МЭҤЭ ХАҤАЛАСТАР ЧЭПЧЭКИ АТЛЕТИКАҔА БАСТАКЫ ЧӨМПҮЙҮӨННЭРЭ
От ыйын 3 күнүттэн Амма улууһугар Саха сирин норуоттарын VII спортивнай Оонньуулара саҕаланан биирдиилээн көрүҥнэринэн сытыы киирсиилэр саҕаланнылар. Оонньуулар иккис куннэригэр от ыйын 4 күнүгэр күн бастакы аҥарыгар чэпчэки атлетикаҕа Мэҥэ Хаҥаластар инники күөҥҥэ тутар, эрэнэр ыччаппыт Георгий Шергин атах оонньууларыгар үстэ төхтүрүйэн ыстаныыга 15 миэтэрэ 75 см уһуну ыстанан, Саха сирин норуоттарын VII Оонньууларын саҥа рекордун олохтоото. Георгий бэйэтэ билиһиннэрбитинэн, Намҥа 2014 сыллаахха ыытыллыбыт VI Оонньууларга ситиспит көрдөрүүтүн биэс сыл буолан баран тупсарбыт.
Бу көрдөрүү Арассыыйа маастарын нуорматын кирбиитигэр 15 см тиийбэтэ. Георгий бэлэмэ үчүгэйдик ааспытын, бүгүҥҥү күрэхтэһиигэ тыал кыратык мэһэйдэри үөскэппитин бэлиэтээтэ. Георгий тириэньэринэн СӨ үтүөлээх тириэньэрэ Борис Ильин буолар. Иккис миэстэни Кэбээйиттэн Яков Дмитриев ылла, үһүскэ Ньургун Лавров таҕыста. Ньургун Лавров тириэньэринэн Георгий Шергин бэйэтэ буолар. Оҕолорго Мичил Илларионовпыт 14 миэтэрэ 22 см ыстанан кыайыы өрөгөйүн биллэ. Маны сэргэ 400 миэтэрэ сүүрүүгэ Сокол Соколовпыт иккис миэстэни, Филиппов Ганя үьүс миэстэлэри ыллылар. Сарсын уһуну ыстаныыга күрэхтэьии сытыы киирсиилэрин кэтиэхпит.
Ааптар: Зоя ГЕРАСИМОВА
