Skip to content

АНОНС !!!

НЬУРБАЛАР МОСКУБАҔА МУУС ОҤОҺУГУН ОҤОРУУГА КЫТТАЛЛАР

Сегодня, 13:27

 

 

Ньурба Өҥөлдьөтүн олохтоохторо дойдубут киинигэр Москубаҕа муус оҥоһук оҥоруутугар кытталлар. Кинилэр Горькай аатынан пааркаҕа  Космос тематыгар дьэҥкир бырайыагы олоххо киллэрэллэр. 


Соторутааҕыта ватсаап ситимигэр Москуба куоракка муус оҥоһугун куонкурсугар Өҥөлдьөттөн кытталларын туһунан сурах кэлбитэ. Үчүгэй сураҕы быһа гыммакка, Өҥөлдьө дьаһалтатын баһылыгын солбуйааччытыттан Раиса Андреевна Тимофееваттан кыттааччы Герасим Максимовка эрийэн билистибит. Герасим Егорович ситим нөҥүө үлэ хаамыытын туһунан кылгастык кэпсээтэ:

— Биһиги ахсынньы 1 күнүттэн Ньурба Өҥөлдьөтүттэн Август Михайловтыын, бииргэ төрөөбүт быраатым Намтан Григорий Егоровичтыын, Дьокуускайтан муус маастара Владислав Бурцев буолан Москубаҕа Горькай аатынан пааркаҕа муус оҥоһук бырайыагар кыттаммыт үлэлии сылдьабыт. Икки холодильнай полусфера иһигэр «Космос» тематыгар үлэлиибит. Ахсынньы 27 күнүгэр бүтүөхтээх. Манна Арассыыйа араас куораттарыттан 20 маастар кэлбиттэр.

Муус оҥоһукка аан бастаан миигин бырааттарым кучуйбуттара. Август Михайловтыын 2009 сыллаахха саҕалаабыппыт. Бииргэ төрөөбүт быраатым Егор Егорович  бу хайысхаҕа аан дойдуга 10-тан тахса төгүллээх чемпион, Григорий Егорович норуоттар икки ардыларынааҕы күрэхтэр призердара буолаллар. Бэйэм иккитэ иккис, биирдэ бастакы миэстэлэри ылаттаабытым. Бу иннинэ былырыын Германияҕа Берлин куоракка муус бырайыагар үлэлэспитим, онно 12 араас омук маастардара кыттыыны ылбыттара.

Түгэнинэн туһанан Сахабыт сирин олохтоохторун, Ньурбабыт улууһун дьонун-сэргэтин кэлэн иһэр Саргылаах Саҥа Дьылынан итиитик-истиҥник эҕэрдэлиибит! Саха сириттэн кыттааччыларга, чуолаан Герасим Егоровичка айымньылаах үлэлэрэ ситиһиилээх буоларыгар баҕара хаалабын.

Ааптар:  Антонина СЕМЕНОВА.

Оставить комментарий

Войти с помощью: