Skip to content

АНОНС !!!

Чороон туһунан төһө билэ5итий?

“Человек – это божий сосуд”. Из толкований библии (Рим. 9:21-23)

Былыр сахалар Үрүҥ Айыыга үҥэр сиэри-туому “Үҥүһэр һиэр” диэн ааттыыллар эбит. Ити тылы уурунуу бэлиэнэн суруйаллара иккис ааҕыыта “Өҥү ыһар һиэр” диэн эмиэ буолан тахсар. Мындыр дьон “Үҥүһэр – өҥү ыһар” (“Поклонение Солнцу разбрызгивает изобилие”) диэн өйдөбүл киһи олоҕор тыын суолталааҕын өйдөөн, сайыҥҥы күн өрөгөйдүүр сыл үрдүкү бэлиэ кэмигэр, биир сиргэ күргүөмүнэн мустан күннэрин көрсөн, саҥа үүммүт сыл өҥ буоларын көрдөһөн, Үрдүкү Үрүҥ Айыыларыгар үҥэр ытык сиэри-туому толорор буолбуттар. Ол ытык сиэри-туому толорууну “ыһыах” диэн ааттаабыттар.

Былыргы сахалар биэ үүтүттэн оҥоһуллар уохтаах кымыһы, хара астан (эт астан) арааран, киһи өйүн өрүкүтээри Үрүҥ Айыы биэрэр аһыгар (духовная пища) холоон “үрүҥ ас” диэн ааттыыллара. Күҥҥэ сүгүрүйүү ытык сиэрин-туомун толороллоругар биэ кымыһын чорооҥҥо кутан, Айыыларын айах тутан, күн сирдээҕи кыырпаҕын курдук саныыр Аал Уоттарыгар ыһаллара, алгыс этэллэрэ. Киһи өйүн туймаардар уохтаах кымыһынан бэйэлэрин эмиэ харса суох хатаҕалаан, санааларын өрө көтүтэллэрэ уонна Айыыларын айхаллаан оһуохай үҥкүүлүүллэрэ.

Чороон – итэҕэл сиэрин-туомун толорорго ананан оҥоһуллар иһит, онон, биллэн турар, былыргы мындыр саха уустара чороону оҥороллоругар төрүт итэҕэл тутаах өйдөбүллэрин барытын чопчу тутуһаллара. Ол курдук, соҕотох атахтаах чороон аллараа өттө убаҕас үрүҥ ас киирбэт бүтэй гына оҥоһуллар уонна ойуута-мандара төгүрүччү курдуу быһыллыбыта икки буолар. Чороон атаҕа итинник оҥоһуллубута Аллараа Дойду, ону сэргэ Буор Кут (материальный, бездуховный мир) уонна алларааҥҥы икки халлаан өйдөбүллэрин биэрэр. Чороон убаҕас үрүҥ ас кутуллар иһит буолар өттүн икки аҥы арааран, Орто Дойду уонна Үөһээ Дойду бэлиэтин курдук көрүөллүөхтээх, ону кытта Ийэ Кут уонна Салгын Кут (духовные миры) бэлиэтэ диэн өйдөнүллүөхтээх. Үрдүкү 7 халлааннар өйдөбүллэрин чороон үөһээ өттүгэр ойуута-мандара сэттэтэ курдуу быһыллыбыта биэрэр.

Аҕыс иилээх-саҕалаах Аан Ийэ Дойдуну Үс Дойду үрдүкү айар күүстэрэ таҥан оҥороллор диэн төрүт итэҕэл өйдөбүлүн чороон үс атахтаах көрүҥэ биэрэр. Маннык чороон, киһи Орто Дойду олоҕун туораан барарыгар өйүн-санаатын сайдыыта аҕыс таһымы ааһыахтааҕын көрдөрөр 8 төгүрүччү иилии ойуулаах буолар. Чороон үс атаҕа – Үс Дойду бэлиэтэ уонна ону тэҥэ туох барыта Үс Дойду өйдөбүлүгэр сыһыарыллан оҥоһулуннаҕына эрэ охтубат бигэ туруктанар диэн өбүгэбит Аан Дойдуну анаарар дьиҥнээх билиитин тутаах өйдөбүлүн биэрэр.

Үс атахтаах чороону өйгө оҥорон үөһэттэн көрдөххө, төгүрүк иһигэр үс бэлиэ ойууламмытын санатар. Итинник ойуу “өйөө” диэн ааҕыллар уурунуу сурук бэлиэтэ буолар. Өйдөбүлэ – Үс Дойду үрдүкү күүстэриттэн Үс Кут үтүө чөл туруктаах буоларыгар өйөбүлү көрдөһүү. Саха ыала аһыыр аһын уурар үс атахтаах сандалытын өйдөбүлэ эмиэ итинник.

Оставить комментарий

Войти с помощью: