Skip to content

АНОНС !!!

Мииринэйгэ дьиҥ сахалыы талба астаах чайнойдар, кафелар тоҕо суохтарый?

Мииринэй – Саха сирин муҥутуур улахан, бырамыысалыннастаах оройуона. Аҥаардас бырапыыскалаах дьонун ахсаана 75 тыһыынчаттан тахса. Онно эбэн кэбис уонча тыһыынча бырамыысалыннас баахтатын дьонун, быстах кэмҥэ харчы “өлөрө” кэлбит омук кыраасданнарын.

Манна, сахалар бааллар. Докумуоҥҥа киирэринэн, сэттэ-аҕыс тыһыынча сахалаахпыт. Дьэ бачча киһи амтаннааҕы, чөл аһы аһыыра – тыын боппуруос. Буолаары буолан, маннык чымаан, хоруона хамсыктаах, дьаҥ-хаарчах кэмигэр. Ким үчүгэйдик, иҥэмтиэлээхтик аһыыр – сол ыарыыны-тумууну тулуйар. Оттон төрөөбүт омугуҥ аһа куруутун остуолгар баар буоллаҕына өссө үчүгэй.

Дьэ бу манна, мин биир сытыы боппуруоһу тоһоҕолоон бэлиэтиэхпин баҕарабын. Ону хаһыс да төгүлүн төхтүрүйэн туран бичийэбин. Тоҕо манна, Дьокуускай кэнниттэн иккис суолталаах Мииринэй оройуонугар, саха төрүт аһын үссэнэр дьоҕус чайнойдара, кафелара, хорчуоппалара, дьиэҕэ тириэрдии сулууспалара суохтарый диэн. Ким да манан дьарыктаммат. Даҕатан эттэххэ, алаадьыны бэйэм оҥостунуохпун сөп, быырпаҕы да сатыыбын. Лэппиэскэни да хобордооххо үтээччибин. Собо да атыыга манна баар курдук. Ол эрээри, дьэ туох эрэ тиийбэт доҕоттор. Адьаһын!

Арыылаах буруолу сылдьар саламааты, саҥыйахтаах алаадьыны, сүөгэйдээх лабырык-алаадьыны, саахыматтаах баахыланы, киһи айаҕар ууллар үрүмэни, дьэдьэннээх хайаҕы, иҥиирдээх иэдьэгэйи, чохоону, көбүөрдээх лэппиэскэни, күөрчэҕи, хааны, тыҥа уонна чочунаах начыыҥкалаах сылаас бэрэскини, тоҥ быары, сахалыы лапсалаах хоргуннаах мини, ыстыылыктаах ис минин, үлээҥкини, ургахтаны, судурааннаах үүттээх хойуу чэйи ахтабыт диэччилэр аҕыйаҕа суохтар манна.

Хомойуох иһин, итинник талба ас манна тэнийбэтэх. Маннык ас кэлбэт. Сахалар Мииринэйгэ аһылыгы кытары сыһыаннаах эргиэн-урбаан тэрийэллэрэ хайдах эрэ олус уустук курдук. Оттон ыаллыы омуктар – бүрээттэр куукуналара тоҕо эрэ Мииринэйгэ быдан сайдыылаах. Ханнык да омук куукунатын ырааҕынан баһыйдылар. 35 тыһыынча киһи олорор Мииринэй куоратыгар алта познай кафелара бааллар. Алта(!).

Биэс, дьиэ ааныгар диэри буруолаппытынан аһы тириэрдэр сулууспа баар. Дьон, баншатай, шулен, хушуур, цуйван, борц астары амсайбыттара ыраатта. Мииринэй олохтоохторун үгүс өттө познайдартан атыылаһан аһыыр. Олор кафеларыгар үссэнэр.

Туох да диэ, аһылыктара тотоойу, көрүҥэ –элбэх, минньигэс, сыаната – чэпчэки. Хамсык кэмигэр сүрдээҕин буһуруктаахтык үлэлээтилэр. Маладьыастар эрэ диэхпин баҕарабын.

Станислав Алексеев. Мииринэй куората.

Оставить комментарий

Войти с помощью: