Skip to content

АНОНС

Открылся   YouTube канал Тубсааны 

Чурапчы оҕото Москубатааҕы консерваторияҕа ситиһиилээхтик туттарсан киирдэ

Сегодня, 14:35

Бэҕэһээ Чурапчы улууһугар үөрүүлээх сонун кэллэ. Оксана Егоровна уонна Петр Никифорович Яковлевтар уоллара Никифор Яковлев П.И.Чайковскай аатынан  Москубатааҕы судаарыстыбаннай консерваторияҕа композиция факультетыгар ситиһиилээхтик туттарыста. Бу факультекка Никифор сахалартан бастакынан  киирдэ.


Чурапчы олохтооҕо, Никифор ийэтэ Оксана Егоровна кэпсиир: “Уолбут муусука эйгэтигэр талааннааҕа кыра эрдэҕиттэн биллэн барбыта. Муусука талаана арааһа, мин өттүбүттэн бэриллибит быһыылаах, ийэм Александра Ивановна Поисеева баяҥҥа олус үчүгэйдик оонньуура. Ол иһин аҕабыт ийэтин сүбэтинэн 1 кылааска үөрэнэ киирбитигэр Дьокуускайдааҕы үрдүкү муусука училищетыгар туттарсарга холоммуппут. Соһуйуохпут иһин, уолбутун тута духуобунай оркестр кларнет кылааһыгар ылбыттара.

Оттон 2010 сыллаахха Чурапчы улууһугар көһөн кэлээт, маннааҕы муусука оскуолатын фортепиано кылааһыгар киллэрбиппит. Бу кылааска Никифоры Светлана Павловна Макарова дьарыктаабыта. Киниэхэ дьиэ кэргэммит аатыттан барҕа махталбытын тиэрдэбит.

Оттон Степан Макаров аатынан Чурапчытааҕы гимназияҕа 7 кылааска үөрэнэ сылдьан Дьокуускай куораттааҕы үрдүкү муусука оскуолатыгар үөрэххэ барбыта. Кэлиҥҥи ситиһиилэриттэн ааттаатахха, 2017 сыллаахха Белоруссияҕа ыытыллыбыт форум-сэминээргэ фортепианоҕа оонньоон Арассыыйа эдэр композитордарын Сойууһугар киирбитэ, онно кини 17 саастаах этэ. Хас даҕаны бэйэтэ суруйбут уонна толорор композициялардаах. Консерватория кэнниттэн аспирантураҕа туттарсан үөрэниэм диэн былааннаах, онон уолбут туһугар олус үөрэбит, ситиһиилэри эрэ баҕарабыт”, – диэн Никифор ийэтэ үөрэ-көтө кэпсиир.

Бэлэмнээтэ Сэмэн Жендринскэй.

Оставить комментарий

Войти с помощью: