ҮӨҺЭЭ БҮЛҮҮЛЭР НИКОЛАЙ ЯКУТСКАЙ ҮБҮЛҮӨЙҮН ДЬОКУУСКАЙГА БЭЛИЭТЭЭТИЛЭР
Үөһээ Бүлүү улууһун Харбалаах нэһилиэгиттэн төрүттээх суруйааччы Николай Гаврилович Золотарев — Николай Якутскай төрөөбүтэ 110 сыла. Онно аналлаах тэрээһиннэр киэҥ далааһыннаахтык Дьокуускай куоракка сэтинньи 22 күнүгэр ыыттылар. Биир дойдулаахтара өрөгөйдөөх дьаһалы тэрийдилэр.
Саха литературатын кыһыл көмүс көһөҥөтө, өлбөт-сүппэт айымньылардаах, офицер-пограничник, «Үлэ Кыһыл Знамята», «Норуоттар доҕордоһуулара», «Бочуот Знага» уордьаннар кавалердара, норуот суруйааччыта, ССРС суруйааччыларын сойууһун чилиэнэ Николай Якутскай үбүлүөйдээх төрөөбүт күнэ.
Ярославскай аатынан хотугу норуоттар устуоруйаларын култуураларын түмэлигэр үөһээ бүлүүлэр мустан, «Олоҕум — айымньыларбар» диэн албан ааттаах, суон сурахтаах суруйааччы айар олоҕун, үйэлээх айымньыларын көрдөрөр быыстапка тэрийдилэр. Арыллыытын аалай лиэнтэтин РФ култууратын үтүөлээх үлэһитэ, Ярославскай түмэлин дириэктэрэ Е.С. Шишигин, Үөһээ Бүлүү улууһун баһылыгын социальнай боппуруостарга солбуйааччы Л.С. Тойтонова, Н.Якутскай түмэлин төрүттээччи, СӨ култууратын туйгуна, Үөһээ Бүлүү улууһун уонна Харбалаах нэһилиэгин бочуоттаах олохтооҕо Светлана Даниловна Копыленко быстылар.
Быыстапкаҕа Молдавияттан Тирасполь куораттан кэлбит Николай Якутскай дьиэ кэргэнин архыыбыттан хаартыскалара, илиинэн суруйбут айымньылара, докумуоннара, тутта сылдьыбыт мала-сала, итиэннэ аатырбыт «Төлкө» романынан туруоруллубут испэктээкилгэ сүрүн дьоруойдара кэппит таҥастара-саптара, испэктээкил афишата дьон кэрэхсэбилин ылла.
Былатыан Ойуунускай аатынан Саха тыйаатырын артыыстара «Төлкө» романыттан быһа тардан Маайа оруолугар Ньургуяна Шадрина, Сүөдэри Дмитрий Татаринов олус үчүгэйдик оонньоон көрдөрдүлэр. Онтон «Көмүстээх үрүйэ» аймньытынан Үөһээ Бүлүүтээҕи норуот айымньытын киинин дириэктэрэ Дмитрий Дьячковскай Сэдьүүк оруолун олус бэрткэ оонньоон көрөөччү хайҕабылын ылла.
Онтон саха балаҕаныгар «Үтүө киһи умнуллубат мөссүөнэ» диэн истиҥ-иһирэх кэпсэтии тэрилиннэ. Манна култуура нэһилиэстибэтин харыстааһын департаменын салайааччы Николай Макаров, Ил Түмэн дьокутаата Марфа Филиппова, Павлов Анатолий Николаевич — Дабыл, Арчылан, норуот суруйааччыта Сэмэн Тумат, СӨ култууратын үтүөлээх үлэһитэ Афансий Дмитриевич Аммосов, Чолбон сурунаал редакторын солбуйааччы Гаврил Андросов, Саха норуодунай суруйааччыта Сэмэн Тиитэбис Руфов уолаттара Валерий уонна Максим Руфовтар,нэһилиэктэр баһылыктара, култуура үлэһиттэрэ, ыҥырыылаах ыалдьыттар, уопсастыбаннас кыттыыны ылла. Эһэтинэн Харбалаахтан силистээх-мутуктаах эстрада чаҕылхай ырыаһыта Эрхаан күндү ыалдьыт буолан, истиҥ ырыатынан кэлбит дьон көҕүн көҕүлээтэ.
Норуот суруйааччыта Сэмэн Тумат:
— Николай Якутскай мин РФ суруйааччыларын сойууһугар киирэрбэр мэктиэ биэрэн, суруйааччы буола үүммүтүм. Кини олус наадалаах, ыгыылаах кэмҥэ Саха сирин суруйааччыларын сойууһун бэрэссэдээтэлинэн үрдүк таһаарыылаахтык үлэлээбитэ. Саха литературата саамай тэпсиллэр кэмигэр көмө-тирэх буолбута диэн дириҥ махталбын тиэрдэбин. Эһиги, үөһээ бүлүүлэр, Николай Гавриловиһы ытыктаан, күндүтүк санаан, суох да буолбутун кэннэ 110 сааһын бэлиэтииргит хайҕаллаах. Дьоро күнүн умнубакка, күнүн күнүгэр бүтүн өрөспүүбүлүкэҕэ бачча элбэх дьону түмпүккүт кэрэхсэбиллээх.
Бу көрсүһүүнү Светлана Копыленко олус истиҥник ыытта. Кини суруйааччы төрүөҕүттэн хара өлүөр диэри олоҕун кэрчиктэрин бу баардыы илэ кэпсээн, мустубут дьон улуу суруйааччы туһунан элбэҕи билэн, ытыктыыллара, сүгүрүйэллэрэ өссө дириҥээтэ.
Ааптар: Валентина Догоюсова, Дьокуускай
