Skip to content

АНОНС

Открылся канал нашего портала в Ютубе - Канал «Якутия. Образ будущего»

БЭРДЬИГЭСТЭЭХ СЫБААЛКАТА 2019 СЫЛГА БЫҺААРЫЛЛАР

Горнай улууһун Бэрдьигэстээҕин сааскы уонна күһүҥҥү кыһалҕата сыбаалката буолар. Олохтоохтор усулуобуйата тэриллибит бөҕү тоҕор сири хас эмэ сыл  күүттүлэр. 2019 с. тохсунньутуттан балаһыанньа быһаарылларын улуус уонна нэһилэк дьаһалталара эттилэр. Оттон бүгүн сыбаалка сирэ айаҕыттан бөх, кыараҕас суол, эбиитин ынахтар аһыыр, көччүйэр сирдэринэн буолан турар.


Бэрдьигэстээх сыбаалкатын бүгүҥҥү кыһалҕатын быһаарыыны билсээри улуус, нэһилиэк дьаһалталарыгар, ветеринария управлениетыгар сырыттыбыт. Туһааннаах салайааччылар Ulus.Media сайт ааҕааччыларыгар чопчу быһаарыылары эттилэр. 2019 сылтан саҥа сокуон олоххо киирэр диэн буолла.

Юрий Алексеев, улуус баһылыгын 1-кы солбуйааччыта:

— Саҥа сокуон быһыытынан 2019 сыл тохсунньутуттан, сыбаалкалар көрүүлэрэ Единэй операторга бэриллэр. Киин улуустарга “ЯкутскЭкосети” тэрилтэ анаммыта. Билигин докумуон сааһыланыытын үлэтэ барар. Улууска манна үлэлэһэр тэрилтэ көрдүүллэр. 
Сыбаалка кыһалҕата турбута ыраатта. Инники сылларга ОДьКХ үлэлэһэрэ. Ол кэнниттэн ыһыллы-тоҕуллу кэмигэр быраҕыллан турбута. Итиннэ элбэх бөх мунньуллубута. Билигин ону улахан аҥарын суох гынныбыт. 
Күрүө туруора сылдьыбыппыт, нэһилиэнньэ көтүрэн илдьэ барбыта. Видеокамера үлэтин саҕалыырыгар ФСБ көҥүлэ оҥоһуллар. Бу олоххо киирдэҕинэ, административнай миэрэлэр ылыллан барыахтара. 
131 сокуон быһыытынан сыбаалка көрүүтэ улуус бас билиитигэр баар. 2014 сыллаахтан суолун анньыытыгар, ис өттүн былаанныырга сылга 600 тыһ.солк. көрүллэр. Билигин Алексей Павлов чааһынай тэрилтэтэ үлэлэһэр, барытын хонтуруоллуубут. Күрүөнү тутарга харчы көрүллүбэт, үбүлээһини элбэтэр кыах суох. 
Оттон кыбартыыралар бөхтөрүн хомуйуу, тиэйии бөһүөлэккэ баар, ЖКС тэрилтэ дуогабардаһан үлэлэһэр.

Алексей Аргунов, Бэрдьигэстээх нэһилиэгин баһылыгын солбуйааччы:

 Сокуон быһыытынан, сыбаалка улуус бас билиитигэр баар. Мин санаабар, дьонтон бэйэлэриттэн үгүс тутулуктаах. Киһи бөҕүн сөптөөхтүк дьаһаныахтаах. Холобур, дьиэтин таһыгар тимир буочука туруоран, “сухой” бөҕүн уматыахтаах. Умайбаты сыбаалкаҕа түгэххэ илдьэн сүөкүөхтээх. Нэһилиэк дьаһалтатыгар сыбаалкаҕа диэн харчы көрүллүбэт. 
Атын улуустар бөҕү хомунар уопуттарын, билиҥҥи туругунан, билсэ иликпин.

Юрий Пахомов, ветеринария управлениетын начальнига:

— Сыбаалкаҕа ынахтар мусталлара чахчы баар. Сүөһүлэр мэччирэҥҥэ барар сирдэригэр суолларын айаҕа. Манна ас тобоҕо эрэ баар буолбатах, химияттан саҕалаан араас  быраҕыллар. Онон, биллэн турар, сүөһүгэ куһаҕан. Улууска баар хас биирдии сүөһү ветеринарнай кэтээн көрүүнү ааһар. Куһаҕан көрдөрүүнү була иликпит. 
Сыбаалкаҕа аһыыр сүөһү үүтэ, этэ куһаҕан диэн нэһилиэнньэҕэ өйдөбүл баар эрээри, оннук дакаастана илик. Атыыга өлөрүллэр сүөһү этэ бэрэбиэркэни ааһар, хаһан да буортулаах эттиктээҕэ көстө илик.

Ааптар: Полина Николаева.

Күннэй Алексеева хаартыскаҕа түһэриитэ.

Оставить комментарий

Войти с помощью: