Амматтан эйэҕэс эбээ Анна Васильева өрөспүүбүлүкэтээҕи күрэхтэһии кылаан кыайыылааҕынан буолла
Сегодня, 12:39 Издание: «Газета “Амма олоҕо”»
Амма нэһилиэгин олохтооҕо, барытыгар дэгиттэр, сатабыллаах, 82 сааһыгар сылдьар Анна Андреевна Васильева эбээлэр икки ардыларыгар тэйиччиттэн ыытыллыбыт өрөспүүбүлүкэтээҕи күрэхтэһиигэ кыттан кылаан кыайыылааҕынан ааттанна.
Амма нэһилиэгин бочуоттаах олохтооҕо, «СӨ култуураҕа уонна духуобунаска үтүөлэрин иһин», «Амма киэн туттуута» бэлиэлэр хаһаайыннара, бэтэрээннэр Сэбиэттэрин чилиэнэ, «Амма олоҕо» хаһыат уопсастыбаннай кэрэспэдьиэнэ, үһүс көлүөнэ оскуола «үрүҥ көмүс» волонтера Анна Андреевна Васильева өрөспүүбүлүкэтээҕи «СУПЕР БАБУШКА» күрэхтэһиигэ кыттан кылаан кыайыылаҕынан ааттанна.
Бу тэйиччиттэн олорон ыытыллыбыт күрэхтэһиигэ Чурапчыттан, Уус Алдантан, Үөһээ Дьааҥыттан, Өймөкөөнтөн, Үөһээ Халыматтан, Эдьигээнтэн, Горнайтан, Бүлүүттэн, Үөһээ Бүлүүттэн, Намтан саамай бастыҥ эбээлэр илиинэн оҥоһуктара, спортка ситиһиилэрэ, хаартыскаҕа түспүт кэрэ көстүүлэрэ, бэйэни билиһиннэриилэрэ, талааннара сыаналанна.
Барытыгар дэгиттэр талааннаах Анна Андреевна айылҕа араас көстүүлэрин, дьону, таҥара итэҕэлиттэн хартыыналары сабынан, оҕуруонан быысапкалыыр. Салгын саатынан сыал ытыытыгар ситиһиилээх, остуол оонньууларыгар улуус чөмпүйүөнэ.
Хореографтар Луиза Яковлева, Сахаяр Дорофеев «Үҥкүүлүүр, Солобуода», Василий Кузьмин «Солобуода», Анфиса Федорова Иэйэиэхсит», Анна Матвеева «Күн Күбэйэ» ырыа ансаамбылларыгар дьарыктанар.
Эйэҕэс эбээ Италияҕа ыытыллыбыт норуоттар икки ардыларынааҕы, Москубаҕа, Одессаҕа ыытыллыбыт Бүтүн Арассыыйатааҕы ырыа фестивалларын лауреаттара, үҥкүүгэ өрөспүүбүлүкэтээҕи элбэх күрэхтэһиилэр кыайыылаахтара, үҥкүү кубогын хаһаайката. Амма кэрэ айылҕатын олус таптыыр, ытык кэрэ сирдэригэр Короленко Хайатыгар, Харама Хайатыгар, Өнтө Хайатыгар сылдьан күүс-уох ылан, сынньанар. Тапталлаах кэргэнэ тыа хаһаайыстыбатын үтүөлээх бэтэрээнэ Николай Александровичтыын 53 сыл бииргэ дьоллоохтук олороннор «Килбиэннээх дьиэ кэргэн» ааты ылбыттара, өрөспүүбүлүкэ бочуоттаах кинигэтигэр киирбиттэрэ.
«Сыл устата хааччахтааһын кэмигэр ньургуһуҥҥа, сардаанаҕа, открыткаҕа, коллекционердарга аналлаах күрэхтэһиилэргэ, араас быыстапкаларга, ырыаҕа онтон да атын өрөспүүбүлүкэтээҕи 20 тэрээһиҥҥэ кыттан кыайыылаахтарга ааттанным. Оттон миигин бу күрэхтэһиигэ көҕүлээбит уонна кыттарбар тэрээһин үлэтигэр көмө буолбут үһүс көлүөнэ оскуолатын улуустааҕы салайааччыта Наталья Дьячковскаяҕа, үөрэнээччим Екатерина Огоюкинаҕа, эдэр үҥкүүһүт дьүөгэм Прасковья Федороваҕа, барытыгар көмө буолар салайааччыбар Анна Матвееваҕа уонна Дмитрий Дыдаев тылларыгар, Христофор Максимов матыыбыгар саас туһунан ырыабын байаанынан доҕуһуоллабыт Василий Неустроевка, аныгы технологияары туһанан күрэхтэһиигэ кыттарбар холбоон көмө буолбут Любовь Гаврильеваҕа, өйөбүл буолбут оҕолорбор, сиэннэрбэр, хос сиэннэрбэр, чугас дьоммор, ансаамбылларбар, «Сардаана» кулууп кыргыттарыгар, үөрэппит оҕолорбор, «Хардыы» түөлбэбэр, бэйэм, оҕолорум, сиэннэрим, хос сиэним Амма 1 №-дээх орто оскуолатыгар, учууталларыгар махталым муҥура суох. Билигин «Вальс Победы» өрөспүүбүлүкэтээҕи күрэхтэһиигэ бэлэмнэнэ сылдьабын.
Тулалыыр дьонум үтүө санааларынан, убаастабылларынан, тапталларынан араҥаччыланан, үөрэппит оҕолорум тапталларыгар сууланаммын миэхэ күүс, сэниэ, эрэл эбэннэр бу улахан түһүлгэҕэ дьоһун ситиһиигэ тигистим. Бука бары миэхэ күүстээх баҕа санааҕытын туһаайаҥҥыт миэхэ эрэли, күүстээх санааны, дьулууру биэрэҥҥит улахан күрэххэ үчүгэй ситиһиилэнэн эрэлгитин толорбуппар барыгытыгар истиҥ махталбын биллэрэбин! Бука барыгытыгар олоххо тардыһыыны, ситиһиилэри, толору дьоллоох олоҕу баҕарабын! Эһигинэн санаам күүстээх, олохпор эрэллээхтик олорон уһун үйэлэнэбин, кэрэтик кырдьабын, кырдьыыга бэриммэппин! Дьоллоохпун!» – диэн үөрүүтүн үллэстэр Анна Андреевна Васильева.
Ааптар: Алтана Артемьева
