Skip to content

АНОНС

Открылся   YouTube канал Тубсааны 

Саргылана Копырина собо уҥуоҕуттан, тириититтэн тупсаҕай оҥоһуктара

Уһун Күөл бөһүөлэгин “Чуораанчык” оҕо уһуйаанын физкультураҕа инструктора, түөрт оҕо ийэтэ Саргылана Копырина иллэҥ кэмигэр собо балык уҥуоҕун, тириитин ыраастаан, сууйан, хатаран араас кэрэ сувенирдары оҥоруунан дьарыктанар. Бу сувенирдарын кини үксүн оҕо саадыгар, оскуолаҕа ыытыллар куонкурустарга анаан оҥорор эбит.

Соторутааҕыта сахалыы ытарҕаны уонна илин кэбиһэри 50-70 устуука собо хайыҥын уҥуоҕуттан уонна тириитин сүлэн ылан, сууйан, биир суукка хатаран оҥордо. Бу матырыйаалларын барытын аттаран кырыйан, итии килиэйинэн таҥаска сыһыаран тупсаҕай сахалыы симэхтэри оҥорон таһааран, Саргылана Копырина быйыл 4-с төгүлүн улуустааҕы “Оо, собо, собо, барахсан!” куонкуруска маҥнайгы миэстэни ылла.

 

 

Саргылана Копырина маны таһынан ынах муоһуттан “Аан Алахчын Хотун”, “Уукун Күөх Боллох”, “Собо балык”, “Мамонт”, “Ил Дархан”, о.д.а. киһи хараҕа сымныыр, көрөн үөрэр сувенирдарынан өрөспүүбүлүкэтээҕи Арчы дьиэтэ тэрийэн ыытар уус-уран оҥоһуктар куонкурустарыгар эмиэ ситиһиилээхтик кыттан, ааспыт сылга 1-кы үрдэли ылбыт.

 

 

Оттон быйыл күһүн “Битва теплиц” диэн өрөспүүбүлүкэтээҕи кэтэхтэн куонкуруска кыттан, 83 кыттааччыттан бастакы миэстэни ылан үөрүүтэ үрдээбит.

 

 

Бу курдук, барыга бары дэгиттэр ийэ, биһиги хаһыаппытыгар хаста да сырдатыллыбыт Саргылана Копырина дьонун-сэргэтин кэрэҕэ тардан, үлэни, дьиэ кэргэни, сатабылы дьүөрэлиир бастыҥ хаһаайка быһыытынан өрүү кэрэхсэнэ, холобур буола турарыгар баҕарабыт.

Источник

Оставить комментарий

Войти с помощью: