Skip to content

АНОНС

Открылся канал нашего портала в Ютубе - Канал «Якутия. Образ будущего»

СУНТААР УЛУУҺУГАР УЛАХАН СУОЛТАЛААХ МУОСТА ТУТУЛУННА

Балаҕан ыйын 18 күнүгэр Сунтаар улууһун Кириэстээх-Куокуну муниципальнай трассаҕа Угуйа үрэҕи туоруур муоста үлэҕэ киирдэ.


Бу муоста икки ыаллыы сытар нэһилиэктэри эрэ буолбакка, Саха сиригэр тыа хаһаайыстыбатынан дьарыктанар биир бөдөҥ тэрилтэ – «Кириэстээх» ТХПК улахан эбийиэктэрин эмиэ ситимниир. Бу улуус социальнай-экономическай сайдыытыгар улахан суолталаах тутууну Сунтаар улууһун дьаһалтата, тутуу управлениета, бырамыысылыннас отдела, Кириэстээх, Куокуну нэһилиэктэрэ күүскэ туруорсаннар, «Сургутнефтегаз» ПАУо бырайыагын оҥорон, тутан биэрдэ.

Муоста үөрүүлээх аһыллыытыгар кыһыл лиэнтэни Сунтаар улууһун баһылыга Анатолий Григорьев, Кириэстээх нэһилиэгин баһылыга Александр Григорьев, Куокуну нэһилиэгин баһылыга Леонид Михалев, «Сургутнефтегаз» ПАУо Витимнээҕи суолу өрөмүөннүүр, тутар управлениетын кылаабынай инженерин солбуйааччыта Валерий Базовай быстылар. Валерий Анатольевич хампаанньа улууска төһө кыалларынан көмөлөһөргө бэлэмин, эһиил сааскы халааҥҥа муостаны кэлэн бэрэбиэркэлиэҕин туһунан эттэ.

«Сургутнефтегаз» ПАУо бу Угуйа үрэҕи туоруур аныгы кэм ирдэбилигэр эппиэтиир, 50 туонна уйуктаах муостаны таһынан, Кириэстээх-Куокуну муниципальнай трассаҕа икки турба муосталары түһэрдэ. Бу муосталар Сунтаар улууһа уонна «Сургутнефтегаз» ПАУо инникитин бииргэ үлэлэһэллэригэр бастакы хардыы буолар.

Ааптар: Станислав НОГОВИЦЫН

Оставить комментарий

Войти с помощью: