыылаахтара, «Алгыс» дьахталлар түмсүүлэрэ, В.А. Петрова аатынан кыраайы үөрэтэр түмэл үлэһиттэрэ буоллулар.

Бырайыак чэрчитинэн сэлиэһинэй бурдугу олордорго бэлэмнэнии үлэ ыыппыппыт. М.Г. Сафронов аатынан Дьокуускайдааҕы тыа хаһаайыстыбатын научнай-чинчийэр   институттан «Туймаада» уонна «Приленская» диэн суортаах сэлиэһинэй бурдук сиэмэлэрин атыыласпыппыт.

Ыам ыйын 29 күнүгэр оскуола пришкольнай учаастагыттан сир ылан былыргылыы ньыманан оҕуска булуук состорон, сири таҥастаан, барамньылаан, бурдукпут сиэмэтин бырайыак кыттыылаахтара бары илиинэн ыспыппыт. Бурдук олордуллубутун кэннэ сайын оҕолор сыыс оттоон, уу кутан биэрбиттэрэ. Күһүн атырдьах ыйыгар бурдукпутун быспыппыт.    Бырайыакка көрүллүбүт туттар тэриллэри мэмэһээни, соҕооччуну, соҕоҕу, кэлиини, бурдук куурдары Ариан Васильевич, Борис Николаевич оҥорбуттара.

«Сата» куруһуок оҕолоро бурдугу соҕооччунан сынньан, куолаһыттан арааран ыраастаан суорунаҕа тартылар. Бурдук тардыыта олус сыралаах үлэ буолан биэрдэ.  Уһуннук суорунаны тардан мээккэ бурдук ылан сиидэлээн дьиҥнээх сэлиэһинэй бурдугу ыллыбыт. Оҕолор сылаалаах үлэ эбит диэн салыннылар, былыргы өбүгэлэрин хайдах маннык үлэлээн аһаан олорбуттарай диэн олус аһыннылар, сөхтүлэр.

Ылыллыбыт бурдукпутуттан бөлөнөххө булкуйан дьиҥнээх сэлиэһинэй лэппиэскэтин уонна ынах арыытыгар бурдукпутун ытыйан көмүлүөк оһоххо хобордооххо саламаат оҥордубут. Лэппиэскэбит да, саламааппыт даҕаны ураты үчүгэй сыттаах уонна  амтаннаах буолар эбит.

Бырайыакпыт сыалын ситтэ — бурдук биһиги сирбитигэр иккистээн эргиллэн үүнүөн сөп эбит. Ол инниттэн эрдэттэн сирин үчүгэйдик таҥастаан, сымнатан, күнүн-дьылын куоттарбакка ыһар наадатын уонна кэмигэр быһыыны өйдөөтүбүт.

Биһиэхэ бэйэлэрин сүбэлэринэн-амаларынан элбэхтик көмөлөспүт Дьокуускайдааҕы научнай чинчийэр институт тутаах үлэһитигэр Елена Семеновна Владимироваҕа уонна Ньурба чулуу оҕуруотчутугар Агафья Афанасьевна Тарасоваҕа ис сүрэхтэн махтанабыт.

Бу бырайыакпытын бигэргэтэн эһиилги үөрэх дьылыгар аны орто сүһүөх кылаас оҕолорун кытта үлэлэһиэхпит диэн былаанныыбыт. Сиир бурдугу ылыыга туттубут тэриллэрбитин, Хаҥаластааҕы агрооскуолаҕа таһааран оҕолор, учууталлар, төрөппүттэр көрүүлэригэр ый устата туруоруохпут.

З.В. Анисимова

В.А. Петрова аат. кыраайы үөрэтэр түмэл. Хаҥалас

Оставить комментарий

Войти с помощью: