Skip to content

АНОНС

Открылся канал нашего портала в Ютубе - Канал «Якутия. Образ будущего»

Кыым кутаатын күөдьүтүөх, Өспөт уоттары уматыах!

Айыы Сиэн (Республика Саха, г. Якутск).
2.10.2018 г.

Эн, Бэстээх биэрэгэ, билигин даҕаны туоһулуу тураҕын, иэримэ дьиэлэртэн үүрүллэн тус хоту кыйданыы хабырын. Аймалҕан арааһын аастаҕын, дойдутун суохтаабыт, муҥунан ытаабыт, бүтэһик айанын билгэлээн биттэммит.
Оо, уйаҥ дууһалар, оо, нарын иэйиилэр, уйгуурбут уйулҕа дьаакырдаах таастарын туох күүс дагдатыай? Ким кэлэн көтөҕүөй? Оо, Улуу Эбэккэм, эн буолан уйдаҕын, ыар аһыы таммахтар эбиллэн элбииллэрин. Кыстык хаар кыстаммыт кытыла куруһуон. Хаһан даа хахыйах хаххалыы үүммэтэх, чэҥ муус кытылга сүөкэнэр сүөргүтүөн!

Муҥ саатар биир тоҥ сүрэхтээх тоһуйбат, саатар соҕотох көҥөс көҕүстээх көрсүбэт… көстүбэт!
Сиэр-майгы илдьитин дьэ хайдах тиэрдиэххэ:

1) Былас курдук уһуннаах харбыылы төбөлөрүн тыы-оҥочо курдук быһыылааҥ.

2) Чүмэчи туруоҕар сөбүлээн чычаастык үүттээриҥ.

3) Түгэҕэр дойдугут дулҕатын харыс курдук халыҥнаах гына быһыта-хайыта охсоҥҥут иҥиннэриҥ, тоһоҕолооҥ, шуруптааҥ, баайыҥ, үүдүҥ! Андыһыт сахалар билэллэр дулҕа ууну обордоҕуна эргийбэтин хааччыйарын!

Уонна дьэ ыытар кэһииҥ:
1. Ытыһан ыытыҥ арахпахха аалбыт, аймаабыт дойдугут буоруттан.

2. Кутуу чэйдэ.

3. Хамса табаахта.

4. Хаһан эрэ алаастарын минньигэс сытынан дыргыйа толорбут, дьиэ-кэргэни дьолунан дуоһуппут, толорбут алаадьыларыттан өлүүлээҥ.

5. Тооромос лэппээскэ, эбэтэр хоруоска килиэптэ! Арыылыырын буоллар астыныа даҕаны этилэр.

6. Биллэн туран илдьиттээх, солуннаах суруктаргытын умнумаҥ!
Кинилэр элбэҕи эрэнэллэр, кэтэһэллэр эбээт!

Модун Эбэбит быйыл тиэрдибэтэҕинэ, эрэн аны саас көмүөлэ син биир тиэрдиэҕэ! Эрэн!

Аны сайын Өлүөнэ баһыгар тиийбит, саха саллаата салгыы сэриигэ арҕаа барарыгар өйүөтэ бүппүт тууйаһын, ыаҕыйатын иһигэр уган илдьитин, суруктарын үтүө баҕа санаанан туолбут санааларын дойдуларыгар ыыттахтара. Ол туох туһунан буолуоҕай? Ол ону Эн эрэ билэҕин, аны сайын оҥорор-толорор эн өлүүҥ, чааһыҥ! Хайдах оҥоруохха, саамай судургута: эмэҕирбит сиргэ сытар хатыҥтан быһа охсон тэбиигин, наадалаах сиринэн үүйэҕин, тигэҕин, тутаах буолар гына быалыыгын.

Оставить комментарий

Войти с помощью: