Skip to content

АНОНС

Открылся канал нашего портала в Ютубе - Канал «Якутия. Образ будущего»

Открытое письмо вице-президента общины якутян г. Новосибирска, учёного, общественного деятеля И.Е.Максимова.

Болугур, с.Мындагаи
А.Н.Флегонтовой
Күндү аймахтарым Мөҥкүүдэлэр,
дьоһун-мааны биир дойдулаахтарым Болугурдар!
Саҥа үүнэр 2019 сылынан Үөскээбит ытык Буор Кутум – Болугур, ахтар-саныыр Ийэ Кутум – Мындаҕаайы, көтө дайбыт Салгын Кутум – Амма сиригэр Арассыыйа кииниттэн – Новосибирскай Академкуоратыттан итии-истиҥ эҕэрдэ тиэрдэбин!

Мин дьылҕабар 2018 сыл 80-Үрдэл Үбүлүөйбүн уруйдуу умнуллубат бэлиэни хаалларда. Кэрэкээн Аммам биэрэгэр сайын-күһүн иккитэ тиийэн атахпынан үктэммит дьоллоохпун. Быраатым Егор Капитонович кэргэнэ Светлана Иннокентьевна көмөтүнэн “Мин Мөҥкүүдэ уолабын” уонна мин “Киһи дьылҕатын салайынар экодухуобунай эйгэтэ” диэн боччумнаах үс кэриэс кинигэни таһааран, Болугур – Мөҥкүүдэ историятыгар өлбөт-сүппэт суолу хааллардыбыт.
23.06.2018 Мындаҕаайыга эдэр көлүөнэ сыбаайбатыгар балтыларбын кытары түбэһэн, биир дойдулаахтарбытын кытары көрсүбүт үөрүүлээхпин.
Улахан событиенан “Дабаан” үрдүк биэрэгэр мин үбүлүөйбэр аналлаах Ольга Иванова-Сидоркевич аатынан “Амма кырдалын ыччата” экофорум буолла (салайааччы Саргылаана Неустроева, Соморсун). Онно миигин арыаллаабыттара үс дьикти Кут-Сүр эйгэлээх доҕотторум, Международнай славянскай академия чилиэннэрэ: Валерий Ромм – культурологическай наука дуоктара, НГК-консерватория профессора, НГТОиБ-Сибиир Улахан театрын ветеран-балерона, Валерий Липенков – Аан дойдуга бастакы Күн Музейын төрүттээбит, Горнай Алтайга “Күн Дьиэтин” (Усть-Кокса) туттарбыт Үрүҥ Күн Таҥара куттаах киһи (Мындаҕаайыга таттаран үһүс кэлиитэ: 2008, 2010 уонна 2018с.с.) уонна Василий Оконешников – “№1 ойуун” дастабырыанньалаах Үрүҥ Ойуун В.А.Кондаков үөрэнээччитэ, “Шаманизм инженерията” салааны тэрийбит философ, “Урановый квантовый компьютер” – киһи доруобуйатын көннөрөр виртуальнай ньыманы айбыт учуонай. Өссө үөрэрим диэн, ядернай оборонаҕа кылааттаах доҕорум, “Саха-Чернобыль Союз” тэрийээччитэ, Иннокентий Егорович Кожуров (1938-2008) үтүө аатын төрөөбүт Болугуругар чөргүттүбүт.
Хомойуох иһин, олох диалектиката икки өрүттээх, дириҥ кутурҕаннары эмиэ көрүстүбүт. Бэс ыйыгар Мөҥкүүдэ-убайбын Константин Семенович Поповы уонна Евдокия Ивановна Михайлованы (Саввинаны) дьиэлэригэр тиһэх көрсүбүт эбиппин. Быраатым Егор эдэркээн кийиитин, Андрей Максимов кэргэнин Аняны ыарахан ыарыы былдьаан хомотто.
Махтанабын Болугур нэһилиэк Баһылыгар, оҕобор, Анна Флегонтоваҕа, бэтэрээннэр ытык салайааччыларыгар Николай-Киргиэс Михайловка, оскуола директорыгар, библиотека сэбиэдиссэйигэр миигин үөрэ-көтө көрсөн, форумҥа кыттан, атомщик-бомж (Вечерний Якутск 11.07.2008 суруйбутун курдук) курус санаабын чэпчэтээри сир учаастагын анаан Үрдүк Үбүлүөйбүм иэйиилээх долгуйуутун үллэстибиккитигэр!
Үрэллибит тыа сирин нэһилиэгэ кыаҕа кэмчитин өйдүүбүн. Кытаатын үтүөлээх дьонноргут ааттарынан Ытык Кэрэ сиргит историятын көмүскээн, аныгы баайдарга былдьатыман. “Бэс” тумулугар (барабыыт тула) Музейнай парка комплексын тэрийин. Уонна мин экодухуобунай оскуоланы тускуллуур бырайыагым ис хоһоонун, методологиятын, муудараһын дириҥник үөрэтэн, ыччаты иитэргэ туһанын, ис кут эрчимҥитин байытын.
Мин үйэм эппиэттээх, халбан кирбиитин аатыыллаатым, хайаабыт да иһин, дойдубар үөрэ-көтө тиийэ сылдьарым аҕыйаан истэҕэ. Ол иһин сиһилии суруйдум, наадалаах боппуруостары көтөхтүм. “Дабаан-80” Үбүлүөйүм туһунан эбии матырыйаал ыытабын. Төттөрү сибээскэ, актыыбынай көмөлөһөөччүлэргэ наадыйабын.

Саҥа 2019 сылынан – саҥа сырдык эрэлинэн барыгытыгар баҕарабын
кытаанах доруобуйаны, күүстээх санааны, экодухуобунай өрө күүрүүнү! Дьолу-Быйаҥы! Ситиһии силбэстин, кыайыы килбэйдин!
Уруй-Эҕэрдэ алгыһынан кууһабын
Амма атомщига, Мөҥкүүдэ мөлүөкүлэтэ Иоган Максимов
Новосибирскай 29.12.2018

Оставить комментарий

Войти с помощью: