Кикбоксиҥҥа Арассыыйа чөмпүйэнээтигэр 400 спортсмен кыттыаҕа
Дьокуускай куоракка «Триумф» спортивнай кииҥҥэ кикбоксиҥҥа Арассыыйа чөмпүйэнээтэ муус устар 5-11 күннэригэр ыытыллыаҕа. Күрэхтэһии биллиилээх саха спортсмена Александр Иванов аан дойду чөмпүйэнээтигэр ССРС сүүмэрдэммит хамаандатыттан чаҕылхай кыайыыны ситиспитин чиэһигэр уонна Кикбоксиҥҥа Арассыыйатааҕы федерация тэриллибитэ 30 сылыгар ананар. Билигин тустаах федерация сүрүн соругунан Арассыыйа чөмпүйэнээтин үрдүк таһымнаахтык ыытары ситиһии буолар.
Василий Прокопьев
Күрэхтэһиигэ 40-ча эрэгийиэн спортсменнара кыттыыны ылаллара күүтүллэр. Арассыыйатааҕы таһымнаах күрэхтэһии түмүгүнэн кыайыылаахтар аан дойду чөмпүйэнээтигэр кыттарга путевка ылыахтара. Ол курдук, тэрээһиҥҥэ 400-тэн тахса спортсмены таһынан, Кикбоксиҥҥа Арассыыйатааҕы федерация чилиэннэрэ, дойду араас муннуктарыттан успуорт үтүөлээх маастардара уонна тириэньэрдэр ыалдьыттыахтара. Бү бэлиэ күн чэрчитинэн, Саха сиригэр кикбоксинг устуоруйатын уонна сайдыытын туһунан кинигэ сүрэхтэниэ уонна документальнай киинэ бэлэмнэниллэр.
Ыспыраапка
Александр Егорович Иванов (1968-1995). 1968 сыллаахха Ньурбаҕа төрөөбүтэ.1983-1984 сс. оскуола оҕолоругар Саха сирин, Уһук Илин уонна Сибиир боксаҕа чөмпүйүөнэ. 1985 сыллаахха улахан дьоҥҥо Саха сирин чөмпүйүөнэ. 1985 сыллаахха СГУ пединститутун физкультура отделениетыгар үөрэнэ киирбитэ. 1987-1988 сс. аармыйаҕа сулууспалаабыта. 1989-1991 сс. ССРС үс төгүллээх чөмпүйүөнэ буолбута. 1990 сыллаахха Европа вице-чөмпүйүөнэ (Лиссабон к.). 1991 сыллаахха үрдүк үөрэҕи үөрэнэн бүтэрбитэ. Кикбоксиҥҥа аан дойду чөмпүйүөнэ буолбута (Лондон к.). 1991 сыллаахха норуоттар икки ардыларынааҕы таһымнаах успуорт маастара ааты ылары ситиспитэ. 1992-1993 сс. Тутулуга суох судаарыстыбалар сойуустарын (СНГ) чөмпүйүөнэ. 1993 сыллаахха «Ринг» кулуубу тэрийбитэ. Дойдуга чөмпүйэнээттэри тэрийиигэ үлэлэспитэ.
Саха сирин сүүмэрдэммит хамаандатыгар (тириэньэр Андрей Алексеев) барыта 22 кыттааччы киирбитэ биллэр, оттон юниордарга (тириэньэр Уйусхан Барашков) — 25 спортсмен. Чөмпүйэнээт «К-1» түһүмэххэ Арассыыйа үрдүнэн үрдүк таһымнаах кикбоксердар ортолоругар ыытыллар. Күрэххэ Саха сирин чиэһин көмүскүөхтэрэ: 67 киилэҕэ – Арассыыйа үс төгүллээх, Европа чөмпүйүөнэ, кикбоксиҥҥа норуоттар икки ардыларынааҕы Арассыыйа успуордун маастара Денис Андреев, 54 киилэҕэ – Арассыыйа, Европа чөмпүйүөнэ, кикбоксиҥҥа дойдулар икки ардыларынааҕы Арассыыйа успуордун маастара, Аан дойду Кубогын хаһаайына Айаал Местников, 63,5 киилэҕэ – Арассыыйа чөмпүйэнээтин финалиһа, Арассыыйа успуордун маастара Виталий Филиппов, 67 киилэҕэ – «World Cup Diamond» хаһаайына Михаил Иванов, 51 киилэҕэ – Арассыыйа Кубогын хаһаайына, «Moscow Open 2021» чөмпүйүөнэ Петр Васильев, 54 киилэҕэ – «Moscow Open 2021» чөмпүйүөнэ Иван Леуонна 57 киилэҕэ – «Moscow Open 2021» чөмпүйүөнэ Тимофей Сивцев.
Арассыыйа чөмпүйэнээтэ саҕаланара 10 күн хаалла. Биһиги чулуу спортсменнарбыт успуортка дьулуурдарын, бэлэмнээхтэрин көрдөрөн, тустаах үрдүк наҕараадалары уонна путевканы ылыахтара диэн эрэнэбит.
