Skip to content

АНОНС

Открылся канал нашего портала в Ютубе - Канал «Якутия. Образ будущего»

Тыа сирин олохтоохторугар — 0,1 бырыһыаннаах ипотека

Тыа сирин олохтоохторугар 2020 сылтан 0,1%-наах ипотека киирэн эрэр. Бу “Тыа сирин кэлим сайыннарыы” федеральнай бырагыраама чэрчитинэн ыытыллар.

edersaas.ru


2020 сылтан үлэлиэхтээх

Уонча сыллааҕыта ипотекабыт 15-17% эрдэҕинэ, 8-9% туһунан ыраламмат да этибит. Онтон 0,1 % диэн – босхону эрэ үрдүнэн буоллаҕа. Дьэ, киһиэхэ барытыгар биэрэллэр эбит дуу? Усулуобуйата хайдах эбитий?

Кэнники кэмҥэ дойду салалтата тыа сирин сайыннарар былааннаах. 2019 сыл ыам ыйын 31 күнүгэр РФ бырабыыталыстыбатын  696 №-дээх уурааҕа тахсан, “Тыа сирин кэлим сайыннарыы” федеральнай бырагыраама ылыллыбыта. 2020-2025 сс. үбүлээһинэ – 2,3 триллион солкуобай.

Бу бырагыраама биир сүрүн хайысхата – тыа сирин олохтоохторугар 0,1%-наах ипотека. Кистэл буолбатах, тыа сириттэн куоракка көһүү уонча, сүүрбэччэ сылы быһа бара турар. Тыа сирин нэһилиэнньэтэ аҕыйыы турар, олох усулуобуйата мөлтүүр. Онон бу бырагыраама сыала-соруга – дьону тыа сиригэр олохсутуу. Ол туһунан соторутааҕыта РФ тыатын хаһаа­йыстыбатын миниистирин солбу­йааччы Оксана Лут иһитиннэрбитэ.

Өскөтүн эрэгийиэн бэйэтэ эбии харчы угар буоллаҕына, федеральнай бүддьүөттэн үп биэрэллэр. Холобур, былаан быһыытынан, дойду үрдүнэн 5 сылга федеральнай бүддьүөттэн 1 триллион солкуобай, эрэгийиэннэртэн эмиэ 1 триллион солкуобай көрүллүөхтээх. Холобур, быйыл федеральнай бүддьүөт Саха сиригэр 1 миллиард солкуобайы тыыран олорор. Өскөтүн ипотека бырыһыана билигин ортотунан 9-10% буоллаҕына, 3%-ҥа диэри араастаһыытын федеральнай бүддьүөт субсидиялыыр, эрэгийиэннэр хаалбыт 2,9%-нын төлүүллэр. Онон бу бырагыраамаҕа кыттыһар дьон 0,1%-наах ипотеканан туһанар кыахтаахтар.

Саха сиригэр бу бырагырааманан тыа хаһаайыстыбатын министиэристибэтэ быһаччы дьарыктанар. Онон тыа хаһаайыстыбатын миниистирэ Александр Атласовы көрсөн, сиһилии кэпсииригэр көрдөстүбүт.

“Бырагыраама олоххо киирдэ диир эрдэ”

— Тыа сирин олохтоохторугар 0,1%-наах ипотеканы биэрии “Тыа сирин кэлим сайыннарыы” федеральнай бырагыраама тыа сиригэр олорор дьону чэпчэки бырыһыаннаах ипотека көмөтүнэн олорор дьиэнэн хааччыйарга туһуламмыт. Биһиги өрөспүүбүлүкэтээҕи “Тыа сирин кэлим сайыннарыы” бырагырааманы оҥорбуппут, ол билигин бигэргэнэ илик.

Холобур, Арассыыйа Тыатын хаһаайыстыбатын министиэристибэтэ, федеральнай бүддьүөт 10-тан 3%-ҥа диэри ипотеканы биэрэр бааннары субсидиялыыр. Биһиэхэ бу бырагы­раамаҕа кыттыһар боломуочуйалаах, тыа сиригэр киэҥник тэнийбит икки баан: Сбербаан уонна Россельхозбаан кытталлар. 3-тэн 0,1%-ҥа диэри субсидиялыыры эрэгийиэннэр бэйэлэрэ бы­­һаараллар. Биһиги өрөспүүбүлүкэтээҕи “Тыа сирин кэлим сайыннарыы” бырагыраамабытыгар итини этии быһыытынан киллэрдибит. Ол Ил Түмэҥҥэ, бырабыыталыстыбаҕа хайдах бигэргэнэриттэн, ылылларыттан тутулуктаах. Онон билигин бу бырагыраама ылылынна, олоххо киирдэ диир эрдэ буолуо. Биһиги, тыа хаһаа­йыстыбатын министиэристибэтэ, бу боппуруоһу туруорсабыт.

Бырагыраамаҕа тыа сиригэр олорор ханнык баҕарар дьон, идэтиттэн тутулуга суох (быраас, тутааччы, тыа хаһаайыстыбатын үлэһитэ, урбаанньыт, уод.а.), бары кыттар кыахтаахтар. Сүрүн усулуобуйата – тыа сиригэр олорор, үлэлиир-хамсыыр киһи буолуохтаах. Сааһынан хааччаҕа – 23-тэн 61 сааска диэри. Манна баан ипотека биэрэр атын ирдэбиллэрэ үлэлииллэр: кирэдьиит ылар киһи ыйдааҕы төлөбүрүн уонна бастакы усунуоһун (10 %) төлүүр кыахтаах, ол эбэтэр үлэлээх-хамнастаах, тыа сиригэр бырапыыскалаах, бааҥҥа иэһэ суох буолуохтаах. Балаһыанньа быһыытынан, куораттарга уонна куорат кытыытынааҕы бөһүөлэктэргэ (Хатаска, Тулагыга, о.д.а.) олорор дьон кыттыбаттар. Оттон улуустарга баар, 30 тыһыынчаҕа диэри нэһилиэнньэлээх куораттар (Бүлүү, Ньурба, о.д.а.) бырагыраамаҕа кытталлар. Ипотека болдьоҕо – 25 сылга диэри.

— Үбүлээһинэ төһө буолуой?

— Кэлэр сылга 1 миллиард солкуобай. 2025 сылга диэри сыл аайы биирдии миллиарды биэ­рэллэр. Холобур, дьон 2-лии мөлү­йүөнү ылар буоллахтарына, сылга 500 киһи ылыан сөп. 2 мөлү­йүөнтэн кыраны ыллахтарына, 800-чэкэҕэ диэри киһи туһаныан сөп. Онон сыл аайы 500-800 киһи ылара былааннанар. Манна уочарат диэн суох. Бырагыраама кэлэр сылтан үлэлиэхтээх, барыта бигэргэнэн, илии баттанан, бааннар үлэлэрин саҕалаатахтарына, тыа сирин олохтоохторо Сбербааҥҥа дуу, Россельхозбааҥҥа дуу быһа тиийэн, докумуоннарын барытын биэрдэхтэринэ, ылар кыахтаахтар.

«Куоракка дьиэ атыылаһар көҥүллэммэт»

— Саҥа дьиэни туттарга, атыылаһарга эрэ бэриллэр дуу, урут тутуллубут дьиэни эмиэ атыылаһыахха сөп дуу?

— Урут тутуллубут дьиэни атыылаһар көҥүллэнэр. Аны, тыа сиригэр олорор киһи кирэдьиит ылан баран, куоракка дьиэ атыылаһара көҥүллэммэт. Бааннар ону кы­­таанахтык ирдииллэр, докумуонун көрөллөр. Регистрациялыыр балаатаҕа дьиэни атыылаһар дуогабары эҥин барытын көрөллөр.

Тыа сиригэр олорор дьоммут дохуоттара эппиэттэһэн, доку­муоннара барыта сөп түбэ­һиэн наада. Сүрүн ирдэбиллэрэ син биир баан ирдэбиллэрин курдук, онон барыта наһаа судургу буолбата биллэр. Дойдубут бэрэси­дьиэнэ Владимир Путин, тыа ха­­һаайыстыбатын миниистирэ Дмитрий Патрушев сыаллара-соруктара, уопсай бэлиитикэлэрэ тыа сиригэр дьон олорор усулуобуйатын тэрийэн, олохсута хаалларыы буолар. Дьиэни-уоту тутууну, оҥорон таһаарыыны элбэтэн, тыа хаһаайыстыбатыгар эрэ буолбакка, атын да салааларга үлэлээн-хамсаан, дохуоттаах буоллуннар диэн ылыллыбыт, ырааҕы өтө көрөр бырагыраама буолар.

Бу бырагыраама олоххо киэҥник киирдэҕинэ, тыа сиригэр улахан хамсааһын тахсыан сөп. Эргэ дьиэлэрин көтүрэн, саҥа дьиэ туттар ыал элбиэҕэ. Ону тэҥэ, ­дьиэтэ-уота суох, атахтарыгар саҥа тура сатыыр эдэр ыалларга улахан төһүү күүс буолар чинчилээх.

Онон, маннык бэртээхэй түгэни мүлчү туппакка, бу чугастааҕы сылларга саҥа дьиэлэнэр, оҕолору дьиэлиир, тыа сиригэр бигэтик олохсуйан, үлэлиир-хамсыыр, төрөөбүт дойдуну сайыннарар туһунан толкуйданыаҕыҥ!

Ангелина Васильева, «Саха сирэ» хаһыат, edersaas.ru

Төһө барыстааҕый?

Биллэн турар, “босхону үрдүнэн” кирэдьиит барыстааҕа көстөн турар. Ол эрэн, “саха тутан-хабан көрдөҕүнэ, сатанар” дииллэринии, сыыппара хараҕынан көрөн, “ипотека калькуляторынан” ааҕан-суот­таан көрүөҕүҥ.

1-кы холобур

Кирэдьиит суумата: 2 мөлү­йүөн солкуобай.

Бастакы усунуоһа: 200 тыһыынча солкуобай.

Кирэдьиит төлөнөр суумата: 1800000 солкуобай.

Болдьоҕо: 25 сыл.

Бырыһыана: 10%.

Көрүҥэ: Аннуитетнай төлөбүр.

Төннөрүллэр уопсай суумата: 4 906 984 солкуобай.

Ыйдааҕы төлөбүрэ – 16 357 солкуобай.

Быһаарыы: Бу 25 сыл устата барыта 4 мөлүйүөн 906 тыһыынча солкуобайы, ол иһигэр аҥаардас бырыһыанын 3 мөлүйүөн 106 тыһыынча 986 солкуобайы бааҥҥа төлүөххэ наада.

2-с холобур

Кирэдьиит суумата: 2 мөлү­йүөн солкуобай.

Бастакы усунуоһа: 200 тыһыынча солкуобай.

Кирэдьиит төлөнөр суумата: 1 800 000 солкуобай.

Болдьоҕо: 25 сыл.

Бырыһыана: 0,1%.

Көрүҥэ: Аннуитетнай төлөбүр.

Төннөрүллэр суумата: 1 822 669 солкуобай.

Ыйдааҕы төлөбүрэ – 6 076 солкуобай.

Быһаарыы: Бу 25 сыл устата баан бырыһыана – 22 тыһыынча 669 солкуобай эрэ! Ол эбэтэр сылга 906 солкуобайы, ыйга 76 солкуобайы эрэ бырыһыаҥҥа биэрэҕин. Дьэ, кырдьык, босхону эрэ үрдүнэн буолар эбит. Тыа ыала ыйга 6 тыһыынчаны биэрэ олорон, 25 сылы быһа чэпчэкитик төлүөн сөп буоллаҕа. Этэргэ дылы, маннык үчүгэй усулуобуйаны судаарыстыба өссө олохтуу илигэ. Арай, сэбиэскэй кэмҥэ дьиэни босхо биэрии эрэ куоһарара буолуо…

© edersaas.ru сайтан: http://www.edersaas.ru/tya-sirin-olohtoohtorugar-0-1-byry-yannaah-ipoteka/

 

Оставить комментарий

Войти с помощью: