Skip to content

АНОНС !!!

НЬУРБАҔА ТУМАН БУОЛБУТ ХОНУКТАР НЬИРГИЭРДЭРЭ ИҺИЛИННЭ

31 октября 18, 18:01

 

 

Ньурбаҕа Хомсомуол 100 сылын үбүлүөйдээх тэрээһиннэрин түмүктээтилэр. Кыһыл былаахтаах улуу дойдуну тутан олорбут оччотооҕу былаас тыына, кута-сүрэ тиллибиккэ дылы буолла. 


Ньурбалар Ленинскэй Хомсомуол 100 сылын туолар өрөгөйдөөх үбүлүөйүн тэрээһиннээхтик бэлиэтээтилэр. Ксенофонт Уткин аатынан Норуоттар доҕордоһууларын уонна улуустааҕы бибилэтиэкэ тэрийбит, Хомсомуол историятын көрдөрөр быыстапка аһылынна. Ил Түмэн бэрэссэдээтэлин солбуйааччы Антонина Григорьева, Ил Түмэн сиргэ сыһыаннаһыыларга, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев уонна улуус, куорат салайааччылара, уопсастыбаннас бэрэстэбиитэллэрэ кытыннылар. Аҕа уонна орто саастаах көлүөнэ дьонугар хомсомуол саҕанааҕы эрчимнээх, үтүөкэн кэрэ кэмнэрин урукку хомсомуол үгүс экспонаттара долгута санаттылар.

Бу кэнниттэн гражданскай сэриигэ Ньурба оборуонатын инники кирбиитэ буолбут Нюрбинка үрэх үрдүгэр сүүһүнэн киһи тоҕуоруста. Өр сылларга дойдубут килбиэннээх историятын чаҕылхай кэрэһитэ буолбут, улахан кыайыыларга сирдээбит уонунан кыһыл былаахтар тыалга тэлимнии-кытыаста кыыстылар. Үрэҕинэн синиэллээх, буденновкалаах аттаах дьон кэлиитэ Эллэй «Буурҕа буулдьа дьылыгар» бэйиэмэтэ илэ тиллэн кэлбитин курдук  буолла…

 

Мустубут дьону үбүлүөйдээх бэлиэ түгэнинэн  улуустааҕы Ытык Сүбэ бэрэссэдээтэлэ Михаил Иванов истиҥник эҕэрдэлээтэ. «Кыталык» култуура киинигэр диэри сэлэлээн хаамсыы ыытылынна, ол быыһыгар дойду историятын улахан бэлиэ түгэннэрин санатыһан, Степан Васильев уонна Ньурба оборуонатын пааматынньыгар гирляндалар уурулуннулар.

17 чаастан култуура киинигэр Хомсомуол 100 сылыгар анаммыт уопсастыбаннас үөрүүлээх мунньаҕа буолла. Сүрүн дакылааты улуус Сүбэтин бэрэссэдээтэлэ, уруккута хомсомуол оройуоннааҕы кэмитиэтин 1-кы сэкирэтээрэ Сергей  Евсеев оҥордо. Кини хомсомуол килбиэннээх историятыттан сиһилии сырдатта, хомсомуол ыыппыт сүҥкэн үлэтин-хамнаһын туһунан өйдүү-саныы сылдьар уонна оҕоҕо-ыччакка тиэрдэн иһэр наадатын бэлиэтээтэ, инникитин ыччаты түмэр-сомоҕолуур маннык тэрилтэ үөскүүрүгэр кыһаныахтаахпыт диэн түмүктээтэ. Салгыы эҕэрдэ тылларын Ил Түмэн бэрэссэдээтэлин солбуйааччы Антонина Григорьева, Ил Түмэн сиргэ сыһыаннаһыыларга, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев, улуус баһылыгын 1-кы солбуйааччыта Артур Яковлев, Ньурба куорат баһылыгын солбуйааччы Илья Николаев, КПРФ райкомун 1-кысэкирэтээрэ Владимир Семенов, улуустааҕы ыччат бэлиитикэтин управлениетын кылаабынай исписэлииһэ Дайаана Васильева эттилэр.

Уруккута хомсомуол тэрилтэлэрин сэкирэтээрдэрэ, хомсомуол сийиэһин дэлэгээттэрэ, бырабыыталыстыба наҕараадалардаах уонна хомсомуол Киин кэмитиэтин Грамотатынан наҕараадаламмыт урукку хомсомуол актыбыыстара Владимир Семенов илиититтэн РФ КПРФ «Хомсомуол 100 сыла» уордьанын уонна КПРФ Киин Кэмитиэтин Грамотатын ылан үөрдүлэр-көттүлэр. Бырааһынньык өрө күүрүүлээх, өрөгөйдөөх эҕэрдэ кэнсиэринэн уонна үҥкүү-битии иһирэх киэһэтинэн түмүктэннэ.

Улууска бу курдук бары нэһилиэктэри хабан туран, хомсомуол тэриллибитэ 100 сылын бэлиэтиир араас тэрээһиннэр үрдүк таһымнаахтык ыытылыннылар. Улуустааҕы тыа хаһаайыстыбатын департаменын үлэһиттэрэ субуотунньуктаан, Октябрьскай нэһилиэккэ хортуоппуй  олордуутунан дьарыктанар ИП Борис Захаров Ньурба куорат овощехранилищетыгар ууруллан сытар хортуоппуйун талан, ыраастаан биэрдилэр.

Ааптар: Геннадий Антонов

Оставить комментарий

Войти с помощью: