Skip to content

АНОНС

Открылся канал нашего портала в Ютубе - Канал «Якутия. Образ будущего»

Ааҕыыттан сайдаҕын, үгүһү билэҕин….

🖋🗒Николай Николаевич Аржаков- Боло Уус, Чурапчы улууһуттан төрүттээх, кыраайы үөрэтээччи, мындыр уус, хас да кинигэ ааптара суруйааччы, саха хомуһугар, кыл хомуска дэгиттэр оонньооччу.

2017с. Польшаҕа Закопане куоракка ыытыллыбыт фольклор тыыннаах доҕуһуол бэстибээлигэр лауреат үрдүк аатын ылан кэлбитэ. Бу айаныгар Николай Николаевич бэйэтэ оҥорбут хомуһун, кырыымпатын, туойчускуурайын, кылыргыыр тэриллэрин, дүҥүрүн илдьэ барбыт. Маннык сахалыы инструменнары тыаһатарын таһынан хабарҕа ырыатын биир кэмҥэ дьүөрэлии толорон дипломант үрдүк аатын ылбыта. Кини ураты фольклорнай толорооччу буолан, биир кэмҥэ хомуһу кытта хабарҕа ырыатын дьүөрэлиир, онтон биир намчы тыллаах хомуһу эбэн, тылы тарбахтарынан тардыы, төттөрү-таары охсуу, уһуннук эҥээритэн тардыы ньымаларын туһанан, тыыныы уонна бэлэс дорҕооннорун таһааран, биир тардыыга хаста даҕаны кэҕэлээһини көрдөрбүтэ. Ити курдук Николай Николаевич хомустар, кырыымпа, сиксиир, туой чускуурайдаах бөлөҕүнэн, сахалыы матыыптары тыаһатан иһитиннэрэллэр эбит. Хомус намыһах уонна үрдүк тыастаах диэн араарыллар эбит.
Үрдүк тыастаах хомуска “Күөрэгэй чыычаах”, уонна ” Үчүгэйиэн алааспар”-ырыалар матыыптарын үрдүк дорҕооннору саҕан тардар эбит.
Намыһах тыастаах хомуһунан оонньууругар С.Зверев ” Сарсыарда” ырыатын матыыбын көҥкөлөй, күөт, кылыһах дорҕооннорунан киэргэтэн биэрэр эбит, ону таһынан кырыымпаҕа оһуокайы кытта дэгэрэҥ матыыбын оонньуур уран талаан киһи.
Хомуска биир дорҕоону, хас даҕаны кылгас дорҕооннорунан солбуйар “тремоло” диэн ньыманан оонньуурун, истээччилэр олус сэҥээрэллэр эбит. Ону кытта хомуска суор халаахтыыр саҥатын таһааран уонна хабарҕа ырыатын дорҕооннорунан композицияларын киэргэтэр.

ДЬэ, ити курдук саха виртуоз хомусчута, уран тарбахтаах уус маастара, хайдах курдук сахалыы инструменнары доҕуһуоллаан, саха омук колоритнай, сэдэх тыаһын, айылҕатын, көтөрүн саҥатын- иҥэтин саталлаахтык тириэрдэрий…
Биһиги литературабыт чулуу поэта С,С,Васильев этэн турар, ”
.,..киһи аҕыс кырыылаах буолуохтаах,
Кылыстыы кылбаҥныы оонньуохтаах..диэн этэн-тыынан хаалларбыта, хайдах эрэ бу Боло Уус айылҕаттан дьоҕуругар этиллибит курдуктар…
Онон, түмүктээн эттэхпинэ, маннык сахалыы тыыны, эйгэни ыраастык илдьэ сылдьар дьоммутун харыстыыр,кинилэр тылларын, сүбэлэрин, аттыбытыгар илдьэ сылдьан кэрэни кэрэ курдук тарҕатан, көстөр холобур оҥостон, омукпут симэлийбэт баайын ыспакка-тохпокко илдьэ сылдьар дьоммутун ытыктыах, харыстыах тустаахпыт.
Сахабыт тылын көмүс дорҕооно, куйаарын тэтимэ хомуспутугар, ыраастыыр-эмтиир анала тойукпутугар өрүү иһиллэ, дуораан буолан дьиэрэйэ туруохтун!
Айгыына🌹
Суотту, Уус Алдан

Оставить комментарий

Войти с помощью: