Skip to content

АНОНС

Открылся канал нашего портала в Ютубе - Канал «Якутия. Образ будущего»

ҮӨҺЭЭ БҮЛҮҮ ХОМСОМУОЛЛАРА ЭДЭР КӨЛҮӨНЭЛИИН КӨРҮСТҮЛЭР

 

Үөһээ Бүлүүгэ «Тускул» оҕо киинин иһинэн үлэлиир «Лидер» куруһуок  Улуу Өктөөп 100 сылын көрсө  «Уруйдан Улуу Өктөөп» диэн бэрт интэриэһинэй тэрээһин ыытта. Аныгы уонна урукку көлүөнэ ыччаттарын  истиҥ көрсүһүүтүн тэрийдэ.


Үөһээ Бүлүүгэ үүнэн эрэр көлүөнэ ыччаттара Коммунист партия эрэллээх үлэһиттэрин кытта төгүрүк остуол тула муһуннулар. Ол курдук,1974-1975 сс. «Үөһээ Бүлүү сопхуоһун» комсомольскай тэрилтэтин босхоломмут сэкэрэтээрэ, 1979-1983 сс. хомсомуол Томпо оройуоннааҕы райкомун бастакы сэкэрэтээрэ, комсомол бэтэрээннэрин улуустааҕы сэбиэтин бэрэссэдээтэлэ Георгий Алексеевич Степанов, 1983-1984 сс. ЫБСЛКС Үөһээ Бүлүү оройуоннааҕы кэмитиэтин бастакы сэкэрэтээрэ Марина Спиридоновна Адамова уонна 1984-1986 сс. ЫБСЛКС Үөһээ Бүлүү оройуоннааҕы кэмитиэтин бастакы сэкэрэтээрэ Александр Васильевич Долгунов оччотооҕу төлөннөөх хомсомуоллар ааспыт күннэрин сөргүтэн, эдэр саастарын эргитэн, үлэнэн күүрбүт сылларын аҕыннылар. Манна мустубут оҕолор араас боппуруос ыйыттылар.

Георгий СТЕПАНОВ, хомсомуол бэтэрээннэрин улуустааҕы сэбиэтин бэрэссэдээтэлэ:

Биһиги хомсомуолга үлэлиир сылларбытыгар элбэх тэрээһиннэри, общественнай хамсааһыннары  ыытар этибит. Бу биһигини биир сомоҕо буоларбытыгар, салгыы бэйэ-бэйэбитин кытта доҕордуу сыһыан үөскүүрүгэр, сайдарбытыгар олук буолбута. Билигин үлэнэн, үөрэҕинэн эрэ сайдан сылдьыбаккын. Хайаатар даҕаны эбии дьарык оҥостон туһалааҕынан дьарыктаннаххына олоҕун интэриэһинэй, сэргэх буолар. Билиҥҥи көлүөнэ ыччат сайдарыгар араас общественнай хамсааһыннар бааллара олус үчүгэй. Бу мантан кинилэр кынаттанан этэргэ дылы, элбэх эриирдээх-мускуурдаах оскуоланы ааһаллар. Дьону кытта алтыһа, саҥара-иҥэрэ үөрэнэллэр, элбэх доҕордоноллор. Ыччат киириилээх-тахсыылаах, сатабыллаах, киэҥ билиилээх-көрүүлээх буоллаҕына олохпут сайдар кэскиллээх.

 Дьулустан ЗАХАРОВ, “Лидер” куруһуок иитиллээччитэ:

Хомсомуоллар олохторун эрдэттэн истэн билэр этим. Эбээлээх эһээм барытын кэпсээччилэр. Бүгүҥҥү көрсүһүүттэн өссө элбэҕи биллим, иһиттим. Бэйэм 2017 сылтан «Лидер» уонна «Сомоҕо» чилиэнинэн буолабын. Манна бастаан киирэрбэр симик, элбэх саҥата-иҥэтэ суох этим. Билигин дьону кытта уопсай тылы түргэнник булар, алтыһар буоллум диэн астынабын. Уопсастыбаннай олоххо, күрэхтэргэ кыттыы, араас таһымнаах тэрээһиннэри ыытыы киһиэхэ олус туһалааҕын биллим. Ис кыахпын арыйарга, баһылыырга үөрэнэ сылдьабын. Үөрэхпэр даҕаны олус туһалаата, бары өттүнэн сайдар эбиккин диэн санааҕа кэллим.

Күндэлэй ЯКОВЛЕВ, “Лидер” куруһуок иитиллээччитэ:

-Оччотооҕу оҕолор, эдэр ыччат олоххо тардыһыылара күүстээх эбит. Чахчы  хомсомуоллар бэйэлэрин холобурдарынан, үтүө санааларынан дьоҥҥо-сэргэҕэ убаастабылы, ытыктабылы ылыахтарын ылаллар эбит. Бары кинигэни чугас доҕор оҥостон билиилэрэ-көрүүлэрэ киэҥ, сайдыылаах, үөрэхтээх дьон буолан тахсыбыттар. Бэйэм биир саастыылаахтарбар, ыччакка кэрэҕэ, сырдыкка тардыһалларыгар  уонна интэриниэт ситимиттэн бириэмэ ордорон кинигэни тутан-хабан аа5алларыгар баҕарабын. Бэйэм кинигэ ааҕарбын олус сөбүлүүбүн.

Ааптардар:  Юра Тарасов, Емельян Егоров уонна Илиан Борисов

Оставить комментарий

Войти с помощью: