Skip to content

АНОНС

Открылся   YouTube канал Тубсааны 

Дьохсоҕоннор Алампа сүдү аатыгар сүгүрүйэллэр

Өксөкүлээх Өлөксөй аатынан Дьохсоҕон орто оскуолата киэн туттар биир дойдулаахтара, саха чулуу уола Анемподист Иванович Софронов-Алампаны үйэтитэр араас хайысхалаах үлэни ыытар. Быйыл 135 сылын көрсө кини төрөөбүт алааһыгар Оккуодайга ыалдьыттар сынньанан, сүгүрүйэн ааһалларыгар анаан беседка, күрүө туттулар. Бу үтүө тэрээһин туһунан Дьохсоҕонтон Мария Сивцева сырдатар.

Саҥа тутуулары үөрүүлээхтик аһыыга Алампа стипендиятын олохтооччу дьиэ кэргэн, нэһилиэк ытык ыалын ийэтэ, ветеран учуутал Светлана Климентьевна Архипова аал уоту аһатан алҕаата. Бастакы баһылык, ветераннар сэбиэттэрин бэрэссэдээтэлэ Михаил Лукич Архипов, оскуола дириэктэрэ Василиса Даниловна Петрова тыл эттилэр.

 

Үгүс үтүөнү санаан туран алгыстаах саламаны ыйаатыбыт. Педагог-библиотекарь Лариса Михайловналыын өрөспүүбүлүкэ зуум-мунньаҕар улуу суруйааччы биир дойдулаахтарын аатыттан тыл эттибит, үлэбитин сырдаттыбыт, ыйытыыларга хоруйдаатыбыт. Онтон эбиэттэн киэһэ Алампа аатынан норуот айымньытын дьиэтигэр оскуола учууталлара  “Сүдү ааккар сүгүрүйэ…” үөрүүлээх тэрээһини ыыттыбыт. “Далбар хотуттар”, “Саха саҥата” диэн хоһоонньут учууталлар бөлөхтөрө Алампа хоһооннорун аахтыбыт. Улуу биир дойдулаахпыт “Аҕабар сурук”, “Дойдум, дорообо”, “Үрүҥ туллук эрэ мөлбөстүүр” аатырбыт айымньыларынан видеоролик устубуппутун сүрэхтээтибит. Бу киинэни күһүн Алампа алаастарынан педдесаҥҥа сылдьан устубуппут. Нэһилиэкпит баһылыга Петр Егорович Захаров биһигини куруутун өйүүр, өйдүүр, үлэбитин сэҥээрэр, бу дьоро киэһэҕэ кини сылаас илиититтэн Махтал суруктары, оскуолабыт директора Василиса Даниловна көҕүлээһининэн, сүүрэн-көтөн туруорсуутунан Дьохсоҕон нэһилиэгин Алампаҕа сүгүрүйээччилэрэ “Алампа туллуга” үрүҥ көмүс түөскэ анньыллар бэлиэни тутан олус үөрдүбүт.  Киһи эрэ хайгыы көрөр анал бэлиэни эдэр кэскиллээх, тарбаҕар талааннаах Таатта ыччата, ювелир Неустроев Руслан Русланович оҥорон таһаарбыт.

 

 

Бастакы анал бэлиэни ылааччылар кимнээҕий?

 

1. Архипов Михаил Лукич – Алампаҕа анал бириэмийэни олохтооччу, Дьохсоҕон нэһилиэгин бастакы баһылыга.
2. Архипова Светлана Климентьевна  төрүт култуура, саха тылын, литературатын ветеран учуутала, “Алампа” альбом кинигэ ааптара.
3. Давыдова Галина  Константиновна – саха тылын, литературатын ветеран учуутала, “Алампа” альбом- кинигэ ааптара, “Алампа – оҕолорго”, “Алампа” хомуурунньук кинигэлэри таһаарсааччы.
4. Сивцева Мария Владимировна – саха тылын, литературатын учуутала, “Алампа” альбом- кинигэ ааптара, “Алампа – оҕолорго”, “Алампа” хомуурунньук кинигэлэри таһаарсааччы.
5. Арылахова Галина Егоровна – Дьохсоҕон оскуолатын дириэктэринэн үлэлиир кэмигэр “Алампа” альбом-кинигэ тахсарыгар үгүстүк үлэлэспит, Алампаны үйэтитээччи.
6. Бочонин Иван Михайлович – “Алампа, Алампа” пьеса ааптара, Алампаҕа ыытыллыбыт өрөспүүбүлүкэтээҕи куонкурус  кыайыылааҕа.
7. Татаринова Тамара Ивановна – Алампаҕа араас хайысхалаах үлэни тэрийээччи, алын сүһүөх кылаас учуутала.
8. Попова Татьяна Львовна – “Үйэлэри уҥуордаан…” бырайыак ааптара, эбии үөрэхтээһин педагога.
9. Колотинская Варвара Федосьевна – Алампа үлэтин улуу нуучча тылын кытта сэргэстэһиннэрэн үөрэтээччи.
10. Другина Галина Николаевна – “Куорсун” литературнай түмсүү салайааччыта, нэһилиэк библиотекара
11. Саввина Лариса Михайловна – Алампаҕа улуус, өрөспүүбүлүкэ таһымыгар араас куонкурустары, биктэриинэлэри тэрийээччи, педагог-библиотекарь.
12. Жараева Изабелла Семеновна – Алампа аатынан Норуот айымньытын дьиэтин дириэктэрэ.
13. Лебедева Нюргуяна Михайловна – Дьохсоҕон сэрии уонна тыыл бэтэрээннэрин үйэтитээччи, дириэктэри үөрэх чааһыгар солбуйааччы.

 

Түгэнинэн туһанан, салайааччыларбытыгар барҕа махталбытын тиэрдэбит.

 

 

Сэтинньи 14 күнүгэр куйаар ситиминэн өрөспүүбүлүкэтээҕи онлайн-тургутук ыыттыбыт. Онно Тааттаттан, Үөһээ Бүлүүттэн, Уус Алдантан, Орто Халыматтан, Томпоттон, Кэбээйиттэн, Бүлүүттэн, Чурапчыттан, Горнайтан, Дьокуускайтан, Амматтан, Мэҥэ Хаҥаластан, Өлөөнтөн, Ньурбаттан, Тиксииттэн, Бэстээхтэн, Хаҥаластан, о.д.а. – барыта 420 киһи кытынна. Билигин да хоруй киирэ турар. Дьон сэҥээрбититтэн үөрдүбүт. Итини сэргэ Алампабытыгар аналлаах араас тэрээһиннэр видеоларын, матырыйааллары куйаар ситимин нөҥүө тарҕаттыбыт.

 

 

Сэтинньи 15 күнүгэр оскуолабыт үөрэнээччилэригэр хоһоон түһүлгэтин тэрийдибит, оҕолор Алампа хоһооннорун 3 тылынан: сахалыы, нууччалыы, английскайдыы аахтылар. Уруоктар икки ардыларынааҕы сынньалаҥҥа улуу бэйиэт  ырыаларын радиоузел нөҥүө ыллаан дуораттылар. Быйылгы Алампа уруоктарын эдэр историк учуутал Артур Евгеньевич Миронов бэрт уратытык ыытта, оҕолорго умнуллубат түгэни бэлэхтээтэ. “Алампа суолунан айан” диэн алын сүһүөх кылаас үөрэнээччилэригэр уруһуй күрэҕэ,  “Алампа айымньыларынан уобарас араас көстүүтэ” дьиэ кэргэн хаартысканан күрэһэ, бэйиэт хоһооннорунан уруоктар ыытылыннылар. “Оҕо-оҕо эрдэххэ” күргүөмүнэн ыллаатылар. Ити курдук Алампа барахсан үбүлүөйүн ньиргиччи бэлиэтээтибит.

 

Оставить комментарий

Войти с помощью: