Skip to content

АНОНС

Открылся   YouTube канал Тубсааны 

Куйаар толкуйу баһылаабыт

СӨ Суруйааччыларын чилиэнэ, суруналыыс- Бээрийэ кыыһа Хотойук Айгыына (Уус Алдан)

12.01.2021 с.

 

Норуотун туһугар суруйбут,
Үрдүк санаалары эппит,
Олоххо киһини иитиигэ,
Куйаар толкуйу баһылаабыт…сахалартан чулуубут, үйэҕэ биирдэ кэлэн ааһар куттаах киһи туһунан, кини бэйэтин кэмигэр “Философия Кулаковского”-суруйбут научнай кинигэтин тула, бүгүн куйаар ситиминэн киһи сэҥээрэр, ылларар кэпсэтиитэ түстэннэ. Л.А. Афанасьев- Тэрис бүгүн тохсунньу 12 к. төрөөбүт күнэ.

Бу күн кини үлэтин тула учёнайдар, учууталлар, культура, архив, элбэх оҕолоох ийэлэр, үөрэх салайааччылара муһуннулар. Хас биирдии этээччи ис сүрэҕиттэн санаан, ахтан туран, Тэрис үлэтин сөҕүмэр улаханын, дириҥин бэлиэтээтилэр.
Тэрис үлэтэ элбэҕэ, ону ааһан наһаа элбэх суругунан үлэтэ бэчээттэнэ илигэ билиннэ. Бу тэрээһиҥҥэ үөрэ көрүстүбүт, Тэрис 30с бииргэ олорбут олоҕун доҕорун Розалия Тимофеевнаны уонна улахан кыыһын Сардаананы хайҕыы биһирии көрдүбүт.
Киһи бу олорор олоҕор, туох эрэ суолталаах олоҕу олороору кэлэр, олох суолтата норуоккар буолар. Ити өйдөбүлү биһиги чулуу уолбут, төрүт итэҕэллээхпитин үөрэппит, билбит киһибит Тэрис “Философия Кулаковского”-диэн докторскай үлэтин кинигэтин тула бүгүҥҥү кэпсэтии сүнньүнэн буолла. Киһи бу орто дойдуга бэйэтин кэнниттэн үтүө, кэрэ өйдөбүлү хаалларары ситиһиэхтээх. Лазарь Андреевич саха наукатыгар олус да сүҥкэн үлэни хаалларбыт эбит. Айар тыл аҕата Өксөкүлээх Өлөксөй үлэтин илдьиритэн быһааран суруйуу, унньуктаах уһун уонна дириҥ киэптээх үлэ. Ыл да Өксөкүлээҕи өйдөөбөккүн, бу улуу суруйааччыбыт айар үлэтэ этиттэриилээх буолбутун, тоҕо оннук салаллыбытын, тоҕо Үрүҥ Айыы Тойон киниэхэ килбиэннээх кистэлэҥнэрин, төрүт үгэс сиэр-туом нөҥүө арыйбытый?
Конференция кэмигэр биһирии истибит санааларбын билиһиннэриим.
🖋️А.А.Николаев(к.и.н)-Бу улахан научнай үлэни ис киэбин хорутан, дириҥник өссө да өйдөөн арыйа иликпит…бу кинигэ хат бэчээттэнэн, ааптар тылын, этиитин тугу да уларыппакка хайдах баарынан таһааран, дьоммутугар тарҕатар оруннаах…”
🖋️А.А.Холмогорова(Арчы киинин спец.)- Тэрис оҥорон хаалларбыт “Үгэс эргиирэ”-дьыл халандаарынан саха дьоно олохторун сааһыланар кэмнэрэ кэллэ, онно анал кулууп үлэтин 2021с саҕалыаҕа…
🖋️Г.С. Попова-Санаайа:-бу “Философия Кулаковского”-диэн кинигэтигэр мин ыччаты кытта үлэлиир киһи буолан, Тэрис үөрэх диэн өйдөбүлүгэр тохтуубун.Ол биһиэхэ бэйэбитигэр баар былыргы сиэр-туом үөрэҕэ билиҥҥи аныгы олоххо туһааннаах буолара кэлбитин, Тэрис бу үлэтигэр чуолкайдык быһаарар, онон бу үөрэҕи ыччакка тарҕатар наадалааҕынан көрөбүн…
🖋️Петр Тихонов:-“Тэрис бу филосовскай үлэтэ бүгүҥҥү күҥҥэ тоҕоостооҕо билиннэ. Бу кинигэ биһиги хас биирдиибит сүрэхпит баҕатын, Саха сирин дьонун олохторугар, киһи бүтүннүүтүгэр суолталаах буолуоҕа…”
🖋️Иоган Максимов ( Новосибирскай к)- Тэрис улахан экодуховнай эйгэлээх, дириҥ, киэҥ өйдөөх-санаалаах киһи олорон ааспыт эбит..
🖋️Розалия Тимофеевна(Тэрис кэргэнэ)- …кэргэним бу тыыннааҕар хаалларбыт 99 үлэтиттэн бастакыта…кини бу үлэлэрин эһиэхэ, норуотугар, сахатын дьонугар туһааннаан, анаан суруйан бэлэмнээн хаалларбыта…
Сүдү киһи үлэтэ да сүдү. Бу куйаар курдук киэҥ, дириҥ хабааннаах үлэлэри биир соҕотох киһи хайдах да тарбаҕыттан эмэ сатаан суруйбатын билинэр кэм тирээн кэлбитин, саха тыллаах, сахалыы куттаах-сүрдээх буолларбыт, билинэрбит, ылынарбыт уолдьаста! Махтаныах тустаахпыт, маннык улуу дьоннорбут, биһиги туспутугар, ыччат инникитин туһугар, норуот быһыытынан кэскилбит халбаҥнаабат үйэлээх буо ларыгар туһуламмыт улуу итэҕэлбит кэскилин түстээбитигэр!
Бары биир санаанан түмсэн, бу дириҥ кэскиллээх үлэ бэчээттэнэн, дьоҥҥо-сэргэҕэ тарҕанарыгар бары санаабытын ууруоҕуҥ, инникибитин түстэниэҕиҥ!

Оставить комментарий

Войти с помощью: