Skip to content

АНОНС !!!

СААСКЫЛААХХА ТӨҤҮЛҮТЭЭҔИ “АЛААС ЫАЛА” ТҮМСҮҮ САЛАЙААЧЧЫТА ЫАЛДЬЫТТААТА

 

Сааскылаахха аҕам саастаахтар аан дойдутааҕы күннэригэр анаммыт декада ыытыллар. Мэҥэ Хаҥалас улууһун Төҥүлү нэһилиэгиттэн «Алаас ыала» уопсастыбаннай түмсүү салайааччыта, оҕуруотчут, сибэккини таптаан үүннэрээччи Марта Григорьевна Романова ыалдьыттыыр. «Алмаас» култуура киинин аактабай саалатыгар кинини кытта көрсүһүү буолла.


Сааскылаахха ыытыллыбыт сонун тэрээһини Нэһилиэнньэ көмүскэллээх буолуутун киинин үлэһиттэрэ тэрийдилэр.

Көрсүһүүгэ аҕам саастаах дьон кэлэн көхтөөхтүк кытынна. Марта Григорьевна Романова мустубут дьоҥҥо «Алаас ыала» түмсүү үлэтин-хамнаһын, бэйэтин тус дьарыгын туһунан олус интэриэһинэй бэсиэдэни ыытта. Кини салайар “Алаас ыала” уопсастыбаннай түмсүү Мэҥэ Хаҥалас улууһугар 1997 сылтан, ол аата сүүрбэ биир сыл устата үлэлээн, күн бүгүнүгэр диэри үгүс дьону хабан, бэрт көхтөөхтүк үлэлиирин кэпсээтэ. Түмсүү нэһилиэк уопсастыбаннай олоҕор көхтөөхтүк кыттар, уопут атастаһар араас семинардары, лекциялары, быыстапкалары, дьаарбаҥкалары тэрийэн ыытар.

Марта Григорьевна сибэккини, оҕуруот аһын, отонноох мас арааһын үүннэриинэн, ас астааһынынан үлүһүйэн дьарыктанар ураты дьарыктаах киһи. Олоххо көхтөөх позициялаах киһи буоларын үгүс хаартыскалар, грамоталар, махтал суруктар кэпсииллэр. Марта Григорьевна Сааскылаахха дьүөгэтигэр Клара Гаврильевна Лазареваҕаыалдьыттыы кэлэ сылдьар.

Сибэккини олордууга араас сүбэлэри-амалары биэрдэ. Оҕуруот аһын хайдах хаһаанарын кэпсээтэ. Салгыы ыыһаммыт таба эттээх «Байдам» салааты уонна чыыр балыктан «Рыба в шубе» салааты уратытык киэргэтэн оҥорорго маастар-кылааһы ыытта, мустубут дьоҥҥо амсатта, алаадьылаах саламаатынан күндүлээтэ.

Тэрээһин мустубут ытык-мааны кырдьаҕастарбыт интэриэстэрин тарта, үүттээх итии чэй иһэ-иһэ өргө диэри ирэ-хоро кэпсэттилэр. Марта Григорьевнаҕа үгүс киһи махтал тылларын тиэртилэр, сэмэй бэлэхтэри туттардылар. Биэчэри култуура артыыһа Алексей Афанасьев байааннаах ырыатынан киэргэттэ. Нэһилиэнньэ көмүскэллээх буолуутун киинин эдэр специалистара флеш-моб үҥкүүлэтэн сэргэхситтилэр.

Аҕам саастаахтар күннэригэр анаммыт декада тэрээһиннэрэ манан түмүктэммэт, өссө да араас хабааннаах дьаһаллар тиһигин быспакка ыытыллыахтара.

Ааптар: «Анаабыр уоттара» хаһыат

Оставить комментарий

Войти с помощью: