Skip to content

АНОНС !!!

Баай Белолюбскай “дворянскай” уһаайбата

Сегодня, 14:15

Амма Соморсунун сис баайа Петр Белолюбскай оностубут уһаайбата күн бүгүнүгэр диэри сөхтөрөр. 


Амма сахаларын биир аатырбыт баайдарынан   Белолюбскайдар буолаллар.  Кинилэр Халаалы Хотун тапталлаах сиэниттэн  Мээндиги  Хотунтан  силис тартарыылаахтар.

Белолюбскайдартан ордук биллэр,  кинээс дуоһунастаах , үөрэхтээх киһинэн 1797 сыллаах төрүөх , сахалар Степной Думаларын 1827-1833 сылларга биир актыыбынай чилиэнэ Михаил Петрович Белолюбскай буолар. Ол  биир туоһутунан  Саха сирин губернатора Николай Иванович Мягковы эккирэтиһэн уураппыттарыгар хомойон-аһыйан “Сам он, полный сил и здоровья,работал до изнеможения на протяжении 6-7 лет во имя будущего благополучия якутов. Годы его работы якут считал своим счастьем…”, диэн суруйбуттарыгар кыттыһан, Амма сахаларын ааттарыттан “Михайло Белолюбский ” диэн 1832 сыл олунньу 25 күнүгэр докумуоҥҥа илии баттаабыта буолар. Кини курун алтан тимирэ күн бүгүн Мээндиги музейыгар хараллыыга сытар, “1848 год М.П.Б. ” диэн суруктаах”, — диэн кэпсиир кыраайы үөрэтээччи Михаил Алексеев. Михаил Васильевич Амма улууһун, ону сэргэ төрөөбүт Соморсунун нэһилиэгин историятын, онно төрөөн-үөскээн ааспыт дьонун-сэргэтин олохторун  олус үчүгэйдик билэр.

Дьэ кини кэпсээниттэн Михаил Белолюбскай уола Петр Михайлович, 1839 сыллаах төрүөх киһи,  700 сүөһүлээҕин,  улахан баайынан биллэрин ааһан, сырдыкка, кэрэҕэ тардыһар киһи буоларын биллим. Ол курдук бу киһи үс улахан уһаайбалаах эбит. Дьэ оннук биир алааһыгар кини дьону күүлэйдэтэргэ диэн тиит мастары ыраас сиргэ олордон аллея оҥорбут. Онно тахсан хаамсаллар эбит. Мастары кыйа бээгэй күрүө туппут. Саха норуотун суруйааччыта Баһылай Харысхал Михаил Васильевичтыын ону тахсан көрдөрдүлэр. Дьэ чахчы киһи сөҕөр. 150 сыл аннараа өртүгэр олордуллубут мастар күн бүгүнүгэр диэри кэчигэрэһэн тураллар.

Аттыларыгар ордон хаалбыт күрүө остуолбалара, сиэрдийэлэрэ көстөллөр. Кинилэр бу курдук, дьыл баччатыгар диэри тиийэн кэлбиттэр уонна оччотооҕу кэмҥэ олорбут сахалар прогрессивнай өйдөөх-санаалаах эбиттэрин туоһулууллар. Билигин ол олордуллубут мастар, сиэмэлэрин быраҕаннар, алааска арыы тыа баар буолбут. Онно дьэдьэн үүнэр, моонньоҕон ситэр.

Ааптар: Наталья Бубякина

Оставить комментарий

Войти с помощью: