ҮӨҺЭЭ БҮЛҮҮГЭ КИИН БОЛУОССАТ САҤАРДЫЛЫННА
Кэлиҥҥи кэмҥэ өрөспүүбүлүкэ үрдүнэн улуустар кииннэрэ олус тубустулар. Улуус дьаһалталара итиннэ сөптөөх болҕомто уурар буоллулар.
Бүгүн Үөһээ Бүлүүгэ кэрэ көстүүлээх Киин болуоссаты аһар үөрүүлээх түгэн буолла. Санатар буоллахха, улуус уонна Үөһээ Бүлүү сэлиэнньэтин дьаһалталарын дьиэлэрин икки ардынааҕы киэҥ нэлэмэн Киин болуоссаты саҥалыы тутуу бу сайыҥҥыттан саҕаламмыта. Алтынньы саҥата билиитэлэри тэлгэтэн бүтэрбиттэрэ.
Үөһээ Бүлүү саҥардыллыбыт болуоссата үөрүлээхтик аһылынна. Бу болуоссат уратылаах. Ортотугар сиртэн 10-ча см үрдүктээх анал үрдэлгэ улуус картата сандааран сытар. Онно көстөрүнэн уонна каартаҕа да көрдөххө, Үөһээ Бүлүү территорията уһун-синньигэс буолар: Бүлүү уонна Ньурба улуустарын кытта Түҥ уонна Түүкээн үрэхтэринэн быысаһар буолан итинник. Каарта үрдүнээҕи матырыйаала киһини уйар халыҥ, дьэҥкир оргөстүөкүлэ. Екатеринбург куоракка оҥорторбуттар. Ол анныгар улуус нэһилиэктэрэ үрэхтэригэр, күөллэригэр тиийэ ойууланан көрдөрүллэр. Хараҥаҕа светодиод лаампаларынан сырдаан көстөр буолан, ураты дьэрээкээн.
Болуоссакка улуус географическай картатын ойуулааһыны улуус баһылыга Владимир Поскачин толкуйдаан идиэйэлээбит. Тэрээһиҥҥэ Үөһээ Бүлүү сэлиэнньэтин олохтоохторо, ыалдьыттара кытыннылар. Саҥардыллыбыт болуоссаты үөрүүлээхтик аһыы кэмигэр «Праймер» холбоһуктаах эппиэтинэстээх тэрилтэ генеральнай дириэктэрин солбуйааччы Денис Иванов эҕэрдэ тылын этэн баран, болуоссат каартатын макетын Владимир Поскачиҥҥаүөрүүлээх быһыы-майгы ортотугар туттарда. Бу үөрүүлээх ураты күнүнэн улуус баһылыга: » Саха сирин үрдүнэн ханна даҕаны маннык карта оҥоһулла илик. Кэнчээри ыччат маны көрөн дойдута хайдаҕын билиэн, үөрэтиэн сөп. Хас биирдии киһи дойдутугар убаастабыллаах буолуохтаах, патриот буолуохтаах», — диэн бэлиэтээтэ. Мустубут дьону Петр Одорусов тылларыгар, Маргарита Саввинова матыыбыгар «Мин көҥүл сахабын!» ырыаны Виктор Новиков доргуччу ыллаата.
Маннык туспа ураты хабааннаах болуоссат эдэр көлүөнэ ыччаты, биллэн турар, патриотизм тыыныгар, Ийэ дойдуга тапталы, бэриниилээх буоларга иитэр-такайар.
Ааптар: «Үөһээ Бүлүү» хаһыат
