Skip to content

АНОНС

Открылся   YouTube канал Тубсааны 

Ил Дархан киин куорат бөх харайар саҥа тутуутун суһалсытарга ыйда

Василий Никифоров  

Саха Өрөспүүбүлүкэтин баһылыгын уонна бырабыыталыстыбатын пресс-сулууспата иһитиннэрэринэн, Ил Дархан Айсен Николаев оробуочай сүбэ мунньахха Дьокуускай куорат бөх тоҕор эргэ полигонун ыраастааһын уонна саҥа полигону тутуу кыһалҕатын быһаарыыны суһалсытар инниттэн манна сыһыаннаах, эппиэттээх тэрилтэлэри түмэ тардарга эттэ.

Айсен Николаев билигин үлэлии турар бөх тоҕор сири күрдьэн ыраастааһын үлэтэ билигин даҕаны саҕалана илигин, бөх таһынан барбытын, араас тобоҕу уматыыттан салгын киртийэрин, ол нэһилиэнньэ доруобуйатыгар бөрүкүтэ суох дьайарын бэлиэтээтэ. Маны өрөспүүбүлүкэ кылаабынай санитарнай бырааһа Маргарита Игнатьева: “Рекультивация болдьоҕун уһатыы Дьокуускай куорат экологическай туругун мөлтөтөр эрэ”, — диэн чиҥэтэн биэрдэ.

Дьиэ-уот коммунальнай хаһаайыстыбатын уонна энергетика миниистирэ Дмитрий Садовников өрөспүүбүлүкэ бырабыыталыстыбата Бүлүүлүүр айан суолун 27-с килэмиэтиригэр сылга 125 тыһ. туонна кытаанах коммунальнай тобоҕу сүөкүүр кыамталаах саҥа полигону тутуу бырагырааматын бигэргэппитин, генеральнай тутааччынан “СӨ дьиэ-уот коммунальнай хаһаайыстыбата” СУТ быһаарыллыбытын, тутуу бастакы түһүмэҕин бүтэрии 2022 сылга былааннанарын иһитиннэрдэ.

Миниистир этэринэн, күн бүгүн тутуу былаһааккатыгар анал тиэхиньикэлэр киирэр-тахсар сирдэрэ быһаарыллыбыт, эбийиэги бырйыактааһыҥҥа тэхиньиичэскэй сорудах сөбүлэһиннэриллибит, чинчийэр үлэ толоруллубут. Кэлэр сыл маҥнайгы кыбаарталыгар судаарыстыбаннай-экологическай экспертизаны аастаҕына, тутууга хабыллар сири тыа хаһаайыстыбатыгар аналлаахтан бырамыысыланнайга көһөрүү үлэтэ саҕаланыахтаах. Сир учаастага “СӨ дьиэ-уот коммунальнай хаһаайыстыбата” судаарыстыбаннай-унитарнай тэрилтэҕэ бэриллэн турар.

Ил Дархан мунньах түмүгэр: “Бырайыагы олоххо киллэрии болдьоҕун мантан уһатар табыллыбат. Саҥа полигону тутуу саҕаланнаҕына, эргэ полигон бүтүннүү ыраастаннаҕына уонна бөҕү саамылыыр-наардыыр ыстаансыйаны тутуу бырайыага олоххо киирдэҕинэ, кытаанах коммунальнай тобохтору харайыы сайдыылаах тиһигэ олохтонуо. Ол өрөспүүбүлүкэбит киин куоратын экологическай туругар үтүө сабыдыаллаах буолара саарбаҕа суох”, — диэтэ.

Оставить комментарий

Войти с помощью: