Ньурба Хаҥалаһыгар төрүт дьарыгы сөргүтэллэр
Ыам ыйын 29 күнүгэр Хаҥаласка өбүгэлэрбит үгэстэрин сөргүтэн А.П.Васильева уонна норуот маастара А.В.Афанасьев бырайыактарын олоххо киллэрэн сэлиэһинэй бурдугу урукку ньыманан ыһыы ыытылынна. Манна В.А. Петрова аат. кыраайы үөрэтэр түмэл,Н.И. Кочнев аат. агропрофилированнай хайысхалаах орто оскуола үлэлээтилэр.
Бу бырайыак Хаҥалас ытык кырдьаҕаһа 95 сааһыгар үктэнэн олорор Марфа Калиновна Ивановаҕа ананар. Марфа Калиновна сэрии кэмигэр 16 саастаах кыыс Сататтан Ньурбаҕа сыарҕалаах оҕуһунан киирэн сэлиэһинэй бурдук тиэйэн таһаарар эбит. Ол тиэллэр бурдугу дьоҥҥо түҥэтэн, аччыктаан быстарбыт дьону сырдык тыыннарын өрүһүйбүтэ.
Сир таҥастааһыныгар Сата дэриэбинэтигэр туттуллубут булуугу уонна баранньаны уура сылдьыбыттарын Борис Григорьев, Ариан Афанасьев ат оҕуска сөп буолар гынан бурҕалдьытын, сүүрэрин, уһун маһын сэлбийэн оҥордулар. Эрдэттэн буорун сымнатан таҥастаммыт буоланы көлүүр оҕуһунан булуугунан таттаран, боронньолоон, элбэх киһи сэлэлии баран илиинэн туораах бурдугу олортулар.
Бурдук сиэмэтин М.Г.Сафронов аат. Саха сиринээҕи тыа хаһаайыстыбатын научнай-чинчийэр института анаан оҥорбутун Покровскай опытнай хаһаайыстыбатыттан аҕалыллыбыта.
Онон, барыта этэҥҥэ буоллаҕына, бу күһүн бырайыак түмүгүнэн суорунаҕа тардыллыбыт сэлиэһинэй бурдугунан лэппиэскэ уонна да атын саха астарын боруобалыахпыт.
Түмэл пресс-сулууспата
