Skip to content

АНОНС

«Тэтим» тэтимин ыһыктыбат

28.06.2021 14:47Эркээйи

Кырдьаҕас Хаптаҕай нэһилиэгэр сүөһү иитээччилэр ахсааннара аҕыйаан иһэринэн сибээстээн, сүөһүнү кыһынын кыайан көрбөт ыаллартан хомуйан кииннээн көрүү-истии өҥөтүн 2009 сылтан саҕалаабыттара. Урукку сопхуос эргэ хотонун сөргүтэннэр, 67 сүөһүнү бастаан кыстаппыттара. Сүөһүлэри көрүү эбээһинэһин Антонина Суходольская хаһаайыстыбата бэйэтигэр ылыммыта.

Нэһилиэгин дьонун-сэргэтин итэҕэлин ылан, төрдүс болдьоҕор баһылыктыыр Екатерина Гаврильева үлэ ити хайысхатыгар улахан болҕомтотун ууран, тиһигин быспакка тутан кэллэ. Тыа хаһаайыстыбатын исписэлииһинэн үлэлиир Людмила Жиркова сүөһү көрүүтүн өҥөтүн илиитигэр ылыаҕыттан, 2018 сыллаахха Хаптаҕайга ити сыалга-сорукка саҥа хотон тутуллан үлэҕэ кыстыгы көрсө киирбитэ. Хотону нэһилиэк туруу үлэһит дьоно ‒ ини-бии Ивановтар ‒ Ньургустаан, Иван, Федор, Савва уонна хаан-уруу бырааттара Петр Спиридонов буоланнар, илиилэринэн тутан-хабан, 30 миэтэрэ усталаах, 12 миэтэрэ туоралаах, ортотунан 2,5 миэтэрэ үрдүктээх бэртээхэй хотону тутан таһаарбыттара. Пиэрмэ хотоно турбут цемент муостатын дьөлүтэ балталааннар, баҕаналарын ол дьөлбүттэригэр түһэртээн, ис-тас эркиннэрин икки ардыгар мэлиллибит маһы кутан туппут хотонноро, Людмила Викторовна бигэргэтэринэн, сылаас даҕаны, кураанах, сииги туппат да буолан, сүөһүлэр да, үлэһиттэр да абыраммыттар. Киэҥ-куоҥ сырдык хотоҥҥо санаалара кэлэн үлэлииллэр, биир дойдулаахтарын сүөһүлэрин көрөллөр-истэллэр, ыыллар. Хотон тутуллуутугар тыа хаһаайыстыбатын управлениета 700 уонна олохтоох дьаһалта 300 тыһыынча солкуобайы көрбүттэрэ. Онон, улахан тутууга сэмэй бүддьүөтүнэн тутуу кыаллыбыта.

 

‒ Быйылгы күөххэ, олох чуолкайдаатахха, 916 сүөһүнү үктэннэрдибит, ‒ диир Людмила Жиркова. ‒ 265 ынахтаахпыт, итилэртэн билигин 210 ынах төрөөтө. Төрөөһүн сезонугар хапсан иһэллэр. 44 тиҥэһэлээхпититтэн отут иккитэ төрөөннөр ынахха таҕыстылар. Уоннааҕыта ыччат сүөһүлэр. Ыанар ынах ахсааныгар көрүллэр саҥа субсидияны, уопсай сууматынан 3 мөлүйүөн 430 тыһыынча солкуобайы ылан түҥэттибит. 38 ыалбыт ынахтарыгар ыллылар. 25 ыал, ол иһигэр, 13 бааһынай хаһаайыстыба, үүт туттараллар. Бааһынай хаһаайыстыбалар нөҥүө туттарыы барар. Итилэртэн бааһынай хаһаайыстыбалар 50-нуу солкуобай субсидияҕа (уонун соҕотуопкалыыр тэрилтэ эбэн биэрэр), ынахтарыгар субсидия ылбыт ыалларбыт Павловскайдааҕы үүт собуотугар 10-нуу солкуобай суотугар туттараннар арыынан аахсаллар.

 

Нэһилиэк сылгытын ахсаана 710-тан тахса буоллаҕына, биэтин ахсаана 300 эбит. Биэлэр 70-тан тахса бырыһыаннара төрөөбүттэр. 1973 сыллаахха олохтоммут Алаас сайылыктарыгар быйыл сайын икки бааһынай хаһаайыстыба сүөһүлэрин сайылаталлар: Елена Можарова уонна Степан Терентьев хаһаайыстыбалара. Алааска уон сэттис кыһыннарын Павел Костромыкин уонна Галина Иванова кыстаабыттар. Аҥаара гараас оҥоһуллубут, маҥан оппуохалаах кыра дьиэҕэ кыһын буруо унаардан олороллор. Сайылыгы өссө 2000 сыллаахха электроуоттан араараннар, элэктириичэстибэтэ суох олорбуттара ырааппыт. Сайынын дизель-генераторы холбооннор, дьаһалта бас билэр үүт сойутарын үлэлэтэллэр. Үүтү ыллылар да, мотуор умуллан, эмиэ чуумпу буола түһэр. Билигин сайылыкка 206 ынах ыанар. Олортон Павел Костромыкиннаах киэнэ 30-тан тахса сүөһү уонна 50-тан тахса сылгылаахтар. Елена Можарова 84 сүөһүтүн барытын мэччирэҥҥэ таһаарбыт, 28 ынаҕы ыыр. Былырыын 400-кэ сүөһү сайылаабыт. Икки бааһынай хаһаайыстыбалара, уот суох, эрэйэ бэрт диэн, сайылыкка быйыл тахсыбатахтар. Ынахтары икки титиигинэн ыыллар. Сайынын манна Павел Костромыкин эрэ оттуур. Электроуот лииньийэтэ, дьиҥэр, ырааҕа суоҕунан ааһар эрээри, холбонуута кыалла илик.

 

 

Дьаһалтаҕа тыа хаһаайыстыбатын исписэлииһэ Людмила Викторовна бэйэтин «Тэтим» бааһынай хаһаайыстыбатыгар 18 сүөһүлээҕин этэр. Алта ынахтаах. Хаһаайыстыба чэрчитинэн, нэһилиэк дьонун сүөһүтүн кыһынын көрөллөр-истэллэр. Саҥа хотоҥҥо уонна эргэ холлоҕос хотоҥҥо 148 сүөһүнү кыстаппыттар. Ол иһигэр саҥа хотоҥҥо Леонид Егоров бааһынай хаһаайыстыбатын сүөһүлэрэ. Саҥаҕа 84 уонна эргэҕэ 64 сүөһү. Көрүү өҥөтүгэр сүөһүгэ 1-дии тыһыынчаны ылаллар уонна көрдөрөөччүлэртэн, сүөһү сааһынан көрөн, 1-дии уонна 2-лии туонна оту ирдииллэр. Кыһынын 5 үлэһит үлэлиир буоллаҕына, сайын ‒ икки киһи.

 

Хаптаҕайга ардах түспэтэҕэ ыраатта диэбитэ Людмила Жиркова. От хатан эрэрин бэс ыйын үһүс дэкээдэтэ саҕаланыытыгар бэлиэтээбитэ. «Сайдыы» агрокластерга Иван уонна Игнат ЗыковтарНиколай Попов көмөлөөн хаппыыстаны, хортуоппуйу үүннэрэллэр. Хаппыыстаны 16 уонна хортуоппуйу 7 гектардарга олордубуттар. Алаас сайылыкка Иннокентий Романов 9,5 гектарга хортуоппуйу ыспыт.

 

Оставить комментарий

Войти с помощью: