Skip to content

АНОНС

Открылся   YouTube канал Тубсааны 

Тааттаҕа? Ойуунускай төрөөбүт уһаайбатыгар!

Күүтүүлээх сайыммыт оройо. Айылҕа барахсан силигилээн, от-мас саамай ситэн торолуйан турар кэмэ.

Билигин Былатыан Ойуунускай аатын ааттаан кэлэр дьон кини төрөөбүт, киинэ түспүт Муҥха Дэлбэрийбит алааһыгар тахсарга дьулуһаллар. Биллэн туран, анаан-минээн кэлэр дьон музей үлэһитин сирдьит гынан, кэрэ-бэлиэ сирдэргэ тохтоон, мэҥэ өйдөбүнньүк суолтатын ыйытан, эбии-билэн көрөн сүргэлэрэ көтөҕүллэр.

 


Оннук биир бэлиэ маршрут бу сайынтан саҕалаан Саппыйа алааһыттан, Былатыан Ойуунускай үлэтин саамай чыпчаала буолбут – ССРС Үрдүкү Сэбиэтин бастакы ыҥырыылаах быыбарыгар депутакка кандидатынан туран баран, нэһилиэгин дьонун-сэргэтин кытта көрсөн кэпсэппит да, бырастыыласпыт да сирэ буолла. Бу ытык алааска Таатта улууһун дьаһалтата, баһылык М.М.Соров өйөбүлүнэн Мойуор Кулаковскай балаҕанын сөргүтэн тутан, кэлбит ыалдьыттарга номнуо көрдөрөр биир историческай сир буолла. Онон дьылбыт сылаас кэмигэр Саппыйа алаастан саҕалаан Халамнаайы эбэҕэ “… кыракаан баҕайы уолчаан оҕо ойбон алларан, анньыытын тыаһа курдурҕаан-чыбырҕаан, дьыбардаах халлааҥҥа иһиллэ турара” уобараһы көрдөрөр “Оҕо куйуурдуу турара” мэҥэ өйдөбүнньүгү көрдөрөн, биир дойдулаахпыт, саха тыллаахха биллэр учуонай Баһылай Бырдьахаанап эппитинии “… Көҥүл санааны күөмчүлэппэт дуоҕатын өрө туппут, ахсым атын мииммит Ньургун Боотур мэҥэ өйдөбүнньүгэ – бу эр санааны, көҥүлгэ дьулуһууну көрдөрөр” – “Ньургун Боотурга” тохтотон, хаартыскаҕа түһэрэн салгыы Ойуунускай уһаайбатыгар айанныыбыт.

 


Муҥха Дэлбэрийбиккэ, Былатыан балаҕаныгар долгуйа үктэнэн, иһийэн олорон кини оҕо сааһын, төрөппүттэрин туһунан кэпсээн, кини хоһоонуттан ааҕан туһунан литературнай эйгэ аана аһыллар… Алаас дьыл хайа баҕарар кэмигэр туһунан кэрэ, киһини угуйар алыптаах. Ойуунускай сүүрбүт, хаампыт сиринэн, ыллыгынан сылдьан айар-куттаах дьоҥҥо үөрэ-дьүөрэ хоһоон айыллар, ырыаһыкка ыллыах-туойуох санаата киирэр. Холобура, Дьокуускайтан кэлэ сылдьыбыт Д.К.Сивцев-Суорун Омоллоон аатынан Опера уонна балет театрын артыыһа Александр Емельянов хас да ырыаны ыллаан, бэйэтэ да дуоһуйда тэҥҥэ сылдьааччылары да үөртэ.

 


Маршруппут тиһэх тохтобулунан нууччалар Саха сиригэр кэлиэхтэрин иннинэ сылгыларын суолун батыһан, ойохтуун, уруулуун көһөн кэлэн тохтообут Тохтобул алааһыгар Улуу Муҥхалаах Кээрэкээн ойууҥҥа анаммыт мэҥэ өйдөбүнньүккэ күүс-сэниэ ылларабыт.
Ити курдук Былатыан Ойуунускай төрөөбүт уһаайбатыгар, алааһыгар дьон-сэргэ тохтоон, анаан-минээн сылаас кэми баттаһа кэлэн көрөн-истэн барар. Алаас барахсан бэйэтин кэрэтин көрдөрөн, сөхтөрөн, чахчы да, сынньатан атаарар.

Хаартыскаларга: Муҥха Дэлбэрийбит алааһыгар сайын сатыылаата; Саппыйа алаас; ыалдьыппыт – мэҥэ өйдөбүнньүктэ.

Источник

Оставить комментарий

Войти с помощью: