Skip to content

АНОНС

Открылся   YouTube канал Тубсааны 

Ньурбаҕа сынньалаҥ паарката аспаалланна

Сегодня, 18:57

Сергей Васильев-Бороҕоонускай аатын сүгэр Ньурба сынньалаҥ пааркатыгар сөргүтүү үлэтэ бара турар. 2019 сылга дойду үрдүнэн ыытыллыбыт күрэххэ кыайыылаах бырайыак буолбута. Өрөмүөн үгүс дьон болҕомтотун тардар. Нэдиэлэҕэ хаста да отчуот оҥоһулларын таһынан, манна бырайыагы оҥорбут архитектордар үлэлэһэллэр. Оттон күн бэҕэһээ паарка аспаалланна, диэн куорат дьаһалтатын пресс-сулууспата иһитиннэрдэ.  


Соторутааҕыта Дьокуускайтан авторскай надзор кэлэн барда. Бырайыак үбүн туттуута эрэ буолбакка, хас биирдии эбийиэк ис тутула, оҥоһуллуутун хаачыстыбата хонтуруолланар. Ньурба пааркатын бырайыагын ааптара – «BAZA-14» диэн архитектурнай бюро архитектора Светлана Бугаева уонна «LETO» диэн куорат эйгэтин тутулугар үлэлэһэр киин архитектора Сергей Барахов көрдүлэр-иһиттилэр. «Билиҥҥи туругунан көннөрүллүөн сөптөөх кыра бэлиэтээһиннэр бааллар. Аан бастакыттан үлэлэспит буолан бырайыак олоххо киирэрин көрөр олус долгутуулаах уонна интэриэһинэй», – диэн архитектордар санааларын үллэстэн барбыттара.

Бэҕэһээ үөрүүлээх түгэн буолла – паарка тула 1300 миэтэрэлээх аспаал ууруллан бүттэ. Аспааллааһын бүтүн бырайыак биир уустук өрүтэ буолар, онон бэлиэ күнүнэн ааҕыллар. Бу үлэни «РИК Автодор» хампаанньа Ньурбатааҕы филиала толоро сылдьар. Аспааллааһын саҕаланыаҕыттан манна куорат дьоно сүүрэн да көрдүлэр, бэлэсипиэттээтилэр даҕаны, ролигынан да хатааһылыыллар, кэлээскэлээх аҕам саастаахтары кытары сибиэһэй салгыҥҥа да сылдьар буолаллар. Бу көстүү барыта аспаал бэйэтин анал сыалын ситиһэрин көрдөрдө.

Аспаал ууруллан бүппүт күнүн сарсыҥҥы сарсыардатыгар аспаалга араас өҥнөөх уруһуй баар буолбута суол да үлэһиттэрин, үлэ хаамыытын көрө-истэ тиийбит куорат да баһылыгын олус диэн уйадытта. Тутатына Инстаграм ситимигэр таһааран, сарсыарда аҕыс чааска (сурулла сылдьар) миэлинэн уруһуйдаммыт махтал тыллаах оҕолор уруһуйдара бар дьоҥҥо үгүс үөрүүнү бэлэхтээтэ.

«Бу уруһуй паарка саҥардылларын туһугар улэлии-хамсыы сылдьар дьоҥҥо-сэргэҕэ барыларыгар ананар, маннык оҕолуу ыраас тыллар, түгэннэр тутар, оҥорор дьоҥҥо олус суолталаах уонна уратылаах буолаллар. Күүспүтүгэр күүс эбиллэн кэнчээри ыччаппыт туһугар иннин диэки!» – диэн Ньурба куорат баһылыга Александр Иванов соһуччу үөрүү туһунан этэр.

«Ньурба» хаһыат

Оставить комментарий

Войти с помощью: