Skip to content

АНОНС

Открылся   YouTube канал Тубсааны 

Россия боксаҕа Кубога: Василий Егоров бэйэтигэр эрэллээх

Сегодня, 12:04
Издание: «ulusMedia»

Ижевскэй. Россия боксаҕа хамаанданан кубогын төрдүс күнэ. Киин федеральнай уокуруктан кыттар Василий Егоров эрэллээх кыайыыны ситиһэн, финалга киирсэр кыахтанна.


Биһиэннэриттэн Борис Сидоров (49 кг) маҥнайгынан кииристэ. Кини утарсааччыта опыттаах боксер, Россия чемпиона Эдмонд Худоян (Ураллааҕы федеральнай уокурук). Борис Сидоров үчүгэйдик, киирсии былаһын тухары боксаҕа этиллэринии, бастакы нүөмэринэн үлэлээтэ. Ол аата, наар кимэн таҕыста. Кыайыыга наһаа дьулуурдааҕын көрдөрдө. Киһитэ наар төлө куота сылдьан охсуулары оҥортоото. Бу наһаа сытыытык барбыт киирсиигэ судьуйалар кыайыыны Худояҥҥа биэрдилэр.

Биһиги көрдөхпүтүнэ, Борис ордук курдук этэ. Чэ, туох буолуой. Кини бу күрэхтэһиигэ олус үчүгэй өйдөбүлү хаалларда. Убайдарын Георгий Балакшин, Василий Егоров суолларын батыһан иһэрин көрдөрдө. Киһи инникитин эрэнэр боксера буоларын итэҕэттэ. Сатахха, бу күрэхтэһиигэ мин көрдөхпүнэ, кини эрэ солбуйар киһитэ (дублера) суох, субуруччу кииристэ.

Тута атын рингэҕэ аны Киин федеральнай уокуруктан кыттар Василий Егоровпыт (52 кг) таҕыста. Кини, утарсааччыта – Россия чемпиона Расул Салиевы эрэллээхтик хоппут, бу күрэхтэһиигэ биир саамай улахан сенсацияны оҥорбут Павел Гунченко (Сибиирдээҕи федеральнай уокурук) буолла. Гунченко биһиги уолбутуттан биир төбөнөн үрдүк, эмиэ кимээһиннээхтик киирсэр боксер эбит. Наһаа сытыытык, тыҥааһыннаахтык барбыт киирсиигэ кыайыыны спорт үтүөлээх маастара Василий Егоров ситистэ. Бу, инникитин сүрдээх наадалаах кыайыы диэххэ сөп, Россия олимпийскай хамаандатын састаабыгар киириигэ.

Бу күн үһүс киһибит, Москва хамаандатыттан Назар Андреев (75 кг) – Россия чемпиона Андрей Ковальчукка хотторон кэбистэ. Ол да буоллар, эдэр уол кимтэн да куттаммакка, толлубакка киирсибитин бэлиэтиир оруннаах. Эмиэ Сидоров курдук инникилээх, кэскиллээх диэххэ сөп.

Оттон, салгыы, Соҕурууҥҥу уонна Хотугу Кавказтааҕы федеральнай уокуруктар киирсиилэригэр Михаил Прокопьев (49 кг) Мухамад Вахаевка тэҥ киирсиигэ хоттордо. Күрэхтэһии салҕанар.

Онон финалга Киин уонна Приволжскай федеральнай уокуруктар хамаандалара көрсөр буоллулар. Оттон үһүс миэстэ иһин Хотугу Кавказтааҕы уонна Ураллааҕы федеральнай уокуруктар састааптара киирсиэхтэрэ. Ол аата, биһиэннэриттэн финалга Василий Егоров (52 кг) кыттар кыахтанна.

Петр ПАВЛОВ.

Оставить комментарий

Войти с помощью: