Skip to content

АНОНС

Открылся   YouTube канал Тубсааны 

Иван ШАМАЕВ Егор БОРИСОВЫ былаастан хайдах, кимнээх туораппыттарын туһунан аһаҕастык кэпсээтэ.

 

5.06.2021 г.

 

Бассаапка общественник, политик, Ил Түмэн ыҥырыылаах бэһис мунньаҕын  депутата Иван Иванович ШАМАЕВ  үһүс республика Президенэ, бастакы Ил Дархана Егор Афанасьевич БОРИСОВ туһунан суруйда. Чуолаан, Егор Афанасьевыһы былаастан тоҕо, туохтан туораппыттарын аһаҕастык кэпсээтэ. Былаас ис биэтэһигэр туох-ханнык быһыы-майгы буолбутун суруйда.

 

Республика ситэриилээх былааһа (2010-2021 сс.)

Бу кэнниттэн АЛРОСА тула улахан киирсии 2016-2017 сыллардаахха буолан ааспыта. Туруулаһыы федеральнай правительство уонна республика үрдүкү салалтатын таһымынан барбыта, онон общественность билбэккэ хаалбыта. Онно буолан ааспыт событиелар СМИ-нэн сырдатыллар кыахтара суох буолан дьон билигин да билбэт. 2007 сыллаахха СР уонна РФ правительстволара АЛРОСА акцияларын 7-лии бырыһыанын атыылаабыттарын кэнниттэн акция үллэһигэ маннык буолбута: РФ – 44%, СР – 25%, улуустар – 8% чааһынайдар – 23%.

2016 сыллаахха РФ правительствота АЛРОСА акциятын сороҕотун атыылыырга быһаарбыта. Бу боппуруоска ордук күүскэ А. Улюкаев уонна Ю. Трутнев туруммуттара. Улуу тойоттор акция атыыланыахтааҕын туһунан сайабылыанньалары оҥорбуттарын кэннэ Ил Дархан Е. Борисов; “Саха Республиката акцияларын атыылаабат” диэн малтаччы этэн кээспитэ хаһыаттарга тахсыбытын мин бэркэ соһуйа аахпытым уонна “киирсии эмиэ саҕаланнаҕа” диэн улаханнык ытырыктаппытым.

Ол кэнниттэн Ю. Трутнев: “Тоҕо биһигини кытта сөбүлэһиитэ суох сайабылыанньа оҥордуҥ?”, — диэн улаханнык уордайан туран Е. Борисовы мөхпүтүн туһунан сурах сири-буору аннынан иһиллибитэ. Бэс ыйын 6 күнүгэр “Азия Оҕолоро” спортивнай оонньуулары арыйыы өрөгөйдөөх сиэригэр-туомугар Д. Медведев, Ю. Трутнев кэлбиттэрэ, Дьокуускай куорат бырааһынньыктыы симэммитэ.

Үөрүүлээх арыйыы кэнниттэн Д. Медведев уонна Ю. Трутнев Егор Афанасьевиһы икки өттүттэн ыган олорон республика акцияларын атыылыырга модьуйбуттарын туһунан кэпсээни ити кэмҥэ правительство иһигэр үрдүк дуоһунаска үлэлии сылдьыбыт хас да киһиттэн иһиттим. Маннык уһулуччу ыарахан балаһыанньа үөскээтэҕинэ регион салайааччыта бэйэтин суобаһын кытта бэйэтэ суос соҕотох хаалар. Өйүүр да, сүбэлиир да таһымнаах киһи кини аттыгар баар буолар кыаҕа суох, общественность туох буола турарын сэрэйбэт даҕаны.

Бу уустук түгэҥҥэ Егор Афанасьевич быһаччы кини үрдүгэр турар тойоттор ыгыыларыттан мүччү түһэр ньыманы тобулбута. Мантан салгыы усках кэпсээҥҥэ буолбакка 2020 сыллаахха “ЖЗЛ” серияҕа тахсыбыт “Егор Борисов” диэн кинигэҕэ киирбит матырыйаалга олоҕуран суруйабын.

«Азия Оҕолоро» оонньуу кэнниттэн кураанаҕы кууһан баран Ю. Трутнев уоскуйар былаана суох буолан биэрбитэ. Эмиэ ити сыл “АЛРОСА куратора буоларым быһыытынан “Росимуществоҕа” Саха сирин акцияларын салайарбар мин ааппар дэбиэрэннэс суруйан биэриҥ” диэн “Росимуществоттан” модьуйбута (!). Е. Борисов бу да сырыыга Ю. Трутнев сирэйэ-хараҕа суох суудайыытын боччуйар хардыыны булбута. 2017 сыллаахха АЛРОСА-ҕа саҥаттан кимэн киирии саҕаламмыта. Федеральнай правительство РФ уонна СР иккиэн 4%-түү бырыһыаны атыылыахтара диэн былааннаммыттара.

Ил Дархан бу да сырыыга Саха сирин акциятын атыылыыртан аккаастаммыта уонна улуус баһылыктарыгар аһаҕастык эппитэ: “Биһиги акциялары приватизациялыыр санаабыт суох. Акциялаах улуустар баһылыктарыгар этэбит — акцияҕыт туһунан кэпсэтиигэ киирэн биэримэҥ. Эһиэхэ тахсыахтара. Онно бэринимэҥ. Акцияларгытын атыылаамаҥ.” Республика салайааччыта муҥура суох былаастаах федеральнай чиновнигы утары маннык туруору киирсибит холобура Россия историятыгар бука аҕыйаҕа буолуо.

Бу мунньах туһунан “Коммерсант” хаһыат бэчээттээбитэ, оттон биһиги, республика олохтоохторо, тугу да билбэккэ хаалбыппыт. Е. Борисов ити хорсун этиитэ федеральнай правительство былааннарын барытын тохпута, Саха сирэ биир да акцияны атыылаабатаҕа. Биллэн турар, Россия саамай үрдүк дуоһунастаах тойотторуттан биирдэстэрэ Ю. Трутнев Саха Сирин Ил Дархана кинини утары аһаҕастык үлэлиирин уодьуганныырга талбыт ньыматын туттар кыахтааҕа. Ити күһүн буолуохтаах Госдума быыбарыгар республика ньыгыллара кандидат туруорар “бырааптара” быһыллыытыгар Трутнев быһаччы оруоллаах буолуон сөп.

Ахсынньыга Москваҕа “Дальневосточный Экспресс” диэн электропоезд сүрэхтэниитигэр Ю. Трутнев, Уһук Илин регионнарын баһылыктара, ол иһигэр Е. Борисов, ыҥырыллыбыттара. Биир түгэҥҥэ Ю. Трутнев уонна регионнар баһылыктара Егор Борисовы куруубайдык бэйэлэрин кэннилэригэр үтүрүйэн таһааран баран кэккэлэригэр киллэрбэт курдук метро кыараҕас платформатын тиирэ турунан кээспиттэрэ. Маны көрдөрөр ролик ватсабынан киэҥник тарҕаммыта. Хомойуох иһин, элбэх киһи Е. Борисовы сэтэриир комменнары суруйбута. Егор Борисов республика экономическэй интириэһин туһугар охсуспутун Ю. Трутнев итинник ньүдьү балайдык иэстэһэн турар.

Хайа да бэйэлээх киһи итэҕэһэ элбэх буолар. Егор Борисов сыыһата-халтыта бука элбэҕэ буолуо. Ол гынан баран норуот дьылҕатын, республика интэриэһин таарыйар сүрүн боппуруостарга тус бэйэтин да харыстаммакка, үрдүк дуоһунаһын да харыһыйбакка хорсуннук охсуспута диир толору бырааптаахпын. Федеральнай былаас бүгүҥҥү эргимтэтигэр маннык региональнай лиидэрдэр бэлэскэ турар уҥуох кэриэтэлэр. СМИ-нэн Е. Борисовы күүстээх ыгыы барбыта.

2018 сыл ыам ыйын бүтүүтүгэр Егор Борисов Ил Дархан дуоһунаһыгар үлэлээн бүтэрин туһунан сайабылыанньа суруйарга күһэллибитэ. Быһаарыы.

Ааҕааччы баҕар “Шамаев Борисовтан туох эрэ тутулуктаах, эбэтэр ханан эрэ чугастыы буоланнар маннык суруйара буолуо” диэн санааҕа кэлиэн сөп. Билигин кини Ил Дархан буолбатах, онон туох да тутулугум суох. Е. Борисовтыын ханан да чугасаһарбыт суох. Депутат эрдэхпинэ мин кини киллэрбит элбэх сокуонун бырайыагын утарбыттаахпын.

Оттон 2018 сыллаахха мин Ил Түмэҥҥэ депутакка кандидатынан туран сырыттахпына Е. Борисов Бэрдьигэстээххэ тахсан “Шамаевы талымаҥ” диэн агитациялаабытын бэркэ билэбин. Киһи кими өйүүрэ, кими утарара – ол кини конституционнай бырааба. Онон Е. Борисов дьайыытыгар сыана быһа барбаппын.

Ол гынан баран Егор Афанасьевич биһиккини дьүөрэлэһиннэрэр ханнык да политическай дуу, дьыалабыай дуу, атын дуу платформа суоҕун ити чуолкайдык көрдөрөр дии саныыбын.

Ыам ыйын 31 күнэ, 2021 с.

Дьэ. онон оннук. Кэлин өссө да кэнэҕэс ким хайдах, тугу турууласпытын дуу, туран биэрбитин дуу туһунан истэн-билэн иһиэхпит буоллаҕа.

 

Источник: Aartyk.ru

Оставить комментарий

Войти с помощью: