НАМНАР “ДОЧЕРИ ЛЕГЕНДАРНОГО МАКСИМА” КИНИГЭНИ БАР ДЬОҤҤО БИЛИҺИННЭРДИЛЭР
Дьокуускайга М.К. Аммосов аатынан ХИФУ учуонайдарын Сэбиэтэ мунньахтыыр саалатыгар СР норуотун хаһаайыстыбатын Үтүөлээх үлэһитэ, М.К. Аммосов аатынан СР Государственнай бириэмийэтин уонна СР Ил Дарханын лауреата, Саха Республикатын, Нам улууһун уонна Хатырык нэһилиэгин Бочуоттаах гражданина Лена Максимовна Аммосова сырдык кэриэһигэр аналлаах дьоһун тэрээһин буолла. СР национальнай уонна ХИФУ научнай библиотекалара сырдык киһи олоҕун уонна үлэтин көрдөрөр быыстапка туруорбуттар.
Лена Максимовна Аммосованы кэриэстиир “Дочери легендарного Максима” диэн саҥа бэртээхэй кинигэ күн сирин көрбүтүн сүрэхтиир тэрээһиҥҥэ улууспут салайааччылара, нэһилиэктэрбит бэрэстэбиитэллэрэ, Дьокуускайга олорор биир дойдулаахтарбыт, ХИФУ устудьуоннара, преподавателлэрэ, Лена Максимовнаны кытта Москваҕа, СР бастайааннай бэрэстэбиитэлистибэтигэр бииргэ үлэлээбит салайааччылара, коллегалара, аймахтара кытыннылар.
Тэрээһини Нам улууһун депутаттарын Сэбиэтин бэрэссэдээтэлэ И.Р. Попов салайан ыытта.
Лена Максимовна сырдык кэриэһигэр бары чочумча чуумпуран ылбыппытын кэнниттэн, Хамаҕаттатааҕы Саха-француз лицейин үөрэнээччилэрэ “Чаҕылхай Максиммыт” диэн литературнай дьүһүйүүнү итийэн-кутуйан туран толордулар (сал. Ю.Ю. Парникова).
Н.М. Рыкунов аатынан Нам улууһун киин библиотекатын библиограба Сардаана Семенова быйыл “Бичик” национальнай кинигэ кыһатыгар таһаарыллыбыт “Дочери легендарного Максима” диэн кинигэ ис хоһоонун сиһилии кэпсээтэ, ырытта. Лена Максимовна кэргэнэ Владимир Михайлович Гольберг Москваттан видеонан ахтыытын, махталын, эҕэрдэтин иһиттибит: “Ее жизнь – это повесть о настоящем человеке. Она вся была настоящая: настоящая жена, настоящая мать и бабушка, прабабушка, настоящий ученый, настоящий руководитель, настоящий архивист, настоящая дочь своего великого отца якутского народа...”
Лена Максимовна, Яна Максимовна, Аэлита Максимовна уонна ийэлэрэ Раиса Израильевна Цугель-Аммосоватуһунан ахтыылары, истиҥ иһирэх этиилэри оҥордулар.
Нам улууһун баһылыга Ю.И. Слепцов кинигэ тахсыытыгар кылааттарын киллэрбит, сыралаһан үлэлээбит дьоҥҥо махтал суруктары уонна кинигэни бэлэх туттарда.
Бу дьоһун тэрээһини СР культуратын туйгуна Афанасий Татаринов салайар “Уолан” ансаамбыла “Аммосов Максиммыт” (Калистрат Еремеев т.; Афанасий Новгородов м.) ырыанан түмүктээтэ.
Кылгас ыспыраапка: Лена Максимовна 1937 сыллаахха күн сирин көрбүт, ССКП чилиэнэ, техническэй наука кандидата, С.А. Векшинскай аатынан вакуумнай техника институтун старшай научнай сотруднига, икки уоллаах – Михаил, Максим, кэргэнэ Владимир Михайлович химическэй наука доктора, профессор.
Ааптар: И. ИВАНОВ
