Skip to content

АНОНС

Открылся   YouTube канал Тубсааны 

Бүлүүгэ Итэҕэл Сүбэтин мунньаҕа тэрилиннэ

Сегодня, 14:00 Издание: «Газета “Олох суола”»

Олунньу 22 күнүгэр Бүлүүтээҕи В.О.Каратаев аатынан Олоҥхо дьиэтигэр өрөспүүбүлүкэтээҕи Итэҕэл Сүбэтин түмээччи, Ил Түмэн дьокутаата Ксенофонтов Павел Валерьевич – Ойуур Байбал уонна Итэҕэл Сүбэтин тэрийэр кэмитиэтин чилиэнэ Друзьянов Алгыстаан Аппанаас Уола уопсастыбаннай түмсүүлэри, култуура, үөрэх тэрилтэлэрин үлэһиттэрин, куорат олохтоохторун кытта көрсүстүлэр.


Көрсүһүү иннигэр мустубут дьону арчылаан, Олоҥхо дьиэтин үлэһитэ, Саха Өрөспүүбүлүкэтин култууратын туйгуна Владимир Николаев – Тоорукча Аал уоту оттон, сахалыы алгыс сиэрин-туомун ыытта, сахалыы таҥастаах Далбар хотуттар кэлбит дьону алаадьынан күндүлээтилэр. Салгыы Владимир Николаев оһуокай тылын этэн, киэҥ түһүлгэни төрүттээтэ.

Ол кэнниттэн Итэҕэл Сүбэтэ хаһан тэриллибитин, туох сыаллааҕын-соруктааҕын, инникитин улуус аайы тэрийиигэ үлэлэрин барылын туһунан Павел Ксенофонтов сиһилии кэпсээтэ:

– Саха Итэҕэлин Сүбэтэ 2020 сыллаахха балаҕан ыйын 20 күнүгэр тэриллибитэ. Сүрүн соруга: биир сүбэнэн, эйэлээх уонна иллээх алгыһынан итэҕэл хайысхаларыгар көмө-тирэх буолуу. Төрүт үгэспитин, итэҕэлбитин сайыннарыыга, бастатан туран, бэйэ икки ардыгар сиэрдээх уонна иллээх сыһыан баар буолуохтаах. Иккиһинэн, бэйэ икки ардыгар алтыһыыга тулуурдаах, өйдөһөр уонна өйөһөр хайаан да наада. Итэҕэлбит сайдыыта, күннээҕи олоххо туһа уонна тирэх буолара хас биирдиибититтэн тутулуктаах.

Салгыы бэйэтин көрүүлэрин, санааларын Друзьянов Алгыстаан Аппанаас Уола билиһиннэрдэ. Ол кэнниттэн ыалдьыттар көрсүһүү кыттыылаахтарын ыйытыыларыгар эппиэттэри биэрдилэр.

Кэпсэтиигэ кыттан санааларын эттилэр: «Ыллык» түмсүүттэн Клавдия Софронеева, Олоҥхо дьиэтин үлэһитэ Владимир Николаев, оройуоннааҕы культура сайдыытын уонна норуот айымньытын киинин информационнай-методическай отделын сэбиэдиссэйэ Никита Додутов, И.Л.Кондаков аатынан Бүлүүтээҕи гимназия учуутала Александр Корякин, уопсастыбаннай түмсүүлэри салайааччы Мария Томская уо.д.а.

Көрсүһүү кыттыылаахтара Саха итэҕэлин Сүбэтин тэрийээччилэргэ махтаннылар, инникитин наадалаах уонна туһалаах дьыаланан дьарыктанан эрэллэрин биһирээтилэр, салгыы ыытар үлэлэригэр ситиһиилэри баҕардылар.

Николай ФЕДОРОВ

Оставить комментарий

Войти с помощью: