Skip to content

АНОНС

Открылся канал нашего портала в Ютубе - Канал «Якутия. Образ будущего»

Ньурбаҕа 280 миэстэлээх оҕо уһуйаанын бастакы сыбаайата түстэ

Сегодня, 15:06

Бүгүн Ньурба куоратыгар “Вертолетка” микро-оройуонугар 280 миэстэлээх “Кэскил” дьыссаат саҥа таас дьиэтин 1-кы сыбаайата түһэрилиннэ. Улууска маннык баараҕай эбийиэк тутуута “Үөрэхтээһин” национальнай бырайыакка киллэриллэн, федеральнай бүддьүөттэн үбүлэнэр буолла. Быйыл манна 106 мөл. солк. көрүлүннэ.


Бэлиэ тэрээһиҥҥэ Ньурба улууһун уонна куорат салайааччылара, Дьокуускайтан ыалдьыттар, үөрэх тэрилтэлэрин, оҕо уһуйааннарын үлэһиттэрэ, төрөппүттэр уо.д.а. кытыннылар.

Сахалыы сиэри-туому норуот талааннааҕа Валентина Сухаринова толордо. Истиҥ эҕэрдэ тылы улуус баһылыга Алексей Иннокентьев, улуус Сүбэтин бэрэссэдээтэлэ Сергей Евсеев, Ил Түмэн аппараатын информационнай-аналитическай управлениетын салайааччытын солбуйааччыта Георгий Иванов, Ньурба к. баһылыгын солбуйааччы Яков Замятин, Ньурбаҕа кэлэ сылдьар Амма улууһун баһылыга Николай Архипов, бэдэрээтчит – “Ярус” ХЭТ салайааччыта Степан Петров эттилэр. Кинилэр национальнай бырайыакка уонна федеральнай бырагыраамаларга кыттан, үлэ маннык салҕанан бара туруоҕар бигэ санааларын уонна үтүөнү баҕарыыларын биллэрдилэр.


Үөрүүлээх быһыыга-майгыга улуус баһылыга Алексей Иннокентьев, ИСУ салайааччыта-улуус баһылыгын тутууга уонна ОДЬКХ-ҕа солбуйааччыта Макар Семенов, улуустааҕы үөрэх управлениетын салайааччыта Алевтина Аргунова уонна “Кэскил” оҕо уһуйаанын дириэктэрэ Оксана Самсонова сыбаайаны түһэриигэ ыҥырылыннылар.


Ньурба 1-кы №-дээх “Кэскил” оҕо уһуйаана хас да хонугунан тэриллибитэ 90 сылын бэлиэтиир. Дьыссаат элбэх ахсааннааах үлэһиттэригэр, төрөппүттэригэр уонна иитиллээччилэригэр бүгүҥҥү күн бу курдук улахан үөрүүнү аҕалла. Улууска бастакынан маннык баараҕай оҕо уһуйаанын дьиэтэ номнуо 2020 с. ахсынньыга бүтэн үлэҕэ киирэрэ былааннанар.


1982 сылтан манна дириэктэринэн ситиһиилээхтик үлэлии-хамсыы сылдьар РФ уопсай үөрэҕин бочуоттаах үлэһитэ, СӨ үөрэҕин үтүөлээх үлэһитэ уонна СӨ үөрэҕин туйгуна Оксана Самсонова кинилэр өр кэмҥэ кэтэспит кэтэһиилэрэ туолан олоххо киирэн эрэриттэн улаханнык үөрэрин биллэрэр.

Ааптар: Геннадий АНТОНОВ.

Оставить комментарий

Войти с помощью: