“Кэтит сир Кэбээйи систэригэр” бэйиэт Даадар үтүө аата ааттанар
Быйылгы үөрэх дьылыгар олунньу ыйга “Кэтит сир Кэбээйи…” диэн саха бэйиэтэ Федор Григорьевич Винокуров-Даадар төрөөбүтэ 110 сылыгар уонна төрөөбүт тыл, сурук-бичик күнүн дэкээдэтигэр аналлаах Мукучу нэһилиэгин олохтоохторугар хаартысканан дьүһүйүү кылгас болдьохтоох аахсыйата ыытылынна. Бу аныгылыы хайысхалаах үлэ биир сонун көрүҥүнэн буолар.
Аахсыйаны Кэбээйи улууһун Мукучу модельнай библиотеката (сэбиэдиссэй Им И.Н.) уонна И.Е. Левин аатын сүгэр Танара орто оскуолатын холбоһуктаах тэрийэр хамыыһыйата көҕүлээтилэр. Тэрээһин сыала-соруга: суруйааччы Ф.Г.Винокуров-Даадар аатын үйэтитии, поэт олоҕун, айар үлэтин оҕо аймахха билиһиннэрии, төрөөбүт дойду айылҕатын харыстыырга, ис кэрэтинэн киэн туттарга иитии.
Хаартысканан дьүһүйүү аахсыйатыгар Мукучу нэһилиэгин төрөппүттэрэ оҕолорунаан көхтөөх кыттыыны ылан туоһу суругунан бэлиэтэннилэр. Барыта холбоон 58 үлэ киирдэ.
Сыныйан көрдөххө, “Мукучум кэрэ айылҕата” түһүмэххэ төрөөбүт дойдуларын айылҕатын, чээлэй күөх ходуһаларын, баай хара тыаларын, минньигэс дьэдьэннэрин, хаптаҕастарын, отоннорун, сыһыыга мэччийэ сылдьар сыспай сиэллээхтэрин, Унаардаах эбэ хотуну, Танара үрэҕин, Чиҥнээни эбэ айылҕатын, Чымаадайы, Дьиикимдэни, Туойдаах ньургуһунун, дьэрэкээн сибэккилэри, лыахтары, көмүс күһүнү, дьиэ тиэргэнин ыллыгын, хатыҥҥа олорор чыычаахтары, ыһыахтыыр сири, өбүгэлэрин ытык маһын-сэргэни, айан аартыгын, ардах түһэн эрэр кэмин, күн киириитин уонна да атын айылҕа кэрэ көстүүлэрин хаартысканан түһэрбиттэрин ыыппыттар.
Кыттааччылар бэйиэт “Кэтит сир Кэбээйи систэригэр” диэн улуус туһунан хоһоонугар олоҕуран, Даадар Кэбээйи сирин кытта ситимин уонна төрөөбүт дойду ис кэрэтин төрөппүт уонна оҕо кыраҕы хараҕынан арыйарга дьулустулар. Поэт: “Сотору дэлэгэй иэннэргэр соргу-дьол үрдүк диэн этэбин”, – диэн дьиҥнээх олоххо баары хоһуйбутун хаартыскаттан астына-дуоһуйа, сэргии көрөҕүн. Кырдьыга даҕаны, Даадар эппитин курдук, “Кэтит сир Кэбээйи систэригэр кэрэбит кэлэрин билэбин…” Аахсыйаҕа киирбит матырыйааллары түмэн, электроннай слайданы И.Е.Левин аатын сүгэр Танара орто оскуолатын эдэр учуутала Софронов Мичил Витемович таҥан оҥорбута кэрэхсэбиллээх. Киэҥ Кэбээйи, Мукучу айылҕата олохтоохтор сүрэхтэригэр-быардарыгар чугас, күндү эбээт!
Поэт Федор Григорьевич Винокуров-Даадар Кэбээйи кэлэр кэскилин түстүүр, кэрэни-үтүөнү билгэлиир хоһоонун ааҕан киһи санаата эрдийэр, төрөөбүт дойдунан киэн туттар санаа түөһүҥ иһин толорор.
Биллэрин курдук, поэт Федор Григорьевич Винокуров-Даадар Кэбээйи оройуонугар көһөн начаалынай оскуола сэбиэдиссэйинэн үлэлии сылдьыбыта. Күн бүгүн хоту дойду киэҥ нэлэмэн сиригэр, “кэтит сир Кэбээйи систэригэр” саха норуотун чулуу уола, поэт Федор Григорьевич Винокуров-Даадар үтүө аата ааттанар. Поэт: “Өлбөт-сүппэт кэрэ тылланан мин да туналыйа сырдыам,” – диэн эппитэ үйэлэри уҥуордаан кэнчээри ыччат кэпсээнэ буолуоҕа.
Светлана Самсонова
