Skip to content

АНОНС

Открылся   YouTube канал Тубсааны 

Сахалар таба пантатыттан утах оҥордулар

«YES» (Yakutia Energy Secret), ол эбэтэр сахалар сэниэ ылар кистэлэҥнэрэ диэн ааттаах ураты утаҕы «Якутия» ФАПК оҥордо.

Утах сүрүн састаабар эпсорин киирсэр. Вещество таба пантатыттан ылыллар. Эпсорин киһиэхэ күүс-күдэх, сэниэ биэрэр уратылаах.

Ирина Ханды  

Тэрилтэ пиибэ уонна алколольнайа суох бородууксуйа технолога Юрий Спиридонов этэринэн саҥа утах РНА СС Криолитозона биологическай проблемаларын институтун кытта кыттыгас үлэ түмүгэ буолар: «Маны сэргэ Аан дойдуга биллэр улахан фирма хаачыстыбаннай компоненнарын үлэһэн ылан туттабыт. Утах састаабын үөрэтиигэ, туһалаах, амтанныын минньигэс буоларын туһугар икки сыл үлэлээтибит».

Саҥа бородууксуйа маҕаһыыҥҥа атыыланар импортнай энергетик курдук буолбатах. Өскөтүн кэлии энергетическэй утахтарга састаабар кофеин, таурин курдук сэниэ биэрэр компоненнар нуорманы таһымныыр уонна саахары олус элбэҕи кутар буоллахтарына, «YES» састаабар саахара аҕыйах уонна бу этиллибит компоненнар кыра дозанан туттуллубуттар. Онон спортсменнарга, эти-ханы эрчийиинэн ситимнээхтик дьарыктанар дьон сылайан баран, түргэнник чөлгө түһэллэригэр көмөлөөх. Итиэннэ утах бары допинг хонтуруолу ыытар тэрилтэлэр бобуулаах испииһэктэригэр киирсибэт.

Саҥа утах Дрезден, Москуба уонна Санкт-Петербург институттарыгар бэрэбиэркэни ааспыт.

Билигин «YES» «Якутия» ФАПК маҕаһыыннарыгар атыыга тахсан турар. Сыаната 70 – 78 солк. дылы халбаҥныыр. Тэрилтэ тас дойдуга атыыга барарга номнуо хас даҕаны судаарыстыбаны кытта дуогабар түһэрсибиттэр.

Саҥа утах састаабын, хайдах оҥоһуллубутун уонна киһи доруобуйатыгар хайдах дьайарын сиһилии «Ил Түмэн» хаһыат кэлэр нүөмэригэр ааҕыҥ.

Источник

Оставить комментарий

Войти с помощью: